Jósʼin ʼyatokuin je Biblia

JE BIBLIA ITSO

“Ngayije xo̱n Escritura [tʼatsʼe] Niná jinroani.” (2 Timoteo 3:16, Nuevo Testamento en mazateco de Huautla de Jiménez, Oax.)

KJOANDA XI SʼENÁ NGA ʼYAA JEBI

Kuitsoyaná jmeni xi nʼio chjonangilee yaoná (Proverbios 2:1-5).

Tsjoáná kjoafaʼaitsjen xi koasenkaoná nga nyaon nyaon (Salmo 119:105).

Tsjoáná kjoachoya tʼatsʼe nichxin xi nroaján (Romanos 15:4).

A KOAAN KOA̱NKJAINNÁ JOTSO JE BIBLIA

Jaon. Janla koya kataʼyaa anni:

• Alikui kjántʼa jmeni xi tso. Je Biblia ñachanla chjota kiski kʼoa jngo jmi kaoni jaonla siento nó koanjngoni. Ninga tsínlani tsabexkon xínkjín chjota xi kiski, je libro xi faʼaitʼa alikui kjántʼa jmeni xi tso kʼoa jé jaʼaínle Niná bʼasjengʼa kao josʼin batéxoma.

• Lijme xi tsakʼéʼma je xi kiski. Je chjota xi kui kji jmeni xi ma naxinandále, me tongantsjai nga tsín kʼoatso kʼianga sícha kjoajchán je naxinandále. Tonga je chjota xi kiski Biblia alikui kʼoakisʼin, tsakʼétʼaxo̱n jme jée xi kisokole je kʼoa kao naxinandále (2 Crónicas 36:15, 16; Salmo 51:1-4).

• Bitjosonntsjai jmeni xi tso. Je Biblia tsʼato ñato siento nó tongini kʼoakitso nga ya Belén jtsín je Mesías xi sikasén Niná, jngo naxinandáʼndí xi ya tíjna Judá (Miqueas 5:2). Kʼoa jñáni kitsin Jesús. Yakjoán Belén kitsin (Mateo 2:1-6).

  Nʼio nkjínsa én xi ñaki kʼoasʼin kitjoson jonga kitso Biblia. A tsíkui xi bakóná jebi nga tʼatsʼe Niná kinroani (2 Pedro 1:21).