Nga kui xi ndatjín kʼoasʼiaan: Nda kjoafaʼaitsjen tsjoáná je Biblia

Tsa tokui kjuinñá josʼin nikjaʼaitsjeen kʼoa josʼin síkjaʼaitsjen xi kjaʼaí tʼatsʼe xi kixi tíjna, tsakui nichxin likui nda kuichomani jmeni xi sʼiaan. Ya Biblia bʼéyanajmí ánni nga kʼoamasíni kʼoa tsoyaná jméni xi tjínnele sʼiaan nga nda kuiyoaa kʼoa nga nda sʼe̱ tokoán. Jmeni xi tso Biblia ñaki kʼoatjín.

MACHJÉN NGA JE NINÁ KOANDIAANÁ

Ya Biblia kʼoatso nga machjén nga je Jeobáa koasenkaoná, nga̱ tsín tsakui xá koanndañá nga toñá kjoándiaalee yaoná (Jeremías 10:23). Kui xá kitsjoaniná Biblia nga koandiaaná kʼoa nga kui kʼoasʼiaan xi ndatjín. Je Niná tsjoakená, alikui mele nga kjoañʼai chja̱ʼá, mele sikuindaná nga̱ be nga tsín nda kuichotsjoá tsakui kʼoasʼiaan xi tsín ndatjín (Deuteronomio 5:29; 1 Juan 4:8). Nʼio chjine Niná, jé kisindaná kʼoa nda bexkonná kuinga kui tsjoániná kjoafaʼaitsjen xi ndatjín (Salmo 100:3; 104:24). Tonga alikui bʼénená nga si̱tjosoán jotso je kjoatéxomale.

Je Jeobá kitsjoale ngayeje jmeni xi koanchjénle je Adán kao Eva nga tsjoa kisatio kon (Génesis 1:28, 29; 2:8, 15). Alikui ñʼai tíjna jmeni xi kitsole nga sʼin, tonga alikui kjoanʼio tsakʼénele nga katasítjosonle (Génesis 2:9, 16, 17). Tonga je Adán kao Eva to yaole kini kʼoa alikui kisitjoson je kjoatéxoma xi kitsjoale Niná (Génesis 3:6). Kʼoa jósʼin tíbichómani nga toñá bandiaalee yaoná. Jokji tifaʼa nichxin, tiʼyañá nga tsín ʼnda tíbichómani nga tibitjatoné kjoatéxomale Niná, alikui nda tiyoaa kʼoa alikui tsjoa tjío tokoán (Eclesiastés 8:9).

Tojñani tsaan, je Biblia tsjoáná kjoafaʼaitsjen nga kataʼyaa jmeni xi kixi tjín (2 Timoteo 3:16, 17; chótʼai je recuadro “Jngo libro xi binyakao ngatsʼi chjota”). Kataʼyala josʼin bándiaaná je Biblia.

Ánni kʼoabixónsíñá nga Énle Niná je Biblia (1 Tesalonicenses 2:13). Tjasjai jw.org ya Internet kʼoa chótsenlai je video xi ʼYá tsʼe én xi nroatʼa Biblia ʼmi.

ÁNNI NGA TJÍNNI CHJOTA XI TSÍN MAKJAINLE JMENI XI TSO JE BIBLIA

Tjínkʼa chjota xi kʼoatso nga tsín kʼoatjín jmeni xi tso je Biblia, kʼoa nga tsín josʼin basenkaoná, tsakui nichxin tjínkʼa xi i̱sʼin síkjaʼaitsjen:

Tjínkʼa xi i̱ tso: “Alikui mangóson jmeni xi tso Biblia”.

Jotjínni: Tsakui nichxin kʼoasʼin si̱kjaʼaitsjeen nga tsín mangóson jmeni xi tso Biblia. Tonga mangóson jmeni xi tso tsa kuenta sʼiaan kʼiáni kichji, jósʼin kisijchá yaole chjota nga kʼia, ʼyá chjotani xi kiski kʼoa tsa jmesani xi kjaʼaí.

Tsa mesali jchai xi tʼatsʼe jebi tjasjai jw.org ya Internet kʼoa tʼexkiai jñani tso “¿Se contradice la Biblia?”.

Tjínkʼa xi i̱ tso: “Alikuijin nda bándiaaná je Biblia, nga̱ tojo tsínni nda fikao yaole je chjota xi Biblia kotʼaya”.

Jotjínni: Je Biblia nda kjoafaʼaitsjen tsjoá, tonga jé chjota xi kuitsoni tsa sitjoson jmeni xi tso kʼoa tsa mai. Ya Biblia kʼoatso nga nkjín chjota xi tsín sitjoson, jolani je xi nyatítjonle religión. Kʼoati tso nga totʼatsʼe chjota jebi nga chʼaosʼin kʼoaxki̱ Énle Niná (2 Pedro 2:1, 2).

Tsa mesali jchai jotjíosʼín je xi nyatítjonle religión tjasjai jw.org ya Internet kʼoa tʼexkiai jñani tso: “La religión, ¿un gran negocio?”.

Tjínkʼa xi i̱ tso: “Je Biblia kʼoatso nga tsín tjínnele jchaxkoán josʼin síkjaʼaitsjen xi kjaʼaí”.

Jotjínni: Ya Biblia kʼoatso nga tjínnele koakolee kjoaxkóntokon xi kjaʼaí. Kʼoa kʼoatso jmeni xi tsín tjínnele kʼoasʼiaan.

Tsín koa̱n ngʼa chʼa̱sjee yaoná (Filipenses 2:3).
Tjínnele koakolee kjoaxkóntokon xi kjaʼaísʼin makjainle kʼoa xi kjaʼaísʼin síkjaʼaitsjen (1 Pedro 2:17).
Tsín koa̱n kʼoénelee xi kjaʼaí nga kʼoatisʼin katasíkjaʼaitsjen josʼin nikjaʼaitsjeen (Mateo 10:14).

Ya Biblia kʼoatso nga kixi Niná kʼoa nʼio nda chjota. Kui xi mele nga kʼoati sʼiaan tsanda ñá (Romanos 9:14).

Tsa mesali jchai tʼatsʼe jebi tjasjai jw.org ya Internet kʼoa tʼexkiai jñani tso: “A basenkaoná je Biblia nga ʼyaxkoán josʼin síkjaʼaitsjen xi kjaʼaí”.

KUI BIBLIA SÍCHJÉN NINÁ NGA BÁNDIAANÁ

Jokji tífaʼato nichxin, ya Biblia tsoyaná josʼin bekonná Niná. Kʼianga bʼexkiaa Biblia yaa ʼyañá jmeni xi sasénle kʼoa jmeni xi mai, be jmeni xi koasenkaoná kʼoa jmeni xi mai (Salmo 19:7, 11). Tsjoáná kjoafaʼaitsjen xi binyakaoná nga nyaon nyaon kʼoa alikui bʼantjaiya.

Ya Proverbios 13:20 itso: “Je xi chjotachjine bʼamjekao chjinee koa̱n, tonga je xi chjotachini bájta kjoa ska̱jin”. Kjoafaʼaitsjen jebi tojo nʼio nda basenkaoná ndʼaibi, kʼoa nʼiosa nkjín kjoafaʼaitsjen faʼaitʼa je Biblia xi binyakaoná (chótʼai je recuadro “Binyakaoná je kjoafaʼaitsjen xi tsjoá Biblia”).

Tsakui nichxin i̱ bixoán: “Jósʼin skoeña tsa tojo basenkaoná ndʼaibi jmeni xi tso Biblia”. Yaa kjoaʼmiya xi ijngo jchaa josʼin tjíobinyakao chjota je kjoafaʼaitsjen xi tsjoá Biblia.

a Jeobá ʼmi jaʼaínle Niná (Salmo 83:18).

BINYAKAONÁ JE KJOAFAʼAITSJEN XI TSJOÁ BIBLIA

Ningalani jeme 2,000 nó tjínle nga kichji je Biblia, je kjoafaʼaitsjen xi faʼaitʼa tojo basenkaoná ndʼaibi. Ngatsʼiñá nga mena nda kuiyoaa kʼoa nga tsjoa sa̱tío tokoán (Eclesiastés 1:9). Kʼoa ya Biblia kʼoatsoná jme xi tjínnele sʼiaan.

Nga kixi koaan

“Menajin nga nda koangínkoaijin yaonajin” (Hebreos 13:18).
“Je xi kisiché, ali tisíchéjinni. Tosa katasíxá” (Efesios 4:28).

Nda kjuinkoaa xíngiaa

“Niʼyajin xi básjai nga nda kʼoéjna xi totsʼeni, tonga katabásjai nga nda kʼoéjna xi kjaʼaí” (1 Corintios 10:24).
“Tikjaínlao xíngio, tichatʼa ngaʼi̱ngajánlao xíngio” (Colosenses 3:13).

Jmeni xi sʼiaan

“Toʼyani xi tsín nkjín kon tomakjainyejele tojmeni xi ʼmile, tonga je xi sínkjínle kon kosonnile josʼin binyá ndso̱ko̱” (Proverbios 14:15).
“Je xi sínkjínle kon be jmeni xi xkón tíjna kʼoa bʼejnaʼmale, tonga je xi tsínle kjoafaʼaitsjen alikui binya kʼoa kjoa tsaojin” (Proverbios 22:3).