XI NGISA TÍNCHJA̱NI REBISTA JEBI
ʼYá chjotani je testigole Jeobá
“Jenkjín nó ʼbexkoan je Mike. Testigole Jeobání, tonga likui machoyana xi tʼatsʼe relijiónle. ʼYáni xi Jeobá ʼmi. Ánni nga tsín batíoni sʼuí je testigole Jeobá. Xi koankjáojinna kui tsa secta tíjnajinle je Mike.” (Becky, xi California, Estados Unidos tsʼe)
“Kʼianga je chjota ndaindʼiana kiskotʼaya Biblia kao je testigole Jeobá, i kixian: A sasénle nga kʼoakʼuín jngo relijión. Jósʼin tsoyanile nga kʼoaʼmi.” (Zenon, xi Ontario, Canadá tsʼe)
“Kʼoasʼin kisikjaʼaitsjen kao je chjoónna nga tokui xá jaʼaikonninajin je testigole Jeobá nga tsín nda tinʼiaijin nga tsín mangínjin yo̱ngo̱. Xi kʼoati kinikjaʼaitsjainjin kuinga tsa tsín tsakʼéjngo tokuinjin je xi ñaki relijión, a tokui kʼoejngo tokuijin je secta xi tsʼe testigole Jeobá.” (Kent, xi Washington, Estados Unidos tsʼe)
“Xi kjoaixi, alikui ʼbe ʼyá chjotani kʼoa jmé xi makjainle.” (Cecilie, xi Esbjerg, Dinamarca tsʼe)
Tsakui nichxin ʼyai nga xki̱ niʼya tsoyason je testigole Jeobá, nga tsoya ya yandiaa, nga tsjoále xo̱n xi Énle Niná faʼaitʼa je chjota kʼoa nga kʼoatsole chjota nga tokjoatjao kuitsoyale je Biblia. Tsakui nichxin kʼoatisʼin nikjaʼaitsjain jotso je chjota xi jekanikʼaxkiaa kʼoa tsakui nichxin chjonangilai yaoli ʼyákjoánni je testigole Jeobá.
Jméni xi sʼiain tsa meli jchai xi tʼatsʼe testigole Jeobá. Jósʼin jchani jméni xi makjainle, jñá nroani tao̱n xi kjimachjén kʼoa xi bʼéndani ndʼia jña kotʼaya kʼoa ánni nga ya bichóni niʼyali kʼoa tsa ya yandiaa fákaonili je Énle Niná.
Je Cecilie, xi jenása kanikʼaxkiaa itso: “Nʼio tse tsakʼexkia xi tʼatsʼe testigole Jeobá ya Internet. Nkjín koya jmeni xi tsakʼinna xi tʼatsʼe kʼoa ñaki chʼaosʼin kisikjaʼaitsjen tʼatsʼe testigole Jeobá”. Tonga nga jesoa testigole Jeobá tsakjákao tsabe jokjoantjínni xi tʼatsʼe.
Tsa mesali jchai xi tʼatsʼe testigole Jeobá. Koaan jesoa chjónangilai. Jé bʼasje rebista jebi kʼoa jé xi ngisa nda kuitsoyali tʼatsʼe jmeni xi meli jchai (Proverbios 14:15). Je kjoaʼmiya xi ngikʼa yaa kuitsoyasa xi tʼatsʼe testigole Jeobá. ʼYá chjotani, jméni xi makjainle kʼoa jméni xi sʼín.