A toyaa tjen fetʼa kʼianga jebiyaa

A koaan kjoaʼáyanile je kʼien

JE BIBLIA ITSO: “Kjoaʼaí ora kʼia nga je ngatsʼi xi tjío ya nyʼoákʼen kjuinrʼoéle jta̱le [Jesús]. Kʼoa kuitjoni ngatsʼi” (Juan 5:28, 29).

Je Jesús tongini kʼoakitso nga sʼe̱tia je tsjó kʼianga jekoatexoma Chjotaxále Niná i̱ Sonʼnde. Je Fernando, xi kanikʼaxkiaa ya kjoaʼmiya xi títjon, itso: “Tokʼoakoanna kʼianga jetsakʼexkia jotso Juan 5:28, 29. Kisʼena kjoachoya kʼoa ñaki nda kisʼe tokoan tʼatsʼe nichxin xi nroa”.

Je Job, jngo choʼndale Niná xi kixi koan, kui kiskoyale je nichxin kʼianga sikjaʼáyanile je Niná. I kitso: “Tsa jngo chjota kuiyá, a koaan kʼoéjnakon ijngokʼani”. Kʼoa ñaki tjínjngo kon nga kʼoakitso je Job nga̱ i kitso nga jekoanni: “Skoyaña jokji tse nga ni̱kʼéjnanʼiona [xi kitsonile jokji tse koájnaya ya tsjó], saʼnda nga ni̱kʼéjnandaina. Kuinókjoaní kʼoa kjuinrʼoele” (Job 14:14, 15).

Je Marta xi ndichja koan Lázaro, be kʼianga sʼe̱ kjoafaʼáya. Kʼianga kʼien je Lázaro, je Jesús i kitsole: “Kjoaʼáyanile ndsʼai”. Kʼoa Marta i kitso: “ʼBenía nga kjoaʼáyanile kʼia nga kuichokjetʼa nichxin”. Kʼoa Jesús kitso: “An nía xi sikjaʼáya, kʼoa an nía xi kjoabijnachon. Je xi makjainle tʼatsʼan, nda tsa kʼen, kʼoéjnakonní” (Juan 11:23-25). Xijekoan, je Jesús kisikjaʼáyale Lázaro. Jme xi koan nga kʼia, basenkaoná nga majinná jokoa̱n nichxin xi sʼa nroa. Nʼiojin tsjoa sʼe̱ tokoán kʼianga miyón koa̱nni je chjota xi kjoaʼáyale jngo tjíjtsa Sonʼnde.

A sʼee chjota xi ya ngʼajmi kjoaʼáyale

JE BIBLIA ITSO: Je kjoafaʼáyale Jesús likui mangóson kao xi jin kjoafaʼáya síkʼaxki̱ je Biblia. Ánni. Kuinga je xi jin chjota i Sonʼnde jaʼáyale. Tonga je Biblia itso xi tʼatsʼe kjoafaʼáyale Jesús: “Kimi ngʼajmi Cristo. Tíjnatʼa ngakixile Niná” (1 Pedro 3:21, 22). A toje Jesucristo xi ya ngʼajmi jaʼáyale. Je Jesús i kitsole je chjotale: “Tsa kjuía, tsa sindachonno ʼnde, kjoaʼai ngindiania. Skoétjaono tʼatsʼan, jméni nga kʼoati jon ya kuiyosínio, jña nga tijna nga an” (Juan 14:3).

Je Jesucristo kʼianga ki ngʼajmi yaa kiskoya kʼale je chjotale nga kʼoati ya koai. Je Biblia kʼoatso nga jngo siento kao ñachanño jmi mani chjota xi ya koai ngʼajmi (Apocalipsis 14:1, 3). Jmé xi sʼin ya ngʼajmi je chjotale Cristo xi ya koai.

Nʼio tse xá sʼe̱le. Je Biblia itso: “Jó tondale, jó totsje, je xi kʼoakaotʼale nga kjoaʼáyatítjonle. Je kjoabiya xi majaoni likui tjínle nganʼio xi tʼatsʼe nga je. Tosa naʼmile Niná kao xi tsʼe Cristo koa̱n. Koatexomakao jngo jmi nó” (Apocalipsis 20:6). Ngatsʼi xi ya koai ngʼajmi rey koa̱n kʼoa naʼmi koa̱n kao Jesús, kʼoa jé koatexomason jngo tjíjtsa Sonʼnde.

A sʼee chjota xi i̱ Sonʼnde kjoaʼáyale

JE BIBLIA ITSO: Itso je én xi kiski je pastro Pablo: “Kʼoasʼin tikoyale xi tʼatsʼe Niná nga kjoaʼáyale xi kʼen, nda tsa kao chjota xi tjínle kjoakixi, kao chjotatsʼen” (Hechos 24:15).

ʼYáni je “chjota xi tjínle kjoakixi” kitsole je Pablo. Tobʼelañá, jngo choʼndale Niná xi kixi koan xi Daniel tsakʼin, i kitsole Niná nga tojeme kuiyá: “Si̱kjáyaní, tonga kuisenndoní nga kuichokjetʼa je nichxin nga kʼoaili kjoatjaoli” (Daniel 12:13). Jñáni kjoaʼáyale je Daniel. Je Biblia itso: “Je xi kixi tsʼee koa̱n sonʼnde, kʼoa i koatioson ngantsjai nichxin” (Salmo 37:29). Kʼoa je Jesús i kitso: “Jó tondale je xi indajin, nga̱ jé xi skoékjoatjao je sonʼndebi” (Mateo 5:5). Joni tsa Daniel kʼoa kao xi ngikʼa choʼndale Niná i Sonʼnde kjoaʼáyale kʼoa koaan koatio ngantsjai nichxin i̱ Sonʼnde.

ʼYáni je xi “chjotatsʼen” kitsole je Pablo. Jéní chjota xi jmi miyón mani xi tsínkʼia tsabe je Énle Niná kʼoa xi tsín kʼoasʼin kikao yaole jotso je Énle Niná. Kʼianga kjoaʼáyale, kʼiaa sa̱kóyale xi tʼatsʼe Jeobáa kao Jesús (Juan 17:3). Je xi Jeobá sixále koatio ngantsjai nichxin, joni tsa Jeobá.

Jókoa̱nchon i̱ Sonʼnde

JE BIBLIA ITSO: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male” (Apocalipsis 21:4). “Kʼoenda niʼya kʼoa yaa koatioʼya; kʼoa kʼoentje xka̱totsee kʼoa je ski̱ne tole” (Isaías 65:21).

Tikjaʼaitsjenlai jokji tsjoa sʼe̱li nga kʼoasʼin kuijnai ji kao xíngi xi kjoaʼáyanile. Tonga, jósʼin ʼyañá nga kjoaʼáya kjoaixile je xíngiaa xi jekʼien.