XI TÍNCHJA̱NI REBISTA JEBI: LIʼYA XI TICHʼAOSʼIN SIKJAʼAITSJENNI TʼATSʼE CHJOTA XI KJAʼAÍ, KʼIÁNI KʼOAKOA̱N
Ngakjijnda Sonʼnde nga chʼaosʼin síkjaʼaitsjen chjota tʼatsʼe xi kjaʼaí
JE Jonathan yaa Estados Unidos kitsin kʼoa je xijchále yaa naxinandá Corea tsʼe. Nga sʼa tiʼndí nʼio chʼao tsakʼinle nga kjaʼaísʼin tsen yaole. Kʼianga jekoanjchínga tsakásjai ʼnde jñani tsín chʼaosʼin sikjaʼaitsjen chjota xi tʼatsʼe. Chjinexki kiskotʼaya kʼoa yaa kisíxá ya Alaska (Estados Unidos), kʼoa me ngatsʼi chjota xi kisixkile xi kʼoatisʼin tsen yaole joni tsa je. Kʼoasʼin kisikjaʼaitsjen nga tsín tiʼya xi chʼaosʼin sikjaʼaitsjenni xi tʼatsʼe ya ʼnde jebi.
Tonga ñandia jngo tsoti xi kan aon nóle kisixkile xi ñaki jekijnakʼienya tsakai. Kʼianga jejaʼáyanile tsoti jebi kʼoa tsabe nkjaín Jonathan, jngo én xi nʼio chʼao tso tsakjákao. Ánni. Kuinga nʼio jtike je chjota xi ya Corea tsʼe. Kʼianga kʼoatsakʼinle je Jonathan nʼio ba koanle kʼoa kʼoasʼin kisikjaʼaitsjen nga toxitsjoani ninga ya ki ʼnde jebi.
Jme xi koantʼain je Jonathan kui bakóná nga kʼoasʼín chjota ngakjijnda Sonʼnde nga chʼaosʼin síkjaʼaitsjen tʼatsʼe chjota xi kjaʼaí. Me tokʼoasʼín ngatsʼi chjota.
Tsandalani kʼoama ngakjijnda, me ngatsʼi chjota nga kʼoatso nga tsín ndatjín jebi. Tonga ánni nga kʼoasʼínsíni ngakjijnda je chjota kʼiatsa nʼio nkjín mani xi kʼoatso nga tsín ndatjín. Jebi kui xi bakóná nga nʼio nkjín mani xi saʼnda tsín tsen male tsa kʼoaniti sʼín. Kʼoa ñá, jósʼin nikjaʼaitsjeen tʼatsʼe chjota xi kjaʼaí.
NGATSʼIÑÁ NGA KʼOANʼIA
Sakʼoa likui ʼyaa yaoná tsa kʼoaniti chʼaosʼin nikjaʼaitsjeen tʼatsʼe chjota xi kjaʼaí. Ánni kʼoamani. Je Biblia itso: “Je ni̱ma̱ná ngisa nʼio bʼanacha tikʼoajinni tojmeni” (Jeremías 17:9). Tsakui nichxin kʼoasʼin si̱kjaʼaitsjeen nga tosasénná toʼya chjotani, kʼoa tsa tjíokʼa chjota xi tsín sasénná tochale kʼoakuixoán nga tjín anni nga tsín sasénsíniná.
Jósʼin si̱kjaʼaitsjain tʼatsʼe chjota xi sa̱tékjoai ya yandiaa kʼiatsa tsín ʼyaxkuin
Jngola choa̱ kʼoéjnaa ánni nga ñʼai masíniná nga ʼyaa yaoná: Tsa jekoannjio kʼoa ya kitje̱nyaa jngo ndiaa jñani tsín nanda ʼya xi bʼetsoma kʼoa tsa toxijña jao xti xi tsín ʼyaxkoaan jchaa xi jenroachrian kʼoa tsa jngo xi kʼoasʼin matsen nga tjín xi yʼatontsja, jósʼin si̱kjaʼaitsjeen.
A kuijkónlee chjota jebi. Jeʼyaa nga tjínnele si̱kuindaa yaoná, tonga a kixi tíjna tsa kjoan kʼoasʼin si̱kjaʼaitsjeen nga chjotaché nga jao xti jebi. Xi ijngosani, a kui koaiya ndi̱to̱n jkoaa jñáni tsʼe. Kʼiatsa tokui nga kʼoasʼin si̱kjaʼaitsjenñá nga xin ʼndele, kʼoajinniti chʼaosʼin nikjaʼaitsjeen tʼatsʼe chjota xi kjaʼaí.
Xi ñaki kjoaixi, ngatsʼiñá nga sakʼoa chʼaosʼin nikjaʼaitsjeen tʼatsʼe chjota xi kjaʼaí. Je Biblia jngo koya bʼéjnatsen jonʼia, itso: “Je chjota tokui kotsenle jmeni xi faʼaya xko̱n” (1 Samuel 16:7). Ñaki kʼoatjín jotso én jebi. Sakʼoa kʼoanʼia kʼoa nʼio chʼaosʼin bichótsjoá. A chan tsín tichʼaosʼin si̱kjaʼaitsjenñá tʼatsʼe chjota xi kjaʼaí. A kjoaʼaí nichxin nga tsín ʼya xi tikʼoasʼinni i̱ Sonʼnde.