Jósʼin basenkaoná nga kinikʼien kʼoa nga jaʼáyanile Jesús

Je chjota alikui xá koanndani nga kuiyá

“Je Jeobá Niná kiskoé je chjota kʼoa yaa kisikʼéjna ya ʼndenaxóle Edén kʼianga kʼoentje kʼoa sikuinda. Kʼoa je Niná Jeobá kʼoati kui kjoatéxoma jebi kitsjoale je chjota: Koaan chi̱nai tole ngayeje yá xi tjín i̱ ʼndenaxó saʼnda nga koa̱nski. Tonga je tole yá xi tsʼe kjoankjíntokon xi ndatjín kao xi chʼaotjín, alikui koa̱n chi̱nai, nga̱ nichxin nga kui chi̱nai, kuiyání.” (Génesis 2:15-17.)

Je Niná yaa kisikʼéjna je Adán, je chjota xi títjon koannda, ya ʼndenaxóle Edén, jñani nʼio naskánakoanchon kʼoa nʼio nkjín cho̱ kao tsojmintje kisʼe. Ya jña tsakʼejna Adán kisʼe yá xi to bale kʼoa koan kiskine tojñanile xi koanmele. Tojngo kjoan yá kisasenjna xi kʼoakitsole Jeobá nga tsín koa̱n ski̱ne tole. Je Niná kʼoakitsole nga kuiyá tsakui ski̱ne.

A koanjinle je Adán nga kʼoatsakʼinle. Jaon. Tsabe jmeni xi kjoabiya ʼmi. Nga̱ tsabe nga biya je cho̱. Tsa kʼoalani tisʼin koannda je Adán joni tsa cho̱ alijmejin xá kʼoakitsonile je Niná nga̱ tojo kuiyáni. Je Adán koanjinle nga kʼoéjnakon ngantsjai nichxin tsa sitjosonle Niná kʼoa tsa tsínkui sikao je yá xi kitsole Niná.

Tjínkʼa xi kʼoasʼin síkjaʼaitsjen nga je yá jebi kui kitsoyanile nga tsín koa̱n kjoáyokao xínkjín je Adán kao Eva. Tonga alikui kʼoatjín. Nga̱ je Jeobá i kitsole je Adán kao Eva: “Katamantje̱ñó kʼoa katamankjínyañó, titsao sonʼnde kʼoa tatexomalao” (Génesis 1:28). Je yá jebi ñaki kisasenjnaní. Je Jeobá “yá xi tsʼe kjoankjíntokon xi ndatjín kao xi chʼaotjín” kitsole, nga̱ tojéní xi tiʼndele nga kʼoakuitso jmeni xi ndatjín kʼoa jmeni xi chʼaotjín. Tsa tsínlani kiskine tole yá jebi je Adán, ali tsa tokuijin tsakakó nga kisitjosonle Niná, kʼoati tsakakó nga tsjoále kjoanda je Niná nga kʼoasikji tse kjoanda kitsjoale.

Kuinga kʼienni Adán nga tsín kisitjoson

Je Niná i kitsole Adán: “Nga kʼoasʼin [...] kachinai je tole yá xi kixinle. [...] Kao ndásjueyali kuichini nioxtila saʼnda nga nangi koa̱nni, nga̱ kui koanndani. Nga̱ chaoní kʼoa chao koa̱nni” (Génesis 3:17, 19).

Je Adán kiskine tole yá xi kʼoatsakʼinle nga tsín koa̱n ski̱ne, kʼoa je Niná alikui kisichatʼale. Nga kʼoasʼin tsín kisitjoson, alikui tsabechjí ngayeje kjoanda xi tsakakóle Jeobá. Nga kʼoasʼin kiskine tole yá jebi tsakʼasjengi je Jeobá kʼoa tojé tsakʼa yaole kʼoa nga kʼoakisʼin nʼio chʼaosʼin kichomani.

Kʼoakoan jokitsole je Jeobá, je Adán kʼien nga koanskanni. Je Niná chaole nangi kisindani je Adán kʼoa kʼoakitsole nga chao koa̱n ijngokʼani. Kʼianga kʼien je Adán alikui xin kikʼejna. Chao koan ijngokʼani nga̱ kui koanndani (Génesis 2:7; Eclesiastés 9:5, 10).

Kuinga biyañá nga ntje̱le Adán maa

“Kui je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi.” (Romanos 5:12.)

Nga tsakajngijée je Adán nʼio chʼaosʼin kichomani. Kisicha kjoabijnachon xi tsakʼaile nga koa̱n kʼoéjna ngantsjai nichxin nga tsín tsa to jankan kao te kʼoa tsa to ñokan nó kʼoéjna jomaa tsa ñá. Tonga ali tsa tokuijin xi kisicha, likui tichjotatsje koanni kʼoa kuinga chjotajéesíni je xtile nga kitsin.

Jé Adán xi jée kisikakinná ngatsʼiaa kʼoa kuinga jée sokósíniná kʼoa nga biyasíñá. Je Pablo nda koanjinle josʼin tiyoaa kʼoa kuinga i̱ kitsosíni: “Tonga an toxá yao nía. Kisatenatʼale jéebe nangi tijnale. Ma̱xónia anbi. ʼYá xi sikʼéjnandaínina yaona xi tsʼe kjoabiyabi”. Kʼoa xijekoan i kitso: “Tsjoale kjoanda Niná xi totʼatsʼe Jesucristo Nainá” (Romanos 7:14, 24, 25).

Je Jesús kitsjoa kjoabijnachonle nga koa̱n kuiyoaa ngantsjai nichxin

“Nʼainá kisikasén ʼndíle, nga je xi bʼasjentjai sonʼnde.” (1 Juan 4:14.)

Je Jeobá tongini tsakʼéndajin nga koa̱n kuiyondaílee je jée kʼoa kao kjoabiya. Jméni xi kisʼin. Kisikasén je ʼNdíle i̱ Sonʼnde, kʼoa ñaki chjotatsje nga kitsin, joni tsa Adán. Tonga je “Cristo likui tsajngi jée” jokisʼin Adán (1 Pedro 2:22). Nga tsín chjotajée koan alikui kjoabiya kiskoʼnda kʼoa koanjin tsakʼejna ngantsjai nichxin.

Je Jeobá kitsjoaʼnde nga kinikʼien je ʼNdíle kʼoa nga koanjanni nichxin kisikjaʼáyanile. Je Jesús espírituní nga jaʼáyanile kʼoa nga jekoanskanni ki ijngokʼani ya ngʼajmi. Ya ngʼajmi, je Jesús yaa kichokao ngixko̱n Niná jokji chjíle je kjoabijnachon tsje xi kitsjoa xi totʼatsʼe chjota kʼianga koa̱n tjoé ijngokʼanile jmeni xi kisicha Adán. Je Jeobá kisasenle je kjoabʼechjíntjaile ʼNdíle kʼoa kao kui tjoénile kjoabijnachon xi tsínkʼia fetʼa ngatsʼi chjota xi sʼe̱le kjoamakjain tʼatsʼe Jesús (Romanos 3:23, 24; 1 Juan 2:2).

Je Jesús kjoabijnachonle kitsjoa nga kitjoé ijngokʼanile jmeni xi kisicha je Adán. Kuinga kʼienni nga koa̱n kuiyoaa ngantsjai nichxin. Je Biblia kʼoatso nga totʼatsʼe kjoandale Niná kiskotʼa “kjoabiya [je Jesús] xi tʼatsʼe ngatsʼi” chjota (Hebreos 2:9).

Nga kʼoasʼin kitsjoa je kjoabijnachonle ʼNdíle nʼio tse xi bakóná xi tʼatsʼe Jeobá. Je kjoatéxomakixile nʼio ngʼa tíjna, nga̱ xi tojé chjota likui koa̱nle kʼoasjentjai yaole. Tonga nga tjínle kjoatsjoacha kao kjoamatokon, je Niná tijé kisitjosonni jotso je kjoatéxomale. Tonga nga kʼoakisʼin nʼio tse kisʼengile. Nga̱ je kjoabijnachonle ʼNdíle kitsjoa kʼianga tsakʼéchjíntjai chjotasonʼnde (Romanos 5:6-8).

Je Jesús jaʼáyanile kʼoa kʼoati kjoaʼáyanile xi kjaʼaí

“Cristo jekinikjaʼáyajinnile je xi kʼen. Je xi koan tjonle je xi jekʼen. Josʼin nga je kjoabiya jaʼai xi tʼatsʼe jngo chjota, kʼoati xi tʼatsʼe jngo chjota jaʼai kjoafaʼáyale xi kʼen. Josʼin xi tʼatsʼe Adán ngatsʼi mʼen, kʼoatisʼinni tʼatsʼe Cristo ngatsʼi si̱kʼéyokonni.” (1 Corintios 15:20-22.)

Ñaki tsakʼejnaní je Jesús kʼoa kʼoati kʼien. Tonga, jómani ʼyaa nga jaʼáyanile. Kʼianga jaʼáyale Jesús nkjín chjota xi tsabe. Xinxin ʼnde tsʼatsen kʼoa kjaʼaí kjaʼaí nichxin kʼoakoa̱n. Ñandia nga tsʼato aon siento chjota tsʼatsenle. Je pastro Pablo kʼoakitsole nga kiskile je chjotale Cristo xi tsakatio ya Corinto xi tʼatsʼe jebi. Saʼnda kʼoakitso nga tjíokonsa kʼa je xi tsabe, xi tsonile, nga koa̱n kuitsoya jmeni xi tsabe kʼoa jmeni xi kinrʼoé chjota jebi (1 Corintios 15:3-8).

Nʼio tjínle kjoandosin jmeni xi kitso je Pablo nga Cristo “xi koan tjonle” xi jaʼáyale, xi tsonile nga je títjon Cristo jaʼáyale. Kʼianga kʼoakitso kui xi tsonile nga nkjínsa chjota xi kʼoati kjoaʼáyanile. Tijé Jesús xokitsoni nga kuicho nichxin nga “ngatsʼi xi tjío ya nyʼoákʼen” kjuinrʼoé jta̱le (Juan 5:28, 29).

Kʼiatsa mená kuiyoaa ngantsjai nichxin tjínnele nga sʼe̱ná kjoamakjain xi tʼatsʼe Jesús

“Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai.” (Juan 3:16.)

Je kapítulo xi tjíotítjon xi tsʼe Biblia kui nchja̱ni kʼiani tsʼatsen je kjoabiya kʼoa kʼianga kicha je ʼndenaxóle Edén. Kʼoa je kapítulo xi fetʼani xi tsʼe Biblia kui nchja̱ni nichxin nga tjóxin je kjoabiya kʼoa kʼianga sonʼndenaxó sikao Niná je Sonʼnde. Kʼianga kuicho nichxin jebi, je chjota nʼio nda koatio kʼoa tsjoa sa̱tíole ngantsjai nichxin. Ya Apocalipsis 21:4 kʼoatso nga “likui tisʼe̱ni kjoabiya”. Kʼoa nga koa̱nkjainná xi tʼatsʼe én jebi ya bersíkulo 5 itso: “Je énbi ndaní, kʼoa kjoakixiní”. Ngayeje jmeni xi tso Niná sítjosonní.

A makjainli nga ñaki kʼoatjín én jebi. Kʼiatsa jaon, , katamasali xi tʼatsʼe Jesús kʼoa katasʼeli kjoamakjain xi tʼatsʼe. Kʼiatsa kʼoasʼiain so̱koli kjoanda ngixko̱n Jeobá. Ali tsa tondʼaijin nga sichikontʼainli, kʼoati tsjoáli je kjoachoya nga koa̱n kuijnai ngantsjai nichxin ya sonʼndenaxó, jñani nga “likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male”.