Jósʼin tsjoa sʼe̱ tokoán nga si̱xá

KUI SI̱KJAʼAITSJEEN JE KJOANDA XI TJENKAO XÁNÁ

Ninga nʼio tse kjoafaʼaitsjen machjénle je xáná kʼoa tsa maije̱ tse nganʼio machjénle, tonga si̱kjaʼaitsjeen nga “kjoanda kitjenkao tojme xá xi tse kjoama̱ sʼengi” (Proverbios 14:23). Jmé kjoanda xi tjenkao. Basenkaoná nga sokóʼaná yaoná. Je Biblia kʼoatso nga je Niná sikuinda xi bʼénele yaole nga je síxále (Mateo 6:31, 32). Tonga kʼoati tso nga tjínnená nga ñaki nda si̱xá (2 Tesalonicenses 3:10).

Si̱kjaʼaitsjeen jme xá tinixáñá. Je xá xi nʼia basenkaoná nga bitjosonná jmeni xi kjinená. Je Joshua, xi kan aon nóle, itso: “Nda sʼe tokoán nga maniná jokji njená. Kʼiatsa maná bijnyiʼa yaoná, je xáná tíbasenkaoná”.

Xi ijngosani, kʼianga nʼio nixá basenkaoná nga nda sʼe tokoán. Ánni kʼoabixónsíñá. Kuinga tsín choa ñʼai maná nga nʼio nixá kʼoa nga matsʼelee. Tonga tsa maná nitjoson kʼoa bʼenelee yaoná, nda sʼe tokoán nga nʼio nda kanixá ningalani nʼio ai je xá xi kanʼia (Proverbios 26:14). Ñaki nda sʼe tokoán nga jekanixá. Je Aaron, xi kanikʼaxkiaa ya kjoaʼmiya xi kafaʼato, itso: “Ninga jenʼio kijtana nga jemaxon, kʼoa ninga tsín ʼya xi kabe je xána, tonga ʼbeña jokji kasixá kʼoa tsjoa sʼe tokoan”.

SA NDA SA NDA KATAMANÁ JE XÁ XI NʼIA

Je Biblia nda síkʼaxki̱ jngo xʼin xi nʼio nda male síxá kʼoa kao jngo chjoón xi nda síxá (Proverbios 22:29; 31:13). Kjoaixiní nga nichxin machjénle nga ngisa nda koa̱nná je xá xi nʼia. Kʼoa alikui tsjoa sʼená kʼiatsa tsín nda maná jngo xá. Tsakui nichxin kui xosíkao kʼa chjota nga tsín tsjoakeni je xále. Tonga kui kʼoamani nga tsín bʼénele yaole nga ndasa koa̱nle je xá xi sʼín.

Je chjota tsjoa sʼe̱ kon tojme xáni xi sʼin kʼiatsa kʼoenele yaole nga ndasa koa̱nle je xá xi sʼín. Je William, xi kanño nóle, itso: “Nga nʼio bʼenelee yaoná nga nixá kʼoa nga ʼyaa josʼin bichótsjoá nʼio nda sʼe tokoán. Kʼiatsa tsín kʼoénelee yaoná alikuijin kʼoasʼe̱ tokoán”.

SI̱KJAʼAITSJEEN JOSʼIN BINYAKAO XI KJAʼAÍ JE XÁ XI NʼIA

Alikui koa̱n nga tokui kjuinñá jotjín tao̱n njená. Chjónangilee yaoná jebi: “Ánni nga nʼio machjénsíni je xá xi sʼian. Jókoa̱n tsa tsínlani ʼya xi kui xá sʼin kʼoa tsa tsín nda sixáje̱. Jósʼin binyakao xi kjaʼaí je xá xi sʼian”.

Tsakui si̱kjaʼaitsjeen josʼin binyakao xi kjaʼaí je xá xi nʼia koasenkaoná nga tsjoa sʼe̱ tokoán. Je Jesucristo i kitso: “Tongisa ndaní nga kʼoee kaoni tsa nga chjoé” (Hechos 20:35). Ningalani je xi títjon binyakao je xá xi nʼia, je xi nainá mani kao chjota xi batse, tonga kʼoati binyakao xi kjaʼaí, jolani familianá kʼoa kao chjota xi ñʼai chonle.

Familianá. Kʼianga jngo nʼai kʼoa tsa jngo na̱ xi bʼénele yaole nga bajngiʼa je familiale jao koya josʼin binyakao. Xi títjon, sokóle jmeni xi machjénle je familiale jolani je tsojmi xi kjine, je najño xi bʼakjá kʼoa kao niʼya jña batio. Kʼianga kʼoasʼín sítjoson je xá xi tsakánele Niná nga “síkuinda xínkjín” (1 Timoteo 5:8). Xi majaoni, kʼianga kʼoasʼín bakóyale je xtile jokji chjíle nga nda nixá. Je Shane itso: “Je pana nʼio nda xá tjínle, nʼio bʼénele yaole kʼoa ñaki nda síxá, jekjoatse nga chjineyá síxá. Je xi bakóyana choa̱le pana kui jokji chjíle nga ndsaa nixáñá, nga kui nindaa tsojmi xi síchjén chjota”.

Xi ñʼai chonle. Je pastro Pablo kʼoakitsole je chjotale Cristo nga tjínnele nʼio “katasíxá”. Ánni. Kuinga sʼe̱le “xi tsjoále xi tsínjme [xi] tjínle” (Efesios 4:28). Kʼiatsa kʼoénelee yaoná nga kuijnyíʼaa je familianá, tsakui nichxin saʼnda koa̱nsonniná nga kuinyakoaa je xi ñʼai chonle (Proverbios 3:27). Tojosʼin kaʼyaa, kʼianga nʼio nixá tsjoa sʼená nga bʼailee xíngiaa jmeni xi machjénle.

NGISA TSE SI̱XÁ JOKJI ʼMINÁ

Kʼianga kinchja̱yajinle chjota je Jesús ya jngo jko̱nindo, kʼoakitsole je chjotale nga tsa jngo xi xá tjínle kʼoakuitsole nga kjin koaikao, ngi jaoya kʼoakji katafikao (Mateo 5:41). Jósʼin koa̱n koanngíntjenngiaa én jebi. ʼNdele nga tochoa si̱xá tosa kʼoénelee yaoná nga ngisa tse si̱xá jotjín ʼminá. Ngisa xátíya si̱xá kʼoa ngisa nda si̱xá. Nʼio kuenta sʼiaan nisí toʼi̱natjín jmeni xi tinʼia.

Tsa kʼoasʼiaan, ngisa tsjoa koaya tokoán je xáná. Ánni. Kuinga tsín totibʼenelee yaoná, ñaki kao kjoatsjoa kʼoatinʼia. Ñá xi ʼyaa josʼin tinixá (Filemón 14). Jebi kui síkjaʼaitsjenjinná xi tso Proverbios 12:24: “Je xi nʼio síxáni kao ntsja jé koatexoma, tonga je xi tsʼe nga síxáni kao ntsja xáʼai kʼoaile”. Tsakui nichxin tsínkjoan ñaki xáʼai sʼe̱nená, tonga tsa totsʼe sʼin si̱xá, aijin koa̱nná je xáná kʼoa alikuijin sa̱sénná nga ʼya xi kʼoenená. Nʼio tsjoa sʼená nga kʼoanʼia jmeni xi mená, ʼndele nga to sʼe̱ná, kʼoa saʼnda koaan “jao ya kʼoakji” kʼoasʼiaan.

ALIKUI TOXÁNÁ KJUINÑÁ

Ninga nʼio ndatjín nga nixá, tonga si̱kjaʼaitsjeen nga tsín tsa tokuijin xi machjén nga sʼiaan. Je Biblia kʼoatsoná nga nda si̱xá (Proverbios 13:4). Tonga alikui kʼoatsoná nga ñaki to xáná sʼiaan. Ya Eclesiastés 4:6 itso: “Tongisa nda nga nikjáya i̱natjián tikʼoajinni nga jaoya kʼoakji nixá”. Jméni xi bakóyaná én jebi. Jngo chjota xi ñaki to xále sʼín tsakui nichxin nikʼiajin skoe̱ jme kjoanda xi tjenkao je xále, nga̱ to xále tísʼín ʼndeʼnde. Ya Eclesiastés kʼoatso nga jngoyale ntjao̱ tichjoejinsén tsa kʼoasʼiaan.

Je Biblia koasenkaoná nga chósonnilee josʼin jchatokoán je xáná. Kjoaixiní nga kʼoatsoná je Énle Niná nga kʼoénelee yaoná nga si̱xá, tonga kʼoati tsoná nga tsín si̱chajiaan jmeni xi ngisa chjíle (Filipenses 1:10, TNM). Jñá kʼanile xi ngisa chjíle. Kuinga si̱kʼayalee nichxin je familianá kao miyoná. Kʼoa je xi ngisa chjíle kui xi tʼatsʼe Niná tínroani, jolani nga kʼoéxkiaa je Biblia kʼoa nga si̱kjaʼaitsjenjiaan.

Je chjota xi kosonnile josʼin bekon je xále, ngisa tsjoa satío kon. Je William itso: “Je xi naina koanni nga títjon nʼio kosonnile josʼin síxá. Nʼio síxá kʼoa tsjoa tjíole je chjotale josʼin síxá. Tonga kʼianga fetʼa nichxin, alikui tixále síkjaʼaitsjenni, tojésa familia kao relijiónle kuenta sʼín. Kʼoa ʼbeña nga nʼio tsjoa tjínle”.