Jósʼin basenkaoná nga bʼetsʼoaa

Tsa jmeni xi mená sʼiaan, tsakui nichxin i̱ bixoán: “Jósʼin koasenkaona”. Tsakui nichxin kʼoati kuixoán tʼatsʼe kjoabʼetsʼoa: “Jósʼin koasenkaona nga kʼoetsʼoa”. Toxá sakʼoaa kʼoabixónñá, saʼnda je choʼndale Niná xi Job tsakʼin i kitso: “Tsa kuinchjale, a kuinchjana” (Job 9:16).

Ya kjoaʼmiya xi jejaʼato yaa tsakakóyaná nga tsín tsa tokuijin nga relijión tiyojiaan nga bʼetsʼoañá kʼoa tsa tokuije̱ nga nda sa̱tío tokoán. Je Niná nrʼoéná kʼianga bʼetsʼoaa. Kʼiatsa kʼoasʼin kʼoétsʼoalee josʼin mele kʼoa tsakui si̱jélee jmeni xi ndatjín, nrʼoéná. Kʼoatsoná nga si̱chriantʼalee (Santiago 4:8). Jókoa̱n kʼiatsa kjitʼa kʼoétsʼoaa. Kataʼyala.

Kjoanyʼán

Jósʼe tokuin kʼianga kjoa bitjatojin, a nʼio nikjáojin. Je Biblia kui kjoafaʼaitsjen jebi tsjoáná: “Tʼetsʼoao ali nichajinjion ngantsjai” kʼoa “kʼoasʼin katasʼejinle Niná jme xi nijáo” (1 Tesalonicenses 5:17; Filipenses 4:6). Tsa si̱jélee nganʼio Niná koasenkaoná nga̱ je Biblia itso: “Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno” (Filipenses 4:7). Ngisa nda satío tokoán kʼianga kʼoaʼmilee je Niná jotjín ni̱ma̱ná. Kʼoa je Niná mele nga kʼoasʼiaan nga̱ je Biblia itso: “Jesoa Jeobá tikʼami je chʼáli, kʼoa jé koasenkaoli” (Salmo 55:22).

Jngo tjíjtsa Sonʼnde nʼio nkjín chjota xi nyʼán satío kon kʼianga bʼétsʼoa. Jngo chjoón xi Hee Ran ʼmi xi Corea del Sur tsʼe itso: “Ninga nʼio ñʼai kjoa faʼatojian, kʼianga bʼetsʼoa nda sʼe tokoan kʼoa alikui kui síkinroajen tokoan”. Kʼoa je Cecilia xi Filipinas tsʼe itso: “Nʼio sikjáojian tʼatsʼe xtiyánchjínna. Kʼoa kʼoati an tisikuinda je na̱na, kʼoa saʼnda tsín tibenina. Kʼianga bʼetsʼoa basenkaona nga jngó jngó nichxin nga nda sʼe tokoan. ʼBeña nga je Jeobá koasenkaona nga sikuinda je xtina kao je na̱na”.

Xi basenkaoná kʼianga kjoa bitjatojiaan

A nʼio tse estrés tjínli, a nokjonní tsa jme xi koa̱nli axo nʼio ñʼai tjín kjoa tibitjatojin. Kʼiatsa kʼoétsʼoalai je “Niná xi tsʼe ngayije kjoanijetakon” nda sʼe̱ tokuin. Je Biblia kʼoatso nga je Niná basenkaoná nga kjoañʼai bitjatojiaan (2 Corintios 1:3, 4). Tobʼelañá, ñandia kʼianga nʼio tísíkjáojin je Jesús “tsakasenxkónyʼin” kʼoa tsakʼétsʼoaa kʼoa kʼiaa tsʼatsen “jngole ánkje xi tsʼe ngʼajmi, xi kitsjoale nganʼio” (Lucas 22:41, 43). Kʼoa je Nehemías, xi kʼoati kixi koan, kʼoati tse kjoa jaʼatojin nga̱ je chjota kʼoakitsole nga tsín tixále Niná katasʼínni. Je Nehemías i kitsole Niná kʼianga tsakʼétsʼoale: “Tinʼiojinnái”. Jmeni xi koan nga koanskanni kui bakó nga tsakasenkao Niná nga tsín tikitsokjonni kʼoa koan kʼoakisʼin xá xi kisʼenele (Nehemías 6:9-16). Je Reginald, xi Ghana tsʼe, itso: “Kʼianga bʼetsʼoa, ngisa kʼianga ñʼai kjoa faʼatojian, nda sʼe tokoan nga̱ jé tifakaonajmía je xi koa̱nle tsjoánganʼiona kʼoa xi basenkaona nga tsín tsokjoan”. Tojosʼin tiʼyaa, kʼiatsa kʼoétsʼoalee Niná jé koasenkaoná.

Je kjoachjinele Niná

Jmeni xi nʼia sakʼoaa kjaʼaísʼin síkatíoná, ñá kʼoa kao familianá. Jméni xi sʼiaan nga tsínkui xi chʼaotjín chjoéjiaan. Je Biblia itso: “Tsa jngo xi jon xi chale kjoaʼisentakon [ngisa tsa jngo kjoa xi ñʼai tjín tífaʼatojin], katasíjéle Niná, je xi kjaínga tse tsjoákjoatjaole ngatsʼi” (Santiago 1:5). Kʼiatsa si̱jélee Niná kjoaʼisentakon, xi tsonile, kjoachjine, je Niná kui nganʼiotsjele sichjén nga koasenkaoná nga ndatjín xi chjoéjiaan. Je Jesús kʼoakitso nga tsjoáná Espíritu Santo je Niná kʼiatsa si̱jélee (Lucas 11:13).

Saʼnda je Jesús jé Nʼaile kisijéle nganʼio kʼianga jme xi kisʼin. Kʼianga kiskoejin xi tejao pastrole je Jesús tsakʼétsʼoale Niná tsʼajnda nitje̱n (Lucas 6:12).

Tojo kisʼin je Jesús, nʼio nkjín chjota xi nda sʼe kon kʼianga be jósʼin basenkao je Niná nga ndatjín jmeni xi kjoejin. Je Regina, xi ya Filipinas tíjna, kʼoatso nga nʼio tse kjoa tífaʼatojin, tojé tíbajngiʼa familiale nga̱ jekʼien xʼinle, kisicha xále kʼoa tojé tísíjchá je xtiyánchjínle. Jméni xi tsakasenkao nga ndatjín jmeni xi kiskoejin. Je Regina itso: “Kui xi basenkaona nga bʼetsʼoale Jeobá”. Je Kwabena, xi ya Ghana tíjna, kʼoatso ánni nga nganʼio síjénile Niná, itso: “Nda njena tsakai jñani tisixá, tonga kisichaña xána. Kʼianga kisikjaʼaitsjen jme xá xi sʼian, jé Niná kisijéle nganʼio nga katabasenkaona nga nda skoejian jme xá xi sʼian. Alikui jao tjínna nga je Jeobá tsakasenkaona nga kui kiskoejian jngo xá xi tsjoáʼndena nga bajngiʼa yaona kʼoa bitjosonna je xále Niná”. Kʼoati koasenkaoli Niná kʼiatsa si̱jélai nganʼio nga̱ kui xi meli nga tosi tonda ndasʼin kuijnai ngixko̱n.

Tojngo jaola choa̱ kanikʼaxkiaa josʼin basenkaoná kʼianga bʼetsʼoaa. (Chótsenlai rekuadro xi “Jmé kjoanda xi sokóná kʼianga bʼetsʼoaa” tso.) Nga koasenkaoná je kjoabʼetsʼoa, machjén nga jchaxkoaan je Niná kʼoa jmeni xi tongini kʼoatsoná. Tsa meli jchai xi tʼatsʼe jebi, koaan kʼoatʼinlai je testigole Jeobá nga katatsoyali je Biblia.a Kui xi koasenkaoli nga si̱chriantʼalai je Niná, xi nrʼoéná nga bʼetsʼoalee (Salmo 65:2).