Jchaxkoán toʼyani

1. Jósatío tokoán kʼianga bexkónná xíngiaa (Proverbios 22:1).

SASÉNNÁ kʼianga bexkónná je xíngiaa kʼoa tsjoa sʼe tokoán, nga̱ kui xi mená nga sa̱kóná kjoaxkóntokon. Kuinga i̱ tsoni ya Biblia: “Ngisaa nda nga bexkónná chjota tikʼoajinni tsa tao̱nchxoa kao tao̱nsine tjínná” (tʼexkiai Proverbios 22:1).a

2, 3. Ánni nga sakʼoa ñʼai maniná nga ʼyaxkoán xíngiaa kʼoa jméni xi chótʼayajiaan.

² Ninga kʼoalani sakʼoa ñʼai maná nga ʼyaxkoán xíngiaa nga̱ sakʼoa tokui chotsenlee jñani chʼao sʼín. Kʼoa nichxin xi tiyoaa ndʼaibi alikui tibexkónni xínkjín chjota. Tonga ñá, mená nga kʼoasʼiaan nga̱ kui xi mele je Jeobá nga jchaxkoán toʼya chjotani (1 Ped. 2:17).

³ Jan koya tjínni xi chótʼayajiaan ndʼai josʼin tjínnele jchaxkoán xíngiaa. Xi títjon, jósʼin jchaxkoán je familianá. Xi majaoni, jósʼin jchaxkoán je ndsʼee. Kʼoa xi majanni, jósʼin jchaxkoán je xi tsín kotʼaya Énle Niná. Kui jchaa jósʼin jchaxkoán xíngiaa ninga ñʼai maná.

JÓNIKOAA XÍNGIAA KʼIANGA ʼYAXKOÁN

4. Jónʼia kʼianga ʼyaxkoán xíngiaa.

⁴ Kʼianga ʼyaxkoán xíngiaa yaa bakoñá jonikoaa kʼoa josʼin ʼyatokoán. Nkjín koya tjínni anni nga ʼyaxkónñá xíngiaa. Tobʼelañá, ʼyaxkónñá tsa nda chjota, tsa nda sʼín kʼoa tsa xá tjínle. Tonga xi ngisa chjíle kuinga kʼoanʼiañá nga ñaki kʼoatjín tokoán (Mat. 15:8).

5. Ánni nga ʼyaxkónñá toʼya chjotani.

⁵ Je Jeobá kui xi mele nga jchaxkoán xíngiaa. Tobʼelañá, ya Biblia kʼoatso nga tjínnele jchaxkoán “chjota xi xá tjínle” (Rom. 13:​1, 7). Tsakui nichxin tjínkʼa xi i̱ kuitso: “Tojé ʼbexkoán chjota xi nda sʼín”. Tonga alikui ndatjín tsa kʼoasʼin si̱kjaʼaitsjeen, nga̱ ñá xi choʼndale Jeobá maa tjínnele jchaxkoán toʼya chjotani kʼoa alikui koa̱n nga tokui kjuinñá jme xi sʼín. Kui kʼoanʼiañá nga tsjoachaa je Jeobá kʼoa mená nga tsjoa kjoáyaa kon (Jos. 4:14; 1 Ped. 3:15).

6. A koaan koakolee kjoaxkóntokon jngo chjota xi tsín bexkónná (kʼoati chótsenlai sén xi faʼaitʼa).

⁶ Machjén nga koakolee kjoaxkóntokon je chjota ninga tsín skoe̱xkónná ñá. Kataʼyala kʼa choa̱. Je rey Saúl alikui nda kisikʼaxki̱ Jonatán ngixko̱n chjota (1 Sam. 20:​30-34). Ningalani kʼoakoantʼain Jonatán tsabexkón je nʼaile kʼoa tosi tonda tsakinyakao xínkjín kʼianga ki kjoajchán saʼnda nga kinikʼien (Éx. 20:12; 2 Sam. 1:23). Je naʼmitítjon Elí to chjotachʼi kitsole je Ana (1 Sam. 1:​12-14). Tonga je Ana tsakakóle kjoaxkóntokon je Elí ninga ʼyale nga tsín nda tísítjoson je xá xi kjinele nga nʼai ma kʼoa nga naʼmitítjon sʼin tíjna (1 Sam. 1:​15-18; 2:​22-24). Kʼoa je chjota xi Atenas tsʼe kʼoakitsole Pablo nga to chjota tsakʼanachale (Hech. 17:18). Tonga je Pablo tsakakóle kjoaxkóntokon chjota jebi (Hech. 17:22). Tojo kisʼin je chjota xi kabʼaxki̱, tsa tsjoachaa je Jeobá kʼoa tsa mená nga tosi tonda nda kuiyoaa ngixko̱n, koakolee kjoaxkóntokon je chjota ninga tsín skoe̱xkónná ñá. Kataʼyala ʼyáni xi tjínnele koakolee kjoaxkóntokon kʼoa ánni nga kʼoasʼianñá.

JCHAXKOÁN JE XÍNGIAA

7. Ánni nga sakʼoa tsín bakonilee kjoaxkóntokon xíngiaa.

⁷ Ánni nga ñʼai maniná nga ʼyaxkoán xíngiaa. Nga tojngo niʼya mañá nda ʼyaa jokjoan kʼoa josʼín je xíngiaa. Tsakui nichxin kʼoati ñʼai koa̱nná nga si̱kuindaa je xíngiaa xi chʼin tjíokao kʼoa tsa nʼio síkʼajenle kon. Tsa tjínkʼaje̱ xi toxkia kjoakaoná, xi tsín nda tso én kuinchja̱. Tsa tsín ʼya xi koako kjoaxkóntokon, alikui tinda biyoñá ya yaniʼya nga̱ jeto chobatiʼndee. Kʼoama je chʼin xi artritis ʼmi, nga nindaná síkitsón alikui tima nikjanñá. Tikʼoasʼinni ya yaniʼya, tsa tsín koakolee kjoaxkóntokon xíngiaa alikui tinda biyoñá. Tonga koaan si̱ndayaa yaoná nga koakoá kjoaxkóntokon.

8. Ánni koakonilee kjoaxkóntokon je xíngiaa (1 Timoteo 5:​4, 8).

⁸ Ánni tjínnenile jchaxkoán xíngiaa (tʼexkiai 1 Timoteo 5:​4, 8).b Kʼianga kiskile Pablo je Timoteo kʼoakitsole jméni xi sʼin nga kuinyakao xínkjín xi tjío ya yaniʼya. Ali tokuijin nga bakonilee kjoaxkóntokon xi tjío ya yaniʼya nga xíngiaa mani. Kui kʼoanʼiañá nga tsjoachaa je Jeobá kʼoa nga je ʼyaxkoán. Jé Jeobá xi kʼoasʼin tsakʼéndajin nga familia tjín (Efes. 3:​14, 15). Kʼianga ʼyaxkoán xíngiaa jéni Jeobá xi tiʼyaxkoán, kuinga nʼio chjínile nga koakoá kjoaxkóntokon.

9. Jósʼin koakole kjoaxkóntokon xínkjín xi jechixan (kʼoati chótsenlai sén xi faʼaitʼa).

⁹ Jósʼiaan nga koakoá kjoaxkóntokon. Je xi jechixan tjínnele koakole kjoaxkóntokon xínkjín kʼianga jinle chjota tjío kʼoa kʼianga toje tjío (Prov. 31:28; 1 Ped. 3:7). Je xi xʼin alikui totaon be je chjoónle kʼoa alikui nchja̱tikao. Jngo ndsʼee xi Argentina tsʼe, xi Ariel ʼmi,c itso: “Kui chʼin xi tjínle je chjoónna xosíkao nga sakʼoa likui nda tso én fákaonina. ʼNdele nga kui kuenta sʼian jotsona, tosa kui sikjaʼaitsjen nga likuijin kʼoakuitso kʼiatsa tsínlani tímʼe. Kʼianga ñʼai mana kui sikjaʼaitsjenjian jmeni xi tso 1 Corintios 13:5 kʼoa kui xi basenkaona nga ngasin nganda fakoa chjoónna kʼoa nga bakole kjoaxkóntokon” (Prov. 19:11). Kʼoa je chjoón xi bexkón je xʼinle nda síkʼaxki̱ ya jinle chjota (Efes. 5:33). Alikui besin, alikui kjenngiʼa, kʼoa alikui totso tomanile je xʼinle. Nga̱ be nga tsín tinda sʼe̱ni kon xʼinle tsa kʼoakuitsole (Prov. 14:1). Jngo tichjaa xi Italia tsʼe xi chʼin tjínle xʼinle, itso: “Ndʼaibi jebakole kjoaxkóntokon je xʼinna, nga̱ yaa tisimiyoa je chjota xi bakó kjoaxkóntokon. Ngasʼa toxin tomanile tsakai kʼoa tofa tomanile nkjan”.

10. Jósʼin je xti nga koakole kjoaxkóntokon je xijchále.

¹⁰ Je xi sʼa xti, tjínnele sitjosonle je xijchále kʼoa tjínnele koakole kjoaxkóntokon nga tsín toxkia kjoakao (Éx. 21:17; Efes. 6:​1-3). Machjén nga si̱kuindaa je xijcháná nga sa tse sa tse nganʼio koa̱nchjénle nga sa jchínga sa jchínga koa̱n. Kataʼyala jokisʼin je tichjaa xi María ʼmi. Je nʼaile alikui testigole Jeobá ma, kʼoa kʼianga kitjochʼinle jé kisikuinda, tonga alikui choa ñʼai koanle. Itso: “Kʼoakixinle je Jeobá nga katabasenkaona nga koakole kjoaxkóntokon je pana. Je Jeobá kui xi mele nga koakolee kjoaxkóntokon je xijcháná kʼoa ʼbeña nga je koasenkaona. Tsakakole kjoaxkóntokon je nʼaina ninga tsín nda chjota”. Jéni Jeobá xi tiʼyaxkoán kʼianga bakolee kjoaxkóntokon je xíngiaa ninga tsín sasénná josʼín.

JCHAXKOÁN JE NDSʼEE

11. Ánni nga ñʼai maniná nga bakolee kjoaxkóntokon je ndsʼee.

¹¹ Ánni nga ñʼai maniná nga ʼyaxkoán je ndsʼee. Toxá nitjosonñá ngatsʼiaa jmeni xi tso Énle Niná. Ninga kʼoalani, sakʼoa síjtiná jmeni xi tso je ndsʼee kʼoa tsa josʼin. Tsa tsín kixi tíjna jmeni xi kuitsoná kʼoa tsa tsín nda sikaoná. Kʼoa tochale tsínti koakonilee kjoaxkóntokon tsa ʼya xi josikaoná (Col. 3:13). Jméni je xi koa̱n sʼiaan.

12. Ánni nga nʼio chjínile nga jchaxkoán je ndsʼee (2 Pedro 2:​9-12).

¹² Ánni tjínnenile jchaxkoán je ndsʼee (tʼexkiai 2 Pedro 2:​9-12).d Kʼianga kiski je xi majaoni cartale Pedro kʼoakitso nga tjínkʼa chjotale Cristo xi tsín tjíobakóle kjoaxkóntokon je xi chjotajchínga sʼin tjío. Jméni xi kisʼin je ánkje kʼianga kʼoakoan. Je Pedro kʼoatso nga tosa tsín jokitsole je chjota xi tsín tsakakó kjoaxkóntokon. Kuinga bexkón je Jeobá nga tsín jokitsoni. Tosaa tojyó tsakatio je ánkje nga̱ kui xi koanmele nga je Jeobá katabʼéndajin kjoa (Rom. 14:​10-12; tingósonkoai Judas 9). Nʼio nda choa̱ batíoná josʼín je ánkje. Tsa ʼyaxkoán je chjota xi jtikená ngisaa timachjénngáni nga jchaxkoán je ndsʼee. Alikui kui chóyalee nga je ndsʼee katabakóná kjoaxkóntokon, tosa ñá títjon kʼoasʼiaan (Rom. 12:10). Tsa kʼoasʼiaan, kʼoasʼin koakoñá nga ʼyaxkoán je Jeobá.

13, 14. Jósʼiaan nga koakolee kjoaxkóntokon je ndsʼee (kʼoati chótsenlai sén xi faʼaitʼa).

¹³ Jósʼiaan nga koakoá kjoaxkóntokon. Xi chjotajchínga sʼin tiyo, ngasin nganda tʼinyao. Kʼoa tsa ʼya xi kuichákjáyalao ali yaonojin nijtilao tosa ngasin nganda chja̱kaonajmío (Filem. 8, 9). Kʼoa jósʼin tsjoánganʼio je tichjaa nga tsín jme kjoa katasʼe ya jinjtín. Kʼiaa nga tsín énndiso ska̱nibason kʼoa nga tsín ʼya xi jée koane (Tito 2:​3-5). Ngatsʼiñá nga koa̱n koakolee kjoaxkóntokon xi chjotajchínga sʼin tjío. Chjí jchaa je xá xi sʼín nga bakóyaná ya jinjtín, nga bʼéndajin josʼin sakóyason kʼoa nga binyakao xi jée tsaojin (Gál. 6:1; 1 Tim. 5:17).

¹⁴ Kataʼyala jokoan jngo tichjaa xi Rocío ʼmi kʼianga kjoafaʼaitsjen kitsjoale jngo ndsʼee xi chjotajchínga sʼin tíjna. Itso: “Alikui kisasenna josʼin tsakjákaonajmína je ndsʼee kʼoa chʼaosʼin kisikʼaxkia nga ya tijnakoa xíngia. Ninga tsín tsen kisʼian nga chʼao kisʼe tokoan tonga tsín kisitjosoan je kjoafaʼaitsjen xi kitsjoana, nga̱ k’oas’in kisikjaʼaitsjen nga tsín mandosinle xi tʼatsʼan”. Jméni xi tsakasenkao je tichjaa nga kisindaya yaole. Itsosa: “Kʼianga tsakʼexkia 1 Tesalonicenses 5:​12, 13 kʼiaa koanjinna nga tsín tibakole kjoaxkóntokon je ndsʼee kʼoa chʼao kisʼe tokoan. Tsakʼetsʼoale Jeobá kʼoa tsakasjaiyaña jósʼian nga sindaya yaona. Nga jekoanni koanjinna nga tsín je ndsʼee tjínle jée, anña xi chʼao kisʼian nga tsín tsakakole kjoaxkóntokon. Ndʼaibi majinna nga tjínnele nangitokon koa̱n tsa mena nga koakole kjoaxkóntokon xi kjaʼaí. Ningalani tojo sʼa tisindaya yaona ndatjín tokoan nga̱ ʼbeña nga tíbe Jeobá jokji tibʼenele yaona”.

JCHAXKOÁN XI KJAʼAÍ CHJOTA

15. Ánni nga sakʼoa ñʼai maniná nga bakolee kjoaxkóntokon xi kjaʼaí chjota.

¹⁵ Ánni nga ñʼai maniná nga ʼyaxkoán xi kjaʼaí chjota. Kʼianga ʼmiyasoán tsaojinñá chjota xi tsín mandosinle t’ats’e Niná kʼoa xi tsín mandosinle t’ats’e Biblia (Efes. 4:18). Tjínkʼa xi tsín nrʼoéná kʼoa kui kʼoasʼínni nga kui makjainle jme xi tsakʼinyale nga sʼa ʼndí kjoan. Kʼoa tjín je chjota xi ñatjen nixá xi tsʼen kʼoa tsa jeje̱ xi nainá mani xi nʼio bʼénená jmeni xi nʼia. Kʼoa ya ndʼiaskuela tjín je maestro xi tsʼen kao xti xi tsʼen. Kuinga ñʼai maniná nga bakolee kjoaxkóntokon nga̱ tsín jme kjoaxkóntokon bakó.

16. Ánni koakonilee kjoaxkóntokon je chjota xi tsín je Jeobá síxále (1 Pedro 2:12; 3:15).

¹⁶ Ánni nga tjínnenile jchaxkoán xi kjaʼaí chjota. Je Jeobá kuenta sʼín josʼin ʼyatokoán je chjota xi tsín kotʼaya Biblia. Je Pedro kʼoakitsole je chjotale Cristo nga ndasʼin katafikao yaole nga̱ kʼoasʼin kʼoasjengʼani Niná je chjota. Kʼoati kitsole nga katabakó kjoaxkóntokon kʼianga kuinchja̱ntjai josʼin makjainle (tʼexkiai 1 Pedro 2:12;e 3:15f). Kʼiatsa ya kuichokinya ngixko̱n kjoatéxoma kʼoa tsa ʼya chjota kjoakaonajmí, tjínnele koako kjoaxkóntokon joni tsa ya tíjnabasen je Niná. Je Jeobá nrʼoé jmeni xi bixoán kʼoa be jmeni xi nʼia. Kuinga nʼio tjínnile kjoandosin nga koakolee kjoaxkóntokon je xi tsín kotʼaya Énle Niná.

17. Jósʼin bakolee kjoaxkóntokon je chjota xi tsín kotʼaya Énle Niná.

¹⁷ Jósʼiaan nga koakoá kjoaxkóntokon. Kʼianga ʼmiyasoán, alikui koa̱n nga tokui ngʼa chʼa̱sjeñá yaoná nga ʼyaa jmeni xi tso je Biblia. Kui kuenta sʼiaan nga chjí be Niná je chjota xi ʼmiyasonlee kʼoa nga bakinle jchaxkoán (Ageo 2:7; Filip. 2:3). Alikui kʼoaʼmingajaonilee chjota ninga tokuitso tomaniná. Kuinga tsínkui kʼoakʼuínnilee jmeni xi tsín nda kʼoe kon (1 Ped. 2:23). Kʼoa tsa to jekinokjoaa nga jchaa, si̱jélee kjoanichatʼa je chjota. Tsa nda si̱xá kʼoa tsa nda si̱kʼaxkiaa chjota xi ñatjen nixá kʼoa kao je nainá k’oas’in koakonilee kjoaxkóntokon (Tito 2:​9, 10). Nʼio chjíle nga chjotakixi koaan kʼoa nga nda si̱xá. Ningalani tsín sa̱sénle je chjota kuenta sʼiaan nga tsjoa sʼe kon je Jeobá (Col. 3:​22, 23).

18. Ánni nga nʼio tjínnile kjoandosin nga jchaxkoán ngatsʼi chjota.

¹⁸ Nkjín koya kaʼyaa anni nga tjínnenile jchaxkoán xi ngikʼa. Kaʼyañá nga jchaxkoán je xi tjío ya yaniʼyaná. Tsa kʼoasʼiaan jékjoánni Jeobá xi tiʼyaxkoán nga̱ jé xi k’oas’in tsakʼéndajin nga familia tjín. Kʼianga ʼyaxkoán je ndsʼee kao tichjaa kʼoati je Jeobá tiʼyaxkoán. Kʼoa tsa ʼyaxkoán je chjota xi tsín je Jeobá síxále tsakui nichxin chan koa̱nkjainle xi t’ats’e Niná. Tojo ʼyaxkónñá je chjota ninga tsín skoe̱xkónná, nga̱ jé Jeobá sichikontʼainná tsa kʼoasʼiaan. Je Jeobá itso: “Skoexkónña je xi skoe̱xkónna” (1 Sam. 2:30).