A tojo machjénná jme xi tso je Biblia

TJÍNKʼA CHJOTA XI KʼOATSO NGA MAI. Jngo chjinexki xi kʼoakitso kʼianga ya fasjee kjoafaʼaitsjen ya Biblia yaa mangóson kao jngo chjota xi kui síchjén libro xi tsʼe química xi kʼia kitjo nga nó 1920 kʼianga tsoyale je xti. Jngo chjota xi tsín mandosinle tʼatsʼe je Biblia, tsakui nichxin kui skónangili, a kui kʼuíntjenngi jmeni xi tso jngo xo̱nle computadora xi jekjoatse kitjo nga si̱chjáin jngo computadora xi sʼa chjotse. Jebi kui bakó nga nʼio nkjín chjota xi kʼoasʼin síkjaʼaitsjen nga tsín timachjénni je Biblia.

Ánni nga kui si̱chjénsíñá je xo̱n xi jenʼio kjoatse kitjo nga̱ nʼio nkjín koya jmeni xi sʼa kjimatsen chjotse. Xi ijngosani, ya Internet nʼio nkjín koya jmeni xi faʼaitʼa, jolani je kjoafaʼaitsjen xi tsjoá je chjota. Kʼoati tjín programa xi faʼa ya radio kao telebisión jñani chjonangile je chjota xi kui kotʼayason tʼatsʼe jmeni xi koa̱n sʼiaan nga nda si̱jchá yaoná. Kʼoa nʼio nkjín libro tjín xi kʼoati tsjoá kjoafaʼaitsjen tsa jme kjoa tjínná.

Nga nʼio nkjín jmeni xi sʼa kjimatsen chjotse, ánni nga Biblia si̱chjénsíñá nga̱ jeme 2,000 nó tjínle nga kichji. A kʼoatjín jotso je chjota xi tsín mandosinle tʼatsʼe Biblia, nga ya mangóson kao jngo libro xi tsʼe química xi tsín timachjénni kʼoa tsa je xo̱nle computadora xi jekjoatse kitjo. Jmeni xi tso chjota jebi alikui kʼoatjín. Je ciencia kao jmeni xi sʼa kjimatsen chjotse bʼantjaiyaa tonga jmeni xi mele je chjota alikui tíbʼantjaiya. Je chjota kui xi mele nga tsjoa sa̱tío kon, nga tsín jme xi sikjáojin kʼoa nga jtín sʼin koatio kao je familiale kʼoa kao miyole.

Ningalani jenʼio kjoatse kichji je Biblia, nchjani xi tʼatsʼe jebi kʼoa xi kjaʼaísanile. Kʼoati tso nga tʼatsʼe Niná jaʼaini. Tsjoáná kjoafaʼaitsjen josʼin koa̱n si̱jchá yaoná kʼoa jmeni xi koa̱n sʼiaan nga kjoa sʼená (2 Timoteo 3:16, 17). Kʼoa je kjoafaʼaitsjen xi faʼaitʼa basenkaoná ngantsjai kʼoa tsínkʼia cha̱ngi. Je Biblia itso: “Je énle Niná tíjnakon” (Hebreos 4:12).

A kʼoatjín jebi. A tsín timachjénni je Biblia axo nʼio basenkaoná je kjoafaʼaitsjen xi faʼaitʼa. Je rebista jebi kui xá kitjoni nga jchai jotjínni xi tʼatsʼe jebi.