“Niná tongóson fikao ngatsʼi [chjota]”

A sakʼoa bʼasjengili chjota. A sakʼoa tsín tjoʼndeli tsa jña kuitjásʼain kʼoa tsa tsín bʼaili jmeni xi nijái. A kui kʼoamatʼainni nga kjaʼaísʼin tsen yaoli, tsa xin tsi kʼoa tsa to ma̱ tinijchái yaoli. Ali tsa tojijin xi kʼoamatʼain, nʼio nkjín chjota xi kʼoamatʼain. Tonga tinʼiui tokuin. Tojé chjota xi kʼoasíkao xínkjín, je Niná alikui kʼia kʼoasikaoná. Je pastro Pedro i kitso: “Niná tongóson fikao ngatsʼi [chjota]”. (Tʼexkiai Hechos 10:34, 35.)

Je Pedro yaa tíjna ya niʼyale chjota xi Cornelio ʼmi kʼianga kʼoakitso én jebi. Tokʼoamaná nga ya tíjna nga̱ je Pedro chjota judíoní kʼoa Cornelio ali tsa judíojin. Nga kʼia, je chjota judío chʼaosʼin bekon je chjota xi tsín judío kʼoa alikui ya kisichrianle. Ánni nga ya kisíni je Pedro ya niʼyale Cornelio. Kuinga je Jeobá xokitsole. Jngo sén kisakole jñani i̱ tsakʼinle: “Je xi Niná kisitsje, ali tsojmixkónjin ʼmilai”. Kʼoa likui tjínjinle nga jngo nichxin tongini kʼoati jngo sén kisakole je Cornelio jñani kʼoakitso jngole ánkje nga katafichʼale je pastro Pedro (Hechos 10:1-15). Je Pedro koanjinle nga je Niná xi kʼoasʼin tsakʼéndajin nga ya kikonle Cornelio.

Je Pedro i kitso: “Kjoakixi ní, tiʼbenía nga Niná tongóson fikao ngatsʼi [chjota]” (Hechos 10:34). Kʼianga én griego jngo xi faʼájin xínkjín kʼoasʼin tsoyanile jokitso jngo chjota xi Biblia kotʼayason, kitso: “Jé xotsole jngo jues xi to nkjaín chjota kotsenle kʼoa tokui fini nga tsjoále kjoañʼai kʼoa tsa sikʼéjnandaí. Tokui fini tsa kasasénle chjota kʼoa tsa mai, saʼnda tsín básjaiya jme kjoa xi tísʼene”. Je Niná alikui kʼoasʼín, aliʼya xi faʼájin xi totʼatsʼe josʼin tsen yaole, jñani tsʼe kʼoa josʼin tíjna.

Je xi kotsenle Jeobá kui ni̱ma̱ná (1 Samuel 16:7; Proverbios 21:2). Je Pedro i kitso: “Tojñani sonʼnde, je xi tsokjónke Niná, xi sʼín xi kjoakixi, Niná tjaokení” (Hechos 10:35). Kʼianga nokjonchá Niná kui xi tsonile nga ʼyaxkoán, nga je ninʼiotʼaa yaoná kʼoa nga tsínkui kʼoanʼia jmeni xi tsín sasénle. Kʼoa kʼianga kui kʼoanʼia xi kjoakixi kui xi tsonile nga ñaki kao kjoatsjoa kʼoanʼia jmeni xi kixi tíjna ngixko̱n Niná. Je Niná tsjoakení je chjota xi ñaki kao ni̱ma̱le kʼoasʼínni xi kixi tjín kʼoa xi bexkón (Deuteronomio 10:12, 13).

Kʼiatsa ʼya xi bʼasjengili, nʼiojin sinʼio tokuin je én xi kiski Pedro. Je Jeobá nchja̱ndʼéle tojokji chjotani nga katasíxále (Juan 6:44; Hechos 17:26, 27). Nrʼoéle je xi bʼétsʼoale kʼoa tsjoále jme xi síjéle je xi je bexkón, ali tsakuijin fini josʼin tsen yaole, jñani tsʼe kʼoa josʼin tíjna (1 Reyes 8:41-43). Kʼianga kotsenniná ya ngʼajmi tongóson sʼin tíbená ngatsʼiaa. A tsí meli nga jchasai xi tʼatsʼe Jeobá, je Niná xi tongóson sʼin fikao ngatsʼi chjota.