Ánni kjoañʼai tsakjaʼásíni kʼoa kʼiensíni je Jesús

A meli kuijnai ngantsjai nichxin. Kʼianga kʼoaʼmilee je chjota jetokʼoatso nga toxá biyañá. Kʼoatso nga jetokʼoasʼin kichʼá kʼoa nga jetoya tjen fetʼa nga biyaa.

Tonga a meli nga kuiyái tsa kʼuínlee je chjota. Alikuijin ʼya xi jaon kuitso kʼianga nda tíjna. Ningalani tse kjoa tjínná, mená nga tosi tonda kuiyochoán. Je Biblia kʼoatso kʼianga je Niná toxá kʼoasʼin kisindani je chjota nga koa̱n koatio ngantsjai nichxin. Itso: “Yaa ni̱ma̱le chjota kisikʼéjnajin nichxin xi tsínkʼia fetʼa” (Eclesiastés 3:11).

Tonga nichxin xi tiyoaa ndʼaibi, alikui tobiyontsjé. Tonga ánni nga kʼoakoanni. Jméni xi tísʼín je Niná nga tíbʼéndajin kjoa jebi. Nʼio tsjoánganʼioná jmeni xi tso je Biblia kʼoa kui kʼoatsoná ánni nga kjoañʼai tsakjaʼáni kʼoa nga kʼienni je Jesús.

ÁNNI NGA KʼOAKOANNI

Nga jan kapítulo xi fitsʼiani xi tsʼe Génesis yaa kʼoatso jmeni xi kitsjoale Niná je Adán kao Eva, je chjota xi títjon tsakatío i̱ Sonʼnde. Kui kjoanda kitsjoale nga koa̱n koatio tokʼia saʼndani kʼoa kʼoakitsole jmeni xi koa̱n sʼin nga tsínkʼia kuiyá. Tonga kʼoati tso nga tsín kisitjoson kʼoa nga kisicha kjoanda jebi. Kʼoa nga to choa ñʼai sʼin tíjna jmeni xi bʼéyanajmí nga sʼa fitsʼiani libro xi tsʼe Génesis kuinga kʼoasʼin síkjaʼaitsjen kʼasíni chjota nga to kuento jebi. Tonga ñaki kʼoakoan jmeni xi bʼéyanajmí.a

Jósʼin tíbichómani nga tsín kisitjoson je Adán. Je Biblia itso: “Xi totʼatsʼe jngo chjota [Adán]. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi” (Romanos 5:12). Je Adán tsakajngijéení nga tsín tikisitjosonnile je Niná. Kʼoa kisicha je kjoanda xi tsakʼaile nga koa̱n kʼoéjna tsakai ngantsjai nichxin. Xijekoan, koanjchíngaa kʼoa kʼieen. Kʼianga ya kitjenñá, kʼoati chjotajée maa. Sokóchʼinná, majchíngañá kʼoa biyañá. Tonga kataʼyala jmeni xi kisʼin je Niná kʼianga tsakʼéndajin kjoa jebi.

JMÉNI XI KISʼIN JE NINÁ

Je Jeobá Niná kjoan tsakʼéndajin nga tsjoá ijngokʼanile je ntje̱le je Adán jmeni kjoanda xi kisicha nga koa̱n koatio ngantsjai nichxin. Jméni xi kisʼin.

Je Biblia itso: “Nga̱ je chjíle jée kjoabiya ní” (Romanos 6:23). Jebi kui xi tsonile nga je jée kao kjoabiya bʼechjíñá. Kuinga kʼiensíni je Adán nga tsakajngijée. Kʼoa nga kʼoati bijnyijée tsanda ñá kuinga biyañá. Nga tsín ñá kisʼená jée jmeni xi koan ya Edén, je Niná koanmakená nga kisikasén je Jesucristo, je ʼNdíle, kʼianga tsakʼéchjíntjainá. Jósʼin tsakʼéchjíntjainá.

Je Adán ñaki chjotatsje koan tonga alikui kisitjoson. Kʼoa ngatsʼi je chjota tsakinle je jée kao kjoabiya. Kuinga koanchjénsíni nga ijngo xi chjotatsje kuiyá nga koa̱nchjí jmeni xi tsakinná. Je Biblia itso xi tʼatsʼe jebi: “Josʼin nga kjaínga nkjín xi chjotajée koan xi totʼatsʼe nga jngo chjota xi tsín kisitjoson, kʼoatisʼin kjaínga nkjín xi chjotakjoakixi koa̱n xi totʼatsʼe nga jngo chjota xi kisitjoson” (Romanos 5:19). Kʼoa chjota jebi jéní Jesús, kisikʼéjna ngʼajmi, chjotatsje koanb kʼoa kʼienntjainá. Kʼoa nga kʼoakoan jechjotakixi sʼin bekonná Niná kʼoa koaan tjoé ijngokʼaniná kjoanda xi kicha nga koa̱n kuiyoaa ngantsjai nichxin.

ÁNNI KJOAÑʼAI TSAKJAʼÁSÍNI KʼOA KʼIENSÍNI JE JESÚS

A kjoanʼio kjoan tjínnele nga kinikʼien je Jesús nga koa̱n tjoé ijngokʼaná jmeni xi kicha. A tsín koanle je Niná tsa tosa jngo kjoatéxoma kitsjoa nga koa̱n koatio ngantsjai je ntje̱le Adán. Ninga koanlanile je Niná nga kʼoakisʼin, tijejin jaʼatoneni kjoatéxomale tsa kʼoakisʼin kʼianga kao kjoabiya machjíni je jée. Kʼoa je kjoatéxomale ali tsa kʼoajinsʼin tíjna tsa koa̱n sikʼantjaiya kʼiani nga mele. Ñaki kixi tíjna kjoatéxomale josʼin sʼendajin jngo kjoa (Salmo 37:28).

Kʼiatsa jaʼatonelani Niná je kjoatéxomale nga kui nichxin, alikuijin ʼyale tsa sitjoson ijngokʼa jmeni xi kuitso. Tobʼelañá, a kixi tíjna kʼianga kʼoakuitso ʼyáni je ntje̱le je Adán xi koa̱n koatio ngantsjai nichxin. A sitjoson ngayeje jmeni xi kitso. Nga tsín tsakasenne kjoatéxomale je Niná josʼin nga kʼoasjentjainá kui xi bʼéjngo tokoán nga kui kʼoasʼin ngantsjai xi kixi tíjna.

Kʼianga kʼoasʼin kitsjoaʼnde je Niná nga kitsjoa kjoabijnachonle je ʼNdíle, kui kjoanda xi kitsjoaná nga koa̱n kuiyoaa ngantsjai nichxin ya ʼndenaxó. Je Jesucristo kitso: “Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Kʼianga kʼoasʼin kʼien je Jesús, ali tsa tokui tsakakó Niná nga tjínle kjoatéxoma, kʼoati kui tsakakó jokji tsjoakená.

Tonga tojo chjonangilee yaoná, ánni nga kʼoasikji kjoañʼai tsakjaʼásíni kʼoa nga kʼiensíni je Jesús. Kʼianga tsínkʼia yátsʼi̱n tsakasén jokji nga kichotʼayakao, ñaki tsakʼéjnatsen nga to énndiso jmeni xi kitso je Na̱i kʼianga kʼoakitso nga nijngojin chjota xi kixi koaitʼale je Niná kʼianga kjoa kjoaʼatojin (Job 2:4, 5). Je Na̱i koanle tsakʼanachale chjota xi títjon tsakʼejna nga tsín tikisitjosonnile je Niná. Tonga je Jesús, xi kʼoati chjotatsje koan, kisitjosonle je Niná ninga nʼio tse kjoa jaʼatojin (1 Corintios 15:45). Kʼiatsa jelani Adán xi kʼoati kisʼin, kʼoajin tikoan kisitjosonle je Niná. Tonga je Jesús nda choa̱ tsakʼéjnaná nga kʼoati koa̱n si̱tjosonlee je Niná (1 Pedro 2:21). Nga kʼoasʼin kisitjoson je Jesús, je Niná yaa ngʼajmi kisikjaʼáyanile kʼoa kui kitsjoale kjoabijnachon xi nikʼiajin jme xi koa̱nle.

JÓSʼIN TSJOÁNGANʼIOLI

Ñaki kinikʼienní je Jesús kʼoa jé kiskoʼainá jngo ndiaa nga koa̱n sʼe̱ná kjoabijnachon xi tsínkʼia fetʼa. Kʼoa kuinga kʼoati ʼmingánilee xíngiaa: A meli kuijnai ngantsjai nichxin. Je Jesús kʼoakitso jmeni xi sʼiaan, kitso: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3).

Jin xi chʼasjaijin rebista jebi kʼoaʼmilaijin nga kataʼyasai je Jeobá, je xi ñaki Niná kʼoa kao Jesucristo je ʼNdíle. Je testigole Jeobá xi ya tjío jñani tsi nʼio tsjoa sʼe̱le nga koasenkaoli. Tsa mesali jchai xi tʼatsʼe jebi, titjásʼain pájina xi tíjnanajin ya Internet ya jw.org.