A basenkaoná je Biblia nga ʼyaxkoán josʼin síkjaʼaitsjen xi kjaʼaí

“Kʼianga ʼyaxkoán josʼin síkjaʼaitsjen xi kjaʼaí basenkaoná nga nyʼán biyokoaa xíngiaa” (Declaración de Principios sobre la Tolerancia de la Unesco, 1995).

Kʼianga tsín bexkón chjota josʼin síkjaʼaitsjen xi kjaʼaí yaa nroani nga jtike ma xínkjín kʼoa nga tsín bexkón xínkjín. Kʼoa saʼnda kʼoatsole je xi kjaʼaí nga jtike katama kʼoa nga katabʼasjengi je xi tsín sasénle josʼín.

Tjínkʼa chjota xi kʼoatso nga tjínnele kʼoainganʼiolee josʼín kʼoa josʼin síkjaʼaitsjen chjota. Kʼoa tjínkʼa xi kʼoatso nga koakolee kjoaxkóntokon xi kjaʼaí josʼín kʼoa josʼin síkjaʼaitsjen ninga tsín sasénná, kʼoa jebi mangóson jotso Biblia.

A basenkaoná je Biblia nga ʼyaxkoán josʼin síkjaʼaitsjen xi kjaʼaí.

Jótso je Biblia xi tʼatsʼe nga ʼyaxkoán josʼin síkjaʼaitsjen xi kjaʼaí.

Je Biblia itso: “Katabe ngatsʼi chjota josʼin nga ndʼáo nga jon” (Filipenses 4:5). Kʼoati tso nga tjínnele nga koakolee kjoaxkóntokon xi kjaʼaí kʼoa nga nda si̱koaa. Je xi fitjenngi kjoafaʼaitsjen xi tsjoá Biblia alikui bʼéchjoale xi kjaʼaí nga kʼoasʼín josʼin síkjaʼaitsjen.

Je Biblia kʼoati tsoná josʼin koanngínkoaa yaoná. Itso: “Je [Niná] kʼoatítsoli je xi ndatjín” (Miqueas 6:8). Ya Biblia kʼoatsoná jmeni xi tjínnele sʼiaan nga nda kuiyoaa (Isaías 48:17, 18).

Je Niná kʼoatso nga likui tiʼndená nga jokʼuínlee je xi kjaʼaí. Je Biblia itso: “Tojngo mani je xi tsjoá kjoatéxoma, [...] ʼyáni nga ji nga ʼyasin xi kjaʼaí chjota” (Santiago 4:12). Je Niná tsjoáʼndele je chjota nga je katakjoéjin jmeni xi sʼin tonga kʼoati tsole josʼin kuichomani jmeni xi sʼin (Deuteronomio 30:19).

Je Biblia kʼoatso nga koakoá kjoaxkóntokon

Je Biblia itso: “Jchaxkón ngatsʼi” (1 Pedro 2:17). Je xi fitjenngi jotso je Biblia bakóle kjoaxkóntokon ngatsʼi chjota ninga kjaʼaí sʼin makjainle kʼoa ninga kjaʼaí sʼin fikao yaole (Lucas 6:31). Jebi alikui xi tsonile nga kʼoasʼin síkjaʼaitsjen nga ndatjín jmeni xi sʼín xi ngikʼa kʼoa kʼoati tsínkui xi tsonile nga tsjoánganʼiole jmeni xi sʼín. Tonga bakóle kjoaxkóntokon kʼoa alikui to taon be, kui choa̱le Jesús fitjenngi.

Tobʼelañá, je Jesús ñandia nga jngo chjoón tsakjákaonajmí xi kjaʼaí religión tjínle kʼoa je chjota xi tíjnakao kje bixankaojin. Ninga tsín ndatjín jmeni xi kisʼin chjoón jebi, je Jesús tsakakóle kjoaxkóntokon nga tsakjákaonajmí (Juan 4:9, 17-24).

Je chjotale Cristo kʼoati sʼín jokisʼin je Jesús. Kao kjoaxkóntokon tsoyale chjota josʼin makjainle (1 Pedro 3:15). Je Biblia kʼoatsole je chjotale Cristo nga tsín katabʼénele xi kjaʼaí nga kʼoasʼin katasíkjaʼaitsjen josʼin síkjaʼaitsjen je. Je Biblia itso: “Je choʼndale Nainá alikui machjén nga chjotakjoasi koa̱n, tonga machjén nga ndʼé koa̱n xi tʼatsʼe ngatsʼi” (2 Timoteo 2:24).

Je Biblia kʼoatso nga tsín jticha koaan xi kjaʼaí

Je Biblia kʼoatso nga nyʼán kuiyokoaa ngatsʼi je chjota (Hebreos 12:14). Je chjota xi tsjoake kjoanyʼán tsínle kjoajticha kʼoa bʼénele yaole nga nyʼán batiokao xi kjaʼaí. Tonga alikui faʼatone je kjoatéxoma xi faʼaitʼa ya Biblia (Mateo 5:9). Je Biblia kʼoati tso nga tsjoacha katamaa xi jtikená kʼoa kui xi tsonile nga nda si̱koaa je xi chʼao síkaoná (Mateo 5:44).

Ya Proverbios 6:16-19 kʼoatso nga jtike Niná jmeni xi chʼaotjín kʼoa nga to taon be xínkjín je chjota. Tonga je Niná alikui je chjota xi jtike, kui xi jtike jmeni xi sʼín. Je Biblia kʼoatso nga sichatʼale Niná ʼyani xi mele sikʼantjaiya yaole kʼoa xi sitjoson kjoatéxomale (Isaías 55:7).

Texto xi kui tínchja̱ni

Tito 3:2: “Tondʼé toʼindajin katama kao ngatsʼi chjota”.

Mateo 7:12: “Kʼoasʼin ngayije kjoa xi meno nga síkaono chjota, kʼoatisʼin tikaonio nga je”.

Josué 24:15: “Chjoéjion ndʼaibi ʼyáni xi si̱xálao”.

Hechos 10:34: “Niná tongóson fikao ngatsʼi”.

Habacuc 1:12, 13: “[Ji Niná] alikui sasénli je kjoatsʼen”.

Romanos 12:19: “Tʼaiʼndelao Niná kao kjoajtile, nga kʼoasʼin tjítʼa: An xi sijndania, an kʼoechjínia, tso Nainá”.a

Alikui tsjoáʼnde Jeobá nga ʼya xi jokatasíkao xínkjín. Tojé xi be kʼiáni nga kʼoendajin je kjoa xi tjín. Tsa mesali jchai xi tʼatsʼe jebi tʼexkiai je artículo “¿Alguna vez se hará justicia en el mundo?”.