XI NGISA TÍNCHJA̱NI REBISTA JEBI: JÓSʼIAAN NGA TSÍN NʼIO SI̱KJÁOJIAAN

Nʼio síkjáojin chjota ngakjijnda sonʼnde

“Kui kikatse tsojmi xi ma chine, tonga to galletasa kisokona kʼoa toxkia nʼio chjí koan. Kʼoa nga koannyaonni, toje lijme xi tikisʼeni.” (Paul, Zimbabue)

“Je xʼinna kʼoakitsona nga tsjiónkonnajin. Ñaki jekuiyá koanna. Kui kisikjaʼaitsjen jókoa̱nni ʼndíxtinajin.” (Janet, Estados Unidos)

“Kʼianga fane je sirena, kjitʼanangi batejnaʼma kʼoa bajnatsʼotjenña jokji tse nga tsao bomba. Kʼoa nkjín ora bʼatsé.” (Alona, Israel)

Chjota jebi nʼio tísíkjáojin xi tʼatsʼe kjoajchán, nga ma̱ tjío je chjota, je chʼin kʼoa kao kjoa xi bitjatojiaan

Nichxin xi tiyoaa ndʼaibi nʼio tse kjoa tísʼe, nʼio ñʼai kjimachon (2 Timoteo 3:1). Nʼio nkjín chjota xi síkjáojin xi tʼatsʼe tao̱n, xi tʼatsʼe kjoajchán, xi tʼatsʼe je chʼin xi tíbʼatsen kao tʼatsʼe je kjoaxkón xi tísʼe. Kʼoati tjío kjoa xi makjáojinná nga jngó jngoá. Tobʼelañá, tjín chjota xi síkjáojin tsa tojña kʼoakuitsole chjinexki nga cáncer jetjínle. Kʼoati tjío chjota xi kui síkjáojin josʼin koatio xtile kʼoa tsa xtindaile nichxin xi nroaján.

Likui tongantsjai nga chʼao síkaoná nga nikjáojiaan, jolani kʼiatsa examen kʼoéndaa, tsa chjota kuinókjoayajinlee kʼoa tsa xá kjuinkjasjee. Kʼiatsa tochoa̱le kji si̱kjáojiaan, saʼnda basenkaoná nga nikuindalee yaoná jmeni xi xkón sikʼéjnaná. Tonga tsa toxkia nʼio si̱kjáojiaan, sikiʼaonná. Chriansʼaa nga tsʼato jankan kaoni jin jmi chjota xi jejchínga kichotʼa, kʼoa tsaʼyale nga tochoa nichxin batio je chjota ninga tosʼa choa kjoanikjaojin sʼele. Kuijin nga kʼoakitsoni je Jesús nga tsín ʼya xi koa̱nle sitseyasa jotjín nichxin kʼoéjna ninga nʼio sikjáojin. Kʼoatjín, ninga toxkia nʼio si̱kjáojiaan alikui ngisa tse kuiyoaa. Je Jesús kʼoakitso nga tsín si̱kjáojiaan (Mateo 6:25, 27). Tonga a koaan nga tsín nʼio si̱kjáojiaan.

Jaon koa̱nní, tonga tjínnele chósonnilee jmeni xi sʼian, nga kʼoétsʼoalee je Niná nga katabasenkaoná kʼoa nga ñaki katamakjainná jmeni xi tso nga sʼin. Je xi fisani kui jchaa jósʼin tsakinyakao jebi je Paul, Janet kao Alona. Ninga tsínkui kjoa tibitjatojiaan ndʼaibi xi nʼio ñʼai tjínle, alikui ʼyaa kʼiani nga kui kjoa kuitjátojiaan nyaonli jngili ján.