JMENI XI KJONANGI XI BʼÉXKIA REBISTA JEBI

A kixi tíjna nga ya tojngo koatio kʼianga sʼejna kjoajtín je xijchá kao jngo tile xi jetsakichonsjejin naxinandále Niná

Alikui koa̱n nga kui nʼio si̱kjaojiaan jñani koa̱n koatio je chjota xi jetsakichonsjejin naxinandále Niná kʼianga bichó kjoajtín. I̱ rebista jebi jekjoan nkjín kʼa bʼaile kjoafaʼaitsjen je xi xijchá ma kʼianga koa̱n tojo kuinyakao je xtile xi tsakichonsjejin nga katasíchriantʼale Niná kʼiatsa tojo ya tjíokaosa kʼoa tsa je xi kʼoasʼin mele. Je rebista La Atalaya xi tsʼe 15 de noviembre de 1988, pájina 19 kao 20, kʼoakitso nga je xi xijchá ma saʼnda koaan kuitsoyale Biblia tsa jngo ti tíjnale xi tsakichonsjejin xi kje kasonjin nóle kʼoa tojo ya tíjnakaosa. Tsakui nichxin ya kjuinroani nga sichriantʼa ijngokʼanile Jeobá ti jebi.a

Kʼianga koai kjoajtín je ti xi jetsakichonsjejin, xi kje kasonjin nóle, alijme xi koa̱nle tsa ya kʼoéjna jña koatio xijchále kʼoa nga jyó kʼoéjna. Je xi bichonsjejin naxinandále Niná alikui kjoanʼio tjínle nga ya koatio jña fetʼani, koaan koatio tojñani. Kuinga tsín jme xi koa̱nsínile tsa ya ñatje̱n koatio kao xijchále je xi kje kasonjin nóle. Kʼoa mani nga kui xi mele je xi xijchá ma nga nda kʼoéjnani ngixko̱n Niná je tile, kʼiatsa ya ñatje̱n koatio koa̱njin sikuinda kʼiatsa basénño jmeni xi sakóya ya kjoajtínná, kʼoa tsa xin kʼoéjna alijojinsʼin skoe̱ni.

Kʼiatsa tsín tiya tíjnakaoni xijchále, a tojo koaan ya ñatje̱n koatio kʼianga bichó kjoajtín. Je xo̱n xi kjioná kʼoatsokixi josi̱koaa je xíngiaa xi tsakichonsjejin naxinandále Niná xi tsín tiya tojngo niʼya tiyoñá.b Kʼiatsa ya ñatje̱n koatio xi jetsakichonsjejin kao xínkjín kʼianga sʼejna kjoajtín, ali tsakuijin xi tsonile tsa ya nʼio tjíosísinle. Kʼiatsa je xínkjín xi tjíobʼénele yaole nga tjíofitjenngi jotso je Énle Niná jonikao jngo chjota xi jetsakichonsjejin, likui tjínnele anni nga ñá nʼio si̱kjaojinñá (1 Cor. 5:11, 13; 2 Juan 11).

Kʼiatsa sítjoson je kjoatéxoma je xi jetsakichonsjejin, alijme xi koa̱nle toʼyani xi kʼoéjnatʼale, ni xínkjín mani kʼoa ninga mai. Sakʼoa kjoa sʼe kʼianga ñaki tsen satíole yáxile jñani ma batioson kʼa chjota xi bichó ya Ndʼia jña chotʼayá. Kʼiatsa ngatsʼi xi bichó kjoajtínná kʼoa kao je xínkjín xi tsakichonsjejin kʼoasʼin koaitjenngi jotso je kjoatéxomale Niná jotjínnele si̱koaa chjota jebi, kʼoa tsa tsín ʼya xi saténgi kjoafaʼaitsjenle tojñani bʼejna jngo xi jetsakichonsjejin, alikui koa̱n nga kui nʼio si̱kjaojiaan xi tʼatsʼe jebi.