Jñá tínroani je tao̱n xi kjimachjén

Nga xki̱ nó siento miyón Biblia kao xo̱n xi Énle Niná faʼaitʼa chʼasjaijin kʼoa nikʼabísuinjin. Tjíonajin sucursal jñani kjimaxá kʼoa tibʼendaníjin xi sʼa chjotse, kʼoa kʼoati tjíonajin imprenta jngo tjíjtsa Sonʼnde. Siento jmi mani je jtín xi tjío kʼoa ndʼia jñani biyojtínjin likui síxkónkjoan kʼoa Ndʼia jña kotʼaya je Testigole Jeobá ʼmi. ʼYáni xi bʼéchjí ngayeje jebi.

Je tao̱n xi kjimachjén yaa nroani jotjín nroajin ni̱ma̱ná nga batioá (2 Corintios 9:7). Kʼianga nó 1879, je rebista xi koanjaoni kitjo xi Zion’s Watch Tower ʼmi nga kʼia, i kitso: “Jé JEOBÁ títsjoánganʼio nga tíbitjo [rebista jebi] kʼoa nga je títsjoánganʼio likuikʼia tao̱n sijéson kʼoa ni chjotajinla sijéle nganʼio”. Saʼnda ndʼaibi tojo kʼoakjima.

Tsa mená kʼoee je tao̱n, koaan ya si̱kasén ya sucursal kʼoa tsa maije̱ kʼoati ma ya satíoya ya kaxa̱ xi tjío ya Ndʼia jña chotʼayaijin. Alikui diezmo nijáijin kʼoa alikui tao̱n bʼeñaijin kʼoa likui nikʼéchjíjin tsa jme xi nʼiaijin kʼoa alikui batenaijin je xo̱n xi nikʼabísuinjin. Alikui ʼya xi bʼéchjínajin nga ʼmiyasuinjin kʼoa nga ʼmiyaijin ya jinjtín kʼoa tsa kʼiaje̱ nga bʼendaijin Ndʼia jña ʼyaxkuínjin Niná. Je Jesús i kitso: “Tokjoatjao kitsʼaino, tokjoatjao tʼainio” (Mateo 10:8). Ngatsʼi xi ya síxá ya oficina xi tíjnatítjonnajin kʼoa kao xi ya síxá sucursal xi tjíonajin, alikui machjíle. Kʼoati likui machjíle je xi bándiaale je testigole Jeobá je xi Cuerpo Gobernante ʼmi.

Je tao̱n xi maxkó kʼoati ya machjén jñani kjoaxkón bichó. Je chjotale Cristo xi títjon tsakatio tsakinyakao je xi kjoa jaʼatojin (Romanos 15:26). Kʼoati tinʼiaijin ndʼaibi, binyakaoníjin je xi kjoaxkón bichóne, bʼendayaníjin je ndʼiale kʼoa bʼailaijin xi kjine kao najño xi bʼakjá kʼoa nixkilaijin. Kʼoati bʼendayaijin Ndʼia jña chotʼayaijin, je xi chʼao makjoan kʼianga kjoaxkón ma.