Ánni kʼoatso kʼasíni chjota nga kjoañʼai tsjoáná Niná

TSAKUI nichxin i̱sí: “Lijojin kjini je Niná nga kjoañʼai tsjoáná”. Kʼoa li tsa tojijin xi kʼoasʼin nikjaʼaitsjain. Tonga nʼio nkjín chjota xi kjonangile yaole tsa tsʼen je Niná kʼoa tjíoje̱ xi jekʼoasʼin síkjaʼaitsjen.

Je chjota xi kjoaxkón faʼatojin itso: “Ánni nga tsjoáʼndesíni Niná nga kʼoama. A tsín mandosinle xi tʼatsaan. A nʼio tsʼen”.

Kʼoa tjínkʼa chjota xi tsín sasénle jmeni xi bʼéxkia ya Biblia. Tobʼelañá, tʼatsʼe Jtsínʼio xi jaʼai nichxinle Noé. Itso kʼa chjota: “Kʼiatsa tjínle kjoatsjoacha je Niná, ánni nga kʼoasikji nkjín chjota kisikjesonni nichxinle Noé, a tsʼen tsokʼoa”.

A jesa kichjonangilai yaoli xi tʼatsʼe jebi. A ñʼai mali nga ʼmiyalai je chjota xi kui kjonangi tʼatsʼe jebi. Kʼiatsa jaon, nʼio koasenkaoli jme xi faʼaitʼa ibi.

ÁNNI NGA JTICHASÍÑÁ JE KJOATSʼEN

Kuinga sénle kisikʼaná je Niná kʼianga kisindaná. Alikui mangósoán kao je cho̱, xi ñá ʼyañá jmeni xi ndatjín kʼoa jmeni xi chʼaotjín (Génesis 1:27). Kʼianga kʼoatso Biblia nga sénle kisikʼaná Niná kui xi tsonile nga koa̱nná koakoá jokjoan je Niná kʼoa nga koa̱n koanngíntjenngiaa kjoatéxomale. Tikjaʼaitsjenlai jebi: Kʼiatsa jtichaa ñá je kjoatsʼen, ngo̱ ngisajin nʼio jtike je Niná.

Je Niná nʼio jtike je kjoatsʼen kʼoa je Biblia itso xi tʼatsʼe: “Je ndiaana ngisa ngʼa tikʼoajinni je ndiaa xi tsaon, kʼoa je kjoafaʼaitsjenna ngisa ngʼa tíjna tikʼoajinni je kjoafaʼaitsjenno” (Isaías 55:9). Kʼiatsa kʼoakuixoán nga tsʼen je Niná, joxi tichʼasjengijián testo jebi, kʼoa ngisajin ngʼa tichʼasjee kjoafaʼaitsjenná tikʼoajinni je kjoafaʼaitsjenle Niná. Tonga ngisa ndatjín nga títjon kjoanla kuijnatsʼinyaa jokjoantjínni. ʼNdele nga kui chjónangilee yaoná tsa tsʼen je Niná, tosa kui chjónangilee yaoná ánni nga kjoatsʼen tje̱nkao masíniná jmeni xi sʼín. Kuikjoanla títjon kataʼyaa josʼín jngo chjota xi tsʼen.

Kʼianga tsʼen ʼmilee jngo chjota kui xi tibixoán nga chʼao sʼín. Je chjota xi tsʼen ñaki tsjoa male kʼianga kjoañʼai faʼatojin chjota kʼoa likui mamake ninga be nga kjoañʼai tjíofaʼá. Tobʼelañá, tsa jngola nʼai koatekjáyale je ʼndíle kʼoa tokui kʼoasʼinni nga katamiʼaon kjoafaʼaitsjenle, kʼoajin kuixoán nga tsʼen je nʼai jebi. Tonga tsakui koatekjáyanile nga kjoenle ndiaa kʼoa nga tsín jme xi katamale, kʼoajin kuixoán nga nda chjota. Tojosʼin tiʼyaa, sakʼoa chʼaosʼin nikjaʼaitsjeen xi tʼatsʼe chjota, kʼoa tsakui nichxin jesa chʼaosʼin kisikjaʼaitsjen chjota xi tʼatsi.

Kuila kataʼyasaa nga jao koya xi jekabixoán anni nga kʼoasʼin síkjaʼaitsjen kʼasíni chjota nga tsʼen je Niná. Kʼianga kjoaxkón sʼe kʼoa kʼianga kʼoatso Biblia nga kisikjeson chjota je Niná ngasʼa. A kui xi tsonile nga tsʼen je Niná.