Jósʼin koasenkaoli nga kʼoétsʼoai

Kʼianga kitjochʼinle je Pamela kikonle je chjinexki. Tonga kʼoati tsakʼétsʼoale je Niná kʼoa kisijéle nganʼio nga chókjoajinle je kjoa xi tíjnajin. A tsakasenkao nga kʼoasʼin tsakʼétsʼoa.

Itso: “Jokji tse kisixkia nga cáncer tjínna, tjín nichxin nga kitsokjoan. Tonga kʼianga tsakʼetsʼoale je Jeobá nda kisʼeni tokoan kʼoa ngisaa nda kiskosonnile josʼin kisikjaʼaitsjen. Tojo tíbʼetʼana chʼin, tonga basenkaona kʼianga bʼetsʼoa. Kʼianga kjonangina je chjota jósʼin tijnaña, i xinle: Ninga chʼin tjínna, tsjoa tjín tokoan”.

Ali tokʼiajin nga nʼio táo chʼin tjínná kʼoa tsa tse kjoa kuitjátojiaan nga kʼoétsʼoalee je Niná. Ngatsʼiñá nga kjoa bitjatojiaan, ni choa kʼoa ni tse, kʼoa nganʼio machjénná nga chókjoajinná. A basenkaoná nga bʼetsʼoaa.

Je Biblia itso: “Je Jeobá tikʼami je chʼáli, kʼoa jé koasenkaoli. Nikʼiajinla tsjoáʼnde nga ska̱ je xi chjotakixi” (Salmo 55:22). Nʼio tsjoánganʼioná én jebi. Jósʼin basenkaoná nga bʼetsʼoaa. Kʼianga kʼoasʼin kʼoétsʼoalee je Niná josʼin sasénle, koasenkaoná nga chókjoajinná je kjoa xi kuitjátojiaan (chótsenlai je recuadro “Josʼin basenkaoná nga bʼetsʼoaa”).

Josʼin basenkaoná nga bʼetsʼoaa

Nyʼán sʼe tokoán

“Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno nga̱ tiyokao Cristo Jesús” (Filipenses 4:6, 7). Tsa kʼoéyanajmílee je Niná jmeni xi makjáojinná, koasenkaoná nga nyʼán sʼe̱ tokoán kʼoa nga nda si̱kjaʼaitsjeen jmeni xi sʼiaan ninga kjoa tibitjatojiaan.

Kjoachjine

“Tsa jngo xi jon xi chale kjoaʼisentakon, katasíjéle Niná, je xi kjaínga tse tsjoákjoatjaole ngatsʼi, kʼoa likui taon be. Kʼoasʼin kʼoaile” (Santiago 1:5). Kʼianga tse kjoa tiyojiaan sakʼoaa tsín nda chosonnilee jmeni xi nʼia. Tonga tsa si̱jélee kjoachjine je Niná, koasenkaoná nga kjoaʼaítsjenná jmeni xi tso je Biblia.

Nda sʼe tokoán kʼoa tjonganʼioná

“Je nganʼio xi nʼio tse tsʼe Niná ní” (2 Corintios 4:7). Jé Jeobá xi ngisasa tse nganʼio tjínle, jé tsjoánganʼioná kʼianga chókjoajinná je kjoa xi bitjatojiaan (Isaías 40:29). Ya Biblia kʼoatso nga jé Jeobá “Niná xi tsʼe ngayije kjoanijetakon, xi síjekonná ngayije kjoañʼainá” (2 Corintios 1:3, 4).