Nʼio síkjáojin nga xkón kjimachon

Je Alona itso: “Kʼianga fane je sirena, ñaki bʼatsé ni̱ma̱na kʼoa kjitʼanangi fitoka ya ʼnde jña ma biyoʼmá nga bomba tsao. Tonga tojo tsokjonña ninga ya tijna. Kʼoa ngisa nʼio tsokjoan kʼiatsa tsín ya ndʼiana tijna, tsa tsín jñani koa̱n koatejnaʼma. Ñandia nga tsoʼba ya kaye, toʼikoan jane je sirena. Ñaki kiskiʼndáña kʼoa tsín tikoan kiskenjtaña. Nkjín ora tsakatejnajyoña. Tonga tijanengáni je sirena”.

Ali tsa tojejin chjota xi ya tjío jñani kjoajchán sʼe xi síkjáojin nga xkón tjío. Tobʼelañá, kʼoati nʼio nikjáojiaan kʼoa ñaki bixojeen yaoná kʼianga sʼejinná nga jngo xíngiaa kʼoa tsa jngo miyoná xi nʼio táo chʼin kakatʼale. Kʼoa tjíosakʼa chjota xi nʼio síkjáojin tʼatsʼe nichxin xi nroaján, tsakui nichxin i̱ tso: “Jósʼin koatio ʼndíxtiná kao ʼndíxtindainá nyaonli jngili ján. Kʼianga sijchá yaole, a ngisa tse kjoajchán, contaminación kao chʼin sʼe̱”. Jósʼiaan kʼiatsa kui jebi xi nʼio nikjáojiaan.

Je Biblia itso: “Je chjota xi kosonnile josʼín, bʼejnaʼmaa nga jebe xi xkón sikʼéjna” (Proverbios 27:12). A tsí nʼio nda tíjna kjoafaʼaitsjen jebi, jósingái ji. Tojosʼin nga nikuindaa yaoná, kʼoati machjén nga si̱kuindaa kjoafaʼaitsjenná kao josatío tokoán. Je kjoasʼetsaojin xi kjoatsʼen bakó kʼoa kao je noticia xi ñaki bakósontsen je xi tonokjonlee, ngisa nʼio nikjáojiaan, ñá kʼoa kao ʼndíxtiná. Kʼianga tsínkui chotsenlee jebi ali tsakuijin xi tsonile tsa tsín kuenta tinʼia jme xi kjima, tosa tinikuindaa yaoná. Je Niná ali tsakuijin xá kisindaniná nga tokui xi chʼaotjín kuinyaa jkoaa, kui xi mele nga kui kuinyaa jkoaa xi ñaki kʼoatjín, xi tjínle kjoakixi, xi tsje tjín kao xi naskátjín. “Je Niná xi síkinjenyʼánjin ni̱ma̱n[á]” ñaki nda kʼoee tokoán kʼiatsa kʼoasʼiaan (Filipenses 4:8, 9).

NʼIO MACHJÉN NGA KʼOÉTSʼOAA

Jekaʼyaa nga je xi nʼio basenkaoná nga tsín nʼio nikjáojiaan kuinga ñaki katamakjainná xi tʼatsʼe Niná. Kʼoa je Biblia kʼoatsoná nga tosi tonda kʼoétsʼoalee Niná kʼianga kjoa bitjatojiaan (1 Pedro 4:7). Koaan si̱jélee nga katabasenkaoná, nga katatsjoáná kjoachjine kao kjoanʼiojin nga koa̱nná josʼiaan. Kʼoa likui jao katasʼená nga nrʼoéná “tojmeni kjoa xi nijélee” (1 Juan 5:15).

Je Biblia kʼoatso nga jé “na̱i xi batéxoma sonʼndebi”, ali tsa jejin Niná (Juan 12:31; 1 Juan 5:19). Je Jesús be nga ñaki tíjna je Na̱i kʼoa kuinga kʼoakitsosíni nga i̱ kuixoán kʼianga kʼoétsʼoaa: “Chʼa̱sjentjaináijin tʼatsʼe je xi tsʼen” (Mateo 6:13, TNM). Je kjoabʼetsʼoa basenkaoná nga nda sʼe tokoán. Je Alona itso: “Kʼianga fane je sirena, bʼetsʼoale Niná nga katabasenkaona nga tsín tsokjoan. Kʼoa je xʼinna nchjaana teléfono kʼoa bʼetsʼoaníjin. Kui xi basenkaona nga nda sʼeni tokoan”. Kuijin nga kʼoatsoni je Biblia nga “je Jeobá chrian tíjnale ngatsʼi xi je básjai, ngatsʼi xi ñaki kjoaixi nga básjai” (Salmo 145:18).

KJOANDA XI CHOYALEE NICHXIN XI NROAJÁN

Kʼianga tsakakóya Jesús ya jngo jko̱nindo kʼoakitsole chjotale nga i̱sʼin katabʼétsʼoa: “Katjinroa kjoatéxomali”, xi tsonile, je Chjotaxále Niná (Mateo 6:10). Jé Chjotaxá jebi xi ñaki tondiaa kjoaʼaxin ngayeje kjoa xi nʼio nikjáojiaan. Je Jesucristo, xi “Chjotatítjon xi tsʼe Kjoanyʼán” ʼmile, jé Niná kiskoejin nga “kjoaʼaxin kjoajchán ngakjijnda sonʼnde” (Isaías 9:6; Salmo 46:9). Je Niná “kʼoendajinle kjoa je naxinandáʼndí [...]. Alikui tiskaanni je naxinandáyʼai kao xi kjaʼaí naxinandáyʼai kʼoa ni tʼatsʼe kjoajchánjinla tiskótʼayani”. Xi ijngosani, “liʼya xi tikuinyaxkónnile” je chjota (Miqueas 4:3, 4). Ngatsʼi familia “kʼoenda niʼya kʼoa yaa koatioʼya; kʼoa kʼoentje xka̱totsee kʼoa je ski̱ne tole” (Isaías 65:21). Kʼoa “nijngojin xi ya kʼoéjna kʼoakuitso: Timʼeña” (Isaías 33:24).

Ninga nʼio nda nikuindaa yaoná ndʼaibi, alikui ma bʼechjoalee ngayeje xi faʼainená (Eclesiastés 9:11). Tsakui nichxin toyakjoan tiyoaa kʼiatsa tjín xi koa̱n. Xi ijngosani, tojo kjima ngantsjai tjíomʼee xi toxkia ʼndíchjota xi totʼatsʼe je kjoajchán, je kjoatsʼen kao chʼin. Tonga a tjínle kjoachoya ʼndíchjota jebi.

Miyón chjota ni̱kjaʼáyanile kʼoa tojé Niná xi be jotjín mani. Ndʼaibi joxi yaa tjíosíkjáya ya jinkjoafaʼaitsjenle Jeobá saʼnda nga kuicho nichxin nga kjoaʼáyanile “ngatsʼi xi tjío ya nyʼoákʼen” (Juan 5:28, 29). Xi tʼatsʼe kjoachoya jebi, je Biblia kʼoatso nga nʼio síkʼéjna je kjoabijnachonná “joni tsa jngo ki̱cha̱ʼba̱” xi síkʼéjnanʼio jngo chitso (Hebreos 6:19). Kʼoa je “Niná kitsjoale kjoakixi ngatsʼi nga kisikjaʼáyajinle kʼen Jesús” (Hechos 17:31).

Je nichxin xi tiyoaa ndʼaibi kʼoati sakʼoa nʼio síkjáojin ninga je chjota xi bʼénele yaole nga síxále Niná. Je xi tjíobinyakao je Paul, Janet kao Alona nga tsín nʼio síkjáojin kuinga kosonnile jmeni xi sʼín, nga bʼétsʼoale Niná nga katatsjoánganʼiole kʼoa nga ñaki makjainle jmeni xi tso Niná nga sʼin nichxin xi nroaján. Kʼoa kʼoati kui xi koasenkaoná tsanda ñá. Je Biblia itso: “Je Niná xi tsjoá kjoachoyakaokjoa, katasítseno kao ngayije kjoatsjoa, kʼoa kao kjoanyʼántakon” (Romanos 15:13).