Jósʼiaan nga katamanganá tsa xin jtín koanngían

JE Allen itso: “Kʼianga xin jtín kʼia, ñaki kitsokjonña. Alikui ʼbe tsa so̱kona miyo kʼoa tsa nda koaikaona je ndsʼee”.a Je Allen yaa títsjoánganʼio ya jngo jtín xi tsʼato 1,400 kilómetro kjin tíjnanile niʼyale.

Kʼiatsa chriansʼa xin jtín kʼin kʼoajinti tjín tokuin. Jméni xi koasenkaoli nga koa̱nngali. Jméni xi koa̱n sʼiain kʼiatsa ñʼai kjimangali. Kʼiatsa tsínlani ji xi xin jtín kʼin, jósʼin kʼoainganʼiolai je ya bichó ya jtín jña tijnani.

JÓSʼIAAN NGA KATAMANGANÁ

Kʼianga xin sʼentje ijngokʼa jngo yá ñʼai mangʼani. Kʼianga ngisa nda koa̱nntje ti ja̱ma̱le, kʼoa nga maskanni bʼéjtsʼén ijngokʼa je ja̱ma̱le. Kʼoatisʼinni, kʼianga xin jtín mangían kʼoati ñʼai manganá. Ya jtín jña tijnai tsakai, jejin koanngali jmeni xi nʼiai, kisʼejinli miyo kʼoa tojejin ʼyai josʼin tinixálai Niná. Tjínnejinle nga koa̱nnga ijngokʼali jñani kuichui. Jmé xi koasenkaoli. Kʼiaa nga kʼuíntjenngi je kjoafaʼaitsjen xi tsjoá Énle Niná. Kataʼyala kʼaa je kjoafaʼaitsjen jokoa̱n sʼiaan.

Je chjota xi nyaon nyaon bʼéxkia je Énle Niná yaa mangóson “jngo yá xi ya sénndai ya xo̱ngánandá, xi bale to kʼianga bichóka cha̱nle kʼoa xi tsín xí xka̱le, kʼoa tojmeni xi sʼin nda kuichotsjoá” (Sal. 1:1-3).

Tojo ma je yá nga nandá machjénle nga xkoén katamakjoan, kʼoatisʼinni je chjotale Cristo, machjén nga kjitʼa skótʼaya je Énle Niná kʼianga taja sa̱tío je kjoamakjainle. Kuinga nyaon nyaon tʼexkiasíni je Biblia, tʼin je kjoajtín xi satíoná, chótʼayajtíon je Énle Niná ya niʼyali kʼoa nga toji. Tikjaʼaitsjain nga tjínnele tojo kʼoasʼiain jmeni xi nʼiai tsakai nga ngisa nʼio sʼe̱jna je kjoamakjainli xi kao Jeobá.

“Je xi tsjoánganʼiole xi kjaʼaí kʼoati kʼoainganʼiole” (Prov. 11:25).

Kʼiatsa kjitʼa kʼuínyasuin ngisajin ngotjo koa̱nnganili kʼoa ngisajin tsjoa sʼe̱ tokuin. Je Kevin, xi chjotajchínga sʼin tíjna i tso: “Je xi tsakasenkaonajin kao chjoónna kuinga precursor auxiliar sʼin kinixáijin kʼianga tosʼa choatse nga kichuijin”. Kʼoa itsosa: “Sasa tsaʼyaxkonnijin je ndsʼee, xi precursor sʼin tjíosíxá kʼoa kao je ʼnde jña tsoyason”. Je Roger, je xi tsʼato 1,600 kilómetro kjin tíjnale jñani tsʼe, itso: “Kʼianga ngisa ngotjo manganiná ya jtín jñani mangían kuinga kjitʼa bitjokʼinyasoán. Kʼoati koa̱n kʼoakʼuínlai je xi chjotajchínga sʼin tjío nga tijnandai nga kʼoainganʼiui jme xá xi tjín jolani nga matsje je Ndʼia jña chotʼayá, tsa ji kuitjángajaolai je ndsʼee xi tsín kʼoamale nga faʼa sakʼoa jmeni xi bʼakaole ya jinjtín kʼoa tsa kʼuínkoai je ndsʼee xi tsín tichókjoanile nga fi je kjoajtín. Kʼianga skoe̱ je ndsʼee nga nitjosuin tojme xá xi sʼeneli, kjitʼajinnangi simiyoli”.

“Titseyao ni̱ma̱no” (2 Cor. 6:13).

Nʼio machjén nga tjao katamaná ngatsʼi ndsʼee. Kʼianga xin jtín kikatio je Melissa kao familiale, tsakásjai josʼin kisimiyo je ndsʼee, itso: “Tongini nga kjesa fitsʼiajin kʼoa nga jefetʼa je kjoajtín, kinimiyoníjin je ndsʼee. Koaan kichobanajmíjin ʼndele nga tokinitiʼndaijin kʼoa nga tokinixatʼaijin je ndsʼee”. Nga kʼoakisʼin, ngotjo kisʼejinkonni je jaʼaínle nga jngó jngó ndsʼee. Nda kiskoeya kʼoa kʼoasʼin koanmiyoni. Melissa itsosa: “Tsakʼaingañálaijin xíngijin je número xi tsʼe teléfononajin. Ánni nga koa̱n kuinchja̱ninajin tsa jme xále Niná xi sʼin kʼoa tsa jmesani xi sʼiainjin”.

Tsa ñʼai mali nga chjakaonajmí xi kjaʼaí, koaan i̱ tʼiain, tobʼelañá, koaan kuijnokoai ninga tsín meli kuijnui, kʼiatsa kʼoasʼiain sichrianli xi ngikʼa. Tojo tso je Biblia kʼianga ʼya xi bijnokaoná, tsjoa sʼená (Prov. 15:30). Je Rachel xi kjin kikʼejnale jñani tsʼe, itso: “Alikui ngana nga fakaonajmía xi kjaʼaí”. Kʼoa itsosa: “Sakʼoaa tobʼenele yaona nga fakaonajmía je ndsʼee xi ya tjío ya jtín jña tijna ndʼaibi. Je fikatejnatʼale je xi tsín ʼya xi tífákaonajmí, tsakui nichxin kʼoati tsín tso kon nga ʼya xi fákaonajmí”. Ánni nga tsín kʼoasʼin bʼendajinni nga kjaʼaí kjaʼaí ndsʼee chjakaonajmí kʼianga kje fitsʼiajin kʼoa nga jefetʼa je kjoajtínná.

Xi ijngosani, tsakui nichxin nʼio tsjoa tjínli nga nkjín ndsʼee cha̱xkonsai. Tonga tsa tsínni kʼoasʼin kuichotsjoá josʼin tjínndajinli nga títjon, kʼoa tsín titsjoa sʼe̱nili. Kʼiatsa kʼoakoa̱n, tʼenelai yaoli nga tosi tonda timiyui je ndsʼee.

ÑʼAI MANGANINÁ

Je yá xi xin sʼentje ijngokʼa, tjínkʼa xi ñʼai nroani ja̱ma̱le. Tikʼoasʼinni, alikui tsa tongatsʼiaa nga ngotjo manganiná ya jtín jñani tosʼa bichoaa. Je kjoafaʼaitsjen xi tsjoá Biblia xi chótʼayajiaan ibi, koasenkaoli kʼiatsa jekjoatse kinikʼantjaiyai je jtín jña tijnai tonga tsa kje mangajinli:

“Ali chóbejinná nga nda sʼiaan. Kʼia choa̱le kʼoéxkoá, tsa tsín kuijtaná” (Gál. 6:9).

Kʼiatsa tsínni ndi̱to̱n mangali, ali tokjoánjin xin jtín ʼmi ijngokʼai. Tobʼelañá, nʼio nkjín misionero xi fi Skuela xi tsʼe Galaad xi xin naxinandá nikasén kʼoa nkjín nó faʼato nga fisíxatʼa ijngokʼani ʼndele. Nga kʼoasʼín, kui xi binyakao nga nkjínsa ndsʼee símiyo kʼoa mangale josʼin beni je chjota ya naxinandá jña bichó.

Je Alejandro jekoannkjín kʼa nga xin jtín fikatio. Kʼoa majinle nga tsín ngotjo manganiná. Itso: “Kʼianga kichuijin ya jtín jñani tiyuijin ndʼaibi, je chjoónna i kitsona: Je miyona yaa tjío ya jtín xi ijngo”. Je Alejandro kʼoakitsole je chjoónle nga kʼoati kitso kʼianga tosʼa kicho ya jtín jñani tjío tsakai. Nga jao nó tsakatio ya jtín jña kinroani, je chjoónle nʼio koanndosinle tʼatsʼe ndsʼee kʼoa ʼyani xi tsín bexkon tsakai ñaki miyole koanni.

“A li i̱jin si: Ánni nga ngisa nda tsakiyosíñá nichxin xi jaʼato tikʼoajin ndʼaibi. Kʼianga kʼoasi alikui chjine kjimai” (Ecl. 7:10).

Ali ningósonkaojin je jtín jñani tijnai ndʼaibi kao jñani tsakijnai tsakai. Tsakui nichxin je ndsʼee xi tjío jñani tijnai ndʼaibi, likui nanda nchja̱najmí kʼoa tsa ñaki kʼoatsokixi josʼin síkjaʼaitsjen. Ninga kʼoalani, kui kuenta tʼiain jñani nda sʼín, kʼoatikoai josʼin meli nga si̱kaoli. Tjínkʼa ndsʼee xi xin jtín fikatio xi itso xi kjonangile yaole: “A ñaki tsjoake̱ kjoaixiñá ngatsʼi ndsʼee” (1 Ped. 2:17).

“Tijáo, kʼoa kʼoaino” (Luc. 11:9).

Tosi tonda tijélai nganʼio je Jeobá. Jngo ndsʼee xi chjotajchínga sʼin tíjna, xi David ʼmi, itso: “Ali tsa tojijin chʼai yaoli”. Itsosa: “Tjín jmeni xi tokao nganʼiole Jeobá bitjosonniná, kʼianga bʼetsʼoalee Jeobá, bʼeyanajmílee jmeni xi nikjáojiaan”. Je Rachel xi jenása kanikʼaxkiaa, kʼoatisʼin síkjaʼaitsjen. Itso: “Kʼianga tsín nanda manganajin ya jtín jñani bichuijin, bʼeyanajmílaijin je Jeobá jmeni xi kjimanajin kʼoa nijélaijin nganʼio nga katabasenkaonajin tsa jme xi tsín nda tinʼiaijin xi tísíkjinninajin kao je ndsʼee. Kʼoa ngisaa tse nichxin nikʼayaijin nga ya biyokoaijin”.

Jon xi xijchá mao, kʼiatsa ñʼai kjimangale je ʼndíxtino, tikʼayalao nichxin nga tʼetsʼoao kao je kʼoa tikʼaxkio jmeni xi makjáojinle. Tisenkao nga katasímiyo je ndsʼee kʼoa nga je miyo xi nda sʼín katasʼele.

TISENKOAI NGA KATAMANGALE JE XI XIN JTÍN FAʼAINI

Jméni xi koa̱n sʼiain nga kuisenkoai je xi xin jtín faʼaini. Tʼenelai yaoli nga timiyui. Tikjaʼaitsjain jméni xi meli nga sikaoli je ndsʼee tsa ji xi xin jtín kuichui kʼoa kʼoati tikoai je ndsʼee (Mat. 7:12). A koaan kʼoakʼuínlai nga katafikonno nga chotʼayajtíon je Énle Niná ya yaniʼyano kʼoa tsa kʼianga chotsenlao je programa xi tsʼe JW Broadcasting xi xki̱ sá satío. Kʼoati koa̱n kʼoéndajion nga ñatjen koanngínkʼinyason. Kʼoa tsínjin cha̱jinle je ndsʼee kʼiatsa kuinókjoalao nga ya katafikjenkaono ya niʼyano. A tjín jmesani xi koa̱n sʼiaan nga kuinyakoaa je ndsʼee xi xin jtín faʼaini.

Je Carlos itso: “Kʼianga tosʼa kichuijin ya jtín jña tiyuijin, jngo tichjaa xi kʼoakitsonajin jñani ngisa choa chjíle je tsojmi xi machjénná kʼoa nʼio tsakasenkaonajin nga kʼoakitsonajin”. Tsakui nichxin kʼoati koa̱n kʼoakʼuínlee je ndsʼee jokjoan najño xi koa̱n sichjén jñani ngisa sjeya, tsa ngisa nyʼán chon kʼoa tsa ngisa nʼio bʼa jtsí. Kʼoati koa̱n kʼuínyalee jochon jñani tiyoaa kʼoa josʼin makjainle je chjota, jebi koasenkao je ndsʼee nga ngisa nda skoe̱ josʼin kuitsoyason.

NGA BʼENELEE YAONÁ NDASʼIN BICHÓMANI

Je Allen xi kanikʼaxki̱ná nga fitsʼiani kjoaʼmiya jebi, jesáni tsʼato jngo nó nga ya tíjna ya jtín jñani kicho. Itso: “Nga tosʼa kichoa ya jtín jebi, ñaki tsakʼenele yaona nga tsaʼbexkoan je ndsʼee kao tichjaa. Kʼoa ndʼaibi ñaki jo xíngia sʼin ʼbekoan kʼoa nʼio tsjoa tjínna”. Je Allen kʼoatso nga tsín tísícha je miyole ninga xinlani jtín ki kʼoa ndʼaibi tongisa nkjín miyo tjínle.