Nga kui xi ndatjín kʼoasʼiaan: Ñá xi kuixónñá jmeni xi sʼiaan
Je Jeobá kui xi mele nga nda kuiyoaa, kuinga kʼoatsoniná nga si̱tjosoán kjoatéxomale nga̱ kui xi kuitsoni josʼiaan tsa nda kuiyoaa kʼoa tsa mai.
Je Jeobá kui xi mele nga nda kuiyoaa kʼoa nga tsjoa sa̱tío tokoán.
“An Jeobá, anña Nináli, je xi kʼoasʼin bakóyali ánni nga nda kuijnasíni, je xi kʼoasʼin síkasényali ndiaa xi tjínnele kuitómjeyai. Kʼiatsa koasenñolani je kjoatéxomana, ñaki nyʼánjin sʼin kuijnai joni tsa jngo xo̱ngá, kʼoa je kjoakixili ñaki jo xóle ndáchikonjin koa̱n” (Isaías 48:17, 18).
Koaan kʼoasʼin kjuinkoaa yaoná josʼin mená, tonga jé Jeobá xi ngisa nda be jméni xi sʼiaan nga nda kuiyoaa nga̱ jé kisindaná. Kʼoatsoná nga nda kuichomani jmeni xi sʼiaan tsa si̱tjosoán je kjoatéxomale, kui xi ndatjín kʼoasʼiaan ngantsjai, nda kuiyoaa kʼoa tsjoa sa̱tío tokoán.
Je Jeobá alikui kui sijéná jmeni xi tsín kuitjosonná.
“Je kjoatéxoma xi kʼoasʼin tibʼenele ndʼaibi alikui nʼio ñʼai tíjna, kʼoa alikui kjin tíjna” (Deuteronomio 30:11).
Tsa mená kʼoasʼin kjuinkoaa yaoná josʼin mele Niná machjén nga si̱kʼantjaiyaa josʼin nikjaʼaitsjeen kʼoa jonʼia. Tonga je Jeobá alikui kui síjéná jmeni xi tsín kuitjosonná. Nga je kisindaná be jmeni xi kuitjosonná kʼoa jmeni xi mai. Kʼianga ngisa nda ʼyaxkoaan je Niná majinná nga tsín ñʼai tíjna kjoatéxomale (1 Juan 5:3).
Je Jeobá kʼoatso nga koasenkaoná tsa si̱tjosoán je kjoatéxomale.
“An Jeobá Nináli, an titsoanʼioa je ndsai ngakixi; an xi i̱ tixinle: Ali nokjonjin. An koasenkaole” (Isaías 41:13).
Koaan kʼoasʼin kjuinkoaa yaoná josʼin mele Niná nga jé koasenkaoná. Kui xá kitsjoaniná je Biblia nga sinʼio tokoán jmeni xi tso kʼoa tsjoáná kjoachoya.
Jngo tjíjtsa Sonʼnde millón mani chjota xi nda tjíobatío nga tjíosítjoson jmeni xi tso je Biblia. A koaan koa̱nkjainná jmeni xi tso Biblia. A meli jchai jotso kjoafaʼaitsjen xi tsjoá. Tsa mesali jchai koaan chótʼai jotso je folleto Koaan nda kuiyoaa ngantsjai nichxin. Yaa faʼaitʼa Internet ya jw.org kʼoa tokjoatjaoní. Kui nga jan koya jebi xi bakóya:
“Jósʼin basenkaoná je Biblia”.
“Je Biblia tsjoáná kjoachoya”.
“A koaan koa̱nkjainná jmeni xi tso Biblia”.
Nga jchasai jmeni xi tso Énle Niná, koa̱njinli nga nʼio nda binyakaoná kjoafaʼaitsjen xi tsjoá. Kuinyakaoná ndʼaibi kʼoa tokʼia saʼndani (Salmo 111:8). Nda biyoaa kʼianga nitjosoán jmeni xi tso Biblia, tonga je Niná alikui kjoanʼio bʼénená nga kʼoasʼiaan (Deuteronomio 30:19, 20; Josué 24:15). Ñá xi kuixónñá tsa si̱tjosoán kjoatéxomale kʼoa tsa mai.