Si̱toánntjé jmeni xi tso Jeobá nga ndatjín

Je Jeobá kʼoatso jmeni xi ndatjín kʼoa jmeni xi mai. Tobʼelañá, kʼoatso nga tjínnele tondiaa koatiokao xínkjín je xʼin kao je chjoón xi jekabixan (Mt 19:4-6, 9). Kʼoa tsín sasénle je kjoachajngi (1Co 6:9, 10). Kʼoati tsjoá kjoafaʼaitsjen jokjoan najño xi kʼoakjá choʼndale kʼoa jokjoáyo nga tsín ya katamangósonkao chjota xi ngikʼa (Dt 22:5; 1Ti 2:9, 10).

Nichxin xi tiyoaa ndʼaibi, nʼio nkjín chjota xi tsín sasénle kjoatéxomale Jeobá (Ro 1:18-32). Kʼoafayo kʼoa kʼoasʼín josʼín chjota xi tjín ndʼaibi. Ngʼa bʼasje yaole nga kui kʼoatjíosʼín xi chʼaotjín kʼoa chʼao tsole je xi tsín kʼoasʼín josʼín je (1Pe 4:3, 4).

Ñá xi testigole Jeobá maa tjínnele nga si̱toánntjé jmeni xi kʼoatso je Jeobá nga ndatjín (Ro 12:9). Kʼiaa nitjoánntjé xi ndatjín kʼianga kao kjoaxkóntokon ʼmiyalee chjota jmeni xi sasénle Niná kʼoa nga kʼoasʼin mangínkoaa yaoná jotso kjoatéxomale. Tobʼelañá, jokjoan najño xi chʼakjá kʼoa josoyoaa, ndatjín nga chjónangilee yaoná jebi: “ʼYá tsʼe kjoatéxoma xi tifitjenngia, a tsʼee Jeobá axo tsʼee sonʼnde. Jofa, a bakó nga Niná tisixále”. Kʼoa kʼianga jngo pelíkula chotsenlee, si̱kjaʼaitsjeen a sasénle je Jeobá, jmé xi tsoya pelíkula jebi, a kʼoetʼale kjoafaʼaitsjenná (Sl 101:3). Jósʼin kʼoetʼale familianá kʼoa kao xi kjaʼaí chjota jmeni xi chjoejiaan (1Co 10:31-33).

Ánni nga nʼio chjísínile nga nitoánntjé jmeni xi kʼoatso Jeobá nga ndatjín. Kuinga jeme sikjeson Jesucristo je chjota kʼoa kao kjoatsʼen (Eze 9:4-7). Kʼoa tojé kuitjontjai je xi sitjosonle Niná (1Jn 2:15-17). Si̱toánntjé kjoatéxomale Jeobá ánni nga kʼoasjengʼasíni je chjota xi skoe̱ nga nda mangínkoaa yaoná (1Pe 2:11, 12).

CHÓTSENLAI JE VIDEO MIYOLE JEOBÁ KATAMAI: JNGO CHJOÓN, JNGO XʼIN. XIJEKOA̱N, CHÓTʼAYAJIN KJOACHJONANGI JEBI:

• Ánni nga ndatjínsíni nga nitjosoán je kjoatéxomale Jeobá.

• Ánni nga tjínnenile je xijchá nga kuitsoyale kjoatéxomale Niná je ʼndíxtile saʼnda nga sʼa ʼndí kjoan.

• Jósʼin je xti kao chjotajchínga nga koasenkao je chjota nga kʼoati katasʼele kjoandale Niná.