Nga kisikjeson Niná je chjotatsʼen: a kui xi tsonile nga tsʼen

NGA jchaa xi tʼatsʼe jebi, chótʼayajinla ánni nga kisikjesonsíni Niná je chjotatsʼen kʼianga Jtsínʼio kisikasén nichxinle Noé kʼoa nga kisikjeson je chjota xi tsakatio ya naxinandá Canaán tojosʼin bʼéyanajmí je Biblia.

JTSÍNʼIO XI JAʼAI NICHXINLE NOÉ

ITSO KʼA CHJOTA: “Chʼao kisʼin Niná kʼianga kʼoasikji chjota kisikjeson nga Jtsínʼio kisikasén kʼoa nga toje Noé kao yaniʼyale kisikʼangi”.

JE BIBLIA ITSO: “Likui tsjoa sʼena kʼianga biya je xi tsʼen, tosa kui xi mena nga katasíkʼéjna je ndiaale ánni nga tosi tonda kʼoéjnakonsíni.” (Ezequiel 33:11.) Tojo tso testo jebi, je Niná alikui tsjoa koanle nga kisikjeson chjotatsʼen xi tsakatio nichxinle Noé. Tonga ánni nga kʼoakisʼinsíni.

Je Biblia kʼoatso nga je kjoañʼai xi kisikasénne Niná je chjotatsʼen xi tsakatio nga kʼia “kʼoasʼin tsakakócho̱yale je xi tsakatiosa, xi tsín tsa bexkón Niná, je kjoañʼai xi kjoaʼaíle” (2 Pedro 2:5, 6). Jmé xi bakóyaná josʼin kisikjeson Niná je chjotatsʼen nichxin kjoatse.

Xi títjon, nda tsa aon male Niná nga síkjeson je chjotatsʼen kuenta tísʼín josíkao xínkjín kʼoa jokji jée tjíobásjaile yaole. Je Niná kjoaʼaxin nichxin xi nroaján ngayeje kjoañʼai xi tjín kʼoa kao kjoa xi tsín kixi kjima.

Xi majaoni, je Niná nʼio tse kjoatsjoacha tjínle kʼoa tongini bájinkon je chjota nga katasíkʼantjaiya yaole tojo kisʼin kʼianga kisikjeson je chjotatsʼen nichxin kjoatse. Tobʼelañá, jé Noé kisichjén nga tsakájinkon je chjota, tonga tojtaya kisʼin ngatsʼi. Je Biblia kʼoatso nga likui kinrʼoé je chjota “saʼnda nga jaʼai je jtsínʼiobe xi kikao ngatsʼi” (Mateo 24:39).

A tojo kʼoasʼin tsakájinkon chjota je Niná nga koanskanni. Jaon. Tobʼelañá, tongini tsakájinkon je chjota israelita nga jngo naxinandá kontrale kuichone, xi sikjeson Jerusalén kʼoa xi tʼaxin koaisíkatíonʼio, kʼiatsa kʼoatisʼin jokisʼin je naxinandá xi ya chrian tsakatio. Tonga je chjota israelita tojtaya kisʼin kʼoa kui choa̱le naxinandá xi ngikʼa kitjenngi. Saʼnda kisikʼienle je xtiʼndíle je niná ndiso xi tsakʼétsʼoale. A kisikjeson je Jeobá nga kʼoakisʼin. Jaon. Tonga títjon kjoanla nkjín kʼa kisikasén je profetale nga kʼoakitsole nga katasíkʼantjaiya yaole ánni nga tsín kjoesonsíni. Saʼnda i kitsole: “Nga̱ je Jeobá [...] nijmejinla xi tokʼoasʼinnjio tsa tsín kjoanla kasíkʼéjnatsenle je profetale jmeni xi sʼin” (Amós 3:7).

JÓSʼIN BASENKAONÁ JEBI: Josʼin kisikjeson Niná je chjotatsʼen nichxin kjoatse tsjoáná kjoachoya. Likui jao tjínná nga sikjeson Jeobá je chjotatsʼen. Je Biblia itso: “Je chjota xi tsʼen jtísonní [...]. Tonga je xi ndʼé tsʼee koa̱n i̱ sonʼnde kʼoa ñaki kʼoetsaojin jokji nyʼán sʼin koatio” (Salmo 37:9-11). Jósʼe tokuin kʼianga kʼoatso Niná nga sikjeson je chjotatsʼen kʼoa nga kjoaʼaxin ngayeje xi kjoañʼai tjíosíkjaʼá je chjota. A tsʼen je Niná axo tjínle kjoamatokon.

NGA KINIKJESON JE CHJOTA XI TSAKATIO YA CANAÁN

ITSO KʼA CHJOTA: “Kʼianga kʼoasʼin kisikjeson Niná je chjota xi tsakatio ya Canaán nʼio chʼao kisʼin. Yaa mangóson je chjota nga batío kjoajchán nga jngokʼa síkjeson je chjota xi kjaʼaísʼin tsen yaole”.

JE BIBLIA ITSO: “Ñaki kixi je ndiaale. Niná xi tsín bʼéndiso, xi tsínle kjoatsʼen; ñaki kixiní je” (Deuteronomio 32:4). Kʼianga síkjeson Niná je chjotatsʼen alikui ya mangóson je chjota xi kjoajchán batío. Nga̱ je chjota likui be jotjío ni̱ma̱le chjota, tonga je Niná bení.

Tobʼelañá, kʼianga kʼoakitso Niná nga sikjeson je naxinandá Sodoma kao Gomorra, je Abrahán nʼio koankjaojinle tsa tsín kixi tíjna jme xi sʼin Niná. Kʼoa i kitsole: “A yaa si̱kjesonkoai je chjota xi kixi kao xi tsʼen”. Je Abrahán likui koankjainle nga tojngo sikjeson Niná je chjota xi kixi kao chjotatsʼen, nga̱ je Niná nʼio kixi jme xi sʼín. Je Niná ngasin nganda tsakjákao je Abrahán kʼoa kʼoakitsole nga sichatʼale je naxinandá jebi ninga to te chjotakixi tjío ya Sodoma (Génesis 18:20-33). Je Niná kui kini jokisatio ni̱ma̱le chjota jebi kʼoa tsabe nga nʼio tsʼen koan (1 Crónicas 28:9).

Je Niná kʼoati tsabe nga nʼio tsʼen koan je chjota xi ya Canaán tsʼe kʼoa kuinga kʼoakitsosíni nga katanikjeson. Je chjota jebi nʼio tsaʼyale nga kui kostumbre kisʼele nga je ninále tsakakále je xtile, kʼoa nkjínsa koya jme xi nʼio chʼao kisʼin (2 Reyes 16:3).a Je chjota jebi bení nga kʼoakitsole Jeobá je chjota israelita nga je tsjoále nangi jña tjío. Nga tsín kitsjoa nangile ali tsa tojejin xi kontra tsakatiole chjota israelita, kʼoati kontra tsakatiole Jeobá, ninga tsabe ngayeje choa̱ xi tsakakó Jeobá nga ya tje̱n tíjnakao je naxinandále.

Tonga je Jeobá tsakakóle kjoamatokon je xi kisikatío je xájndí xi koanle kʼoa xi kui kʼoakisʼin jotso kjoatéxomale. Tobʼelañá, kisichatʼale je chjoónchajngi xi Rahab tsakʼin kʼoa kao yaniʼyale. Kʼoa kʼoati kisichatʼale je chjota xi ya tsakatio ya Gabaón kʼianga kisijé kjoanichatʼa, liʼya xi kinikʼien, nijejinla xtile (Josué 6:25; 9:3, 24-26).

JÓSʼIN BASENKAONÁ JEBI: Nʼio tse jmeni xi bakóyaná nga kʼoasʼin kinikjeson je chjota xi tsakatio ya Canaán. Jengisa chrian tíjna “nichxin nga sʼe̱ndajinle kjoa” kʼoa nga ni̱kjeson je “chjota xi tsín bexkón Niná” (2 Pedro 3:7). Kʼiatsa tsjoachaa je Jeobá kʼoa tsa nitjosonlee, sikʼanginá kʼianga sikjeson je chjotatsʼen xi tsín mele nga je koatexomale. Nga kui nichxin lijme kjoañʼai tisʼe̱niná.

Je Jeobá nʼio tjínle kjoatsjoacha nga tongini kʼoatsoná nga kʼoati tsaotʼale je xti jmeni xi sʼín je xi xijchá ma. Je Énle itsoná: “Tjínneno kui chjoéjion je kjoabijnachon ánni nga tosi tonda kuiyochonsíño, jon kʼoa kao xtino, nga tsjoacha koaon je Jeobá Nináno, nga kuinóʼyao énle kʼoa nga ñaki je koanngíntʼalao” (Deuteronomio 30:19, 20). A kʼoakuitsoná je Niná tsa tsʼenlani. A tsíkui xi bakó én jebi nga tsjoakená kʼoa nga mele nga kui chjoéjiaan xi skénndiaaná.