KJOAʼMIYA XI CHOTʼAYA 39
KJOAJNDA 54 “Kui jebi je ndiaa”
Kuinyakoaa je xi mandosinle Énle Niná
“Je xi faʼaikonle Niná, machjén nga koa̱nkjainle nga tíjna Niná, kʼoa nga Niná tsjoá chjíle je chjota xi nʼio básjai nga je” (HEB. 11:6).
XI TÍNCHJA̱NI
Chósonnilee kʼiáni kʼoakʼuínlee je chjota nga katakotʼaya Énle Niná kʼoa nga katafi kjoajtín.
1. Jósʼín je chjota kʼianga ʼmiyasoán je Énle Niná (Hebreos 11:6).
KʼIANGA siglo 1, nʼio nkjín chjota xi tokjoan koankjainle Énle Niná kʼianga kinrʼoé (tʼexkiai Hebreos 11:6).a Ndʼaibi tjínkʼa chjota xi tokjoan makjainle kʼianga tosʼa nrʼoé títjon je Énle Niná. Kʼoati tjínkʼa xi tsín mandosinle tsakai tonga skan mamele kotʼaya. Jósʼiaan tsa jngo chjota ska̱jiaan xi mele skoe̱sa xi tʼatsʼe Niná.
2. Ánni nga ya mangósonñá jngo chjota xi tsojmi bántje kʼianga ʼmiyasoán.
2 Kʼianga ʼmiyasoán yaa mangóson josʼín je chjota xi tsojmi bántje, síkuindaa jmeni xi kjintjele kʼoa bʼajeen kʼianga jemajchá. Tikʼoasʼinni, kʼianga ʼmiyasoán kajinñá je chjota xi tse bichómani nga kotʼaya, tonga kʼoati tsaojiaan je chjota xi tokjoan mamele kotʼaya je Énle Niná (Juan 4:35, 36). Kʼiatsa kuenta sʼiaan je chjota, jchañá josʼin kuinyakoaa nga jngó jngó. I̱ kjoaʼmiya jebi kui chótʼayajiaan jósʼin kuisenkoaa je chjota xi mele skótʼaya Biblia kʼoa jósʼin kuisenkoaa nga tosi tonda sichriantʼale Niná.
JÓSʼIN KUISENKOAA JE CHJOTA XI MELE SKÓTʼAYA JE ÉNLE NINÁ
3. Jósʼiaan kʼiatsa jngo chjota ska̱jiaan xi mele skótʼaya (1 Corintios 9:26).
3 Kʼiatsa jngo chjota ska̱jiaan xi mele skótʼaya, koaan kʼoakʼuínlee nga kʼuínyalee kʼoa kʼoakʼuínlee nga katafi kjoajtín xi satíoná (tʼexkiai 1 Corintios 9:26).b
4. Jósʼin ʼyañá nga tjínkʼa chjota xi tokjoan mamele kotʼaya Biblia. Jngo choa̱ tʼejnai.
4 Kʼoatʼinlai nga kʼuínyalai. Tjínkʼa chjota xi tokjoan mamele kotʼaya. Kataʼyala jokoan ya Canadá. Ñandia nga xipe nga nyaʼnda tichjaa je carrito, jngo tsoti kicho xi kiskoé je folleto Koaan nda kuiyoaa ngantsjai nichxin. Je tichjaa kʼoakitsole nga kui folleto jebi nichjén nga ʼmiyalee Biblia chjota, je tsoti kʼoakitso nga mandosinle kʼoa kitsjoale númerole tichjaa. Nga tikuini nichxin, je tsoti jebi jngo mensaje kisikasénle je tichjaa nga kʼoakitsole kʼiáni skótʼaya. Je tichjaa kʼoakitsole tsa koa̱n nga xoto koaikonle. Tsoti jebi i kitso: “Koa̱nʼana nyaon, a tsín koa̱n tsa tosa kʼia chótʼayá”. Nga koannyaonni je tichjaa kitsoyale je Énle Niná kʼoa nga tikuini xomana ki kjoajtín kʼoa tosi tonda kiskotʼaya.
5. Jméni xi kuenta sʼiaan nga kʼoakʼuínlee je chjota tsa mele skótʼaya je Énle Niná (kʼoati chótsenlai sén xi faʼaitʼa).
5 Alikui tongatsʼi chjota nga kʼoasʼín jokisʼin je tsoti xi jesa kabʼaxki̱. Me tongatsʼi chjota nga kuikjoanla títjon chjakaoñá jmeni xi mandosinle. Tsa kuenta sʼiaan jmeni xi mandosinle je chjota tsakuini nichxin chan koa̱nmele skótʼaya. Jméni xi koa̱n sʼiaan. Kui tʼatsʼe jebi kichjonangi kʼale je ndsʼee xi male josʼin bʼétsʼiakao nga tsoyale Biblia je chjota. Kataʼyala jokitso.
Jókʼuínlai je chjota xi faʼaitʼa sén jebi nga koa̱nmele skótʼaya Biblia (Chótsenlai párrafo 5)f
6. Jméni xi sʼiaan nga koa̱nmele kjuinchón ngindialee chjota.
6 Je ndsʼee xi kichjonangile kʼoakitso nga tjín ʼnde jñani ngisa nda nga tsínkui nikʼaxki̱lee je chjota nga Biblia kʼuínyalee, nga ngisa nda bichómani nga tofákaonajmí chjota. Kʼoa nga mele koaikon ijngokʼale chjota itsole: “Je Biblia tsoya jmeni xi sakʼoa nikjaʼaitsjenjiaan”. Kʼoa tsa maije̱, i tsole: “Je Biblia ali tsa totʼatsʼe religiónjin nchja̱ni, kʼoati tsjoáná kjoafaʼaitsjen xi machjénná nga nyaon nyaon”. Kʼoa sakʼoa i̱ tsole: “Ninga to 10 kʼoa tsa 15 minuto cho̱banajmiá tsee jme xi koa̱njinli”. Kʼoa ngisaa nda nga tsínkui si̱kʼaxki̱lee nga xki̱ jin nichxin koanngínchonlee.
7. Jómani be je chjota nga ñaki Énle Niná xi tiʼmiyalee (1 Corintios 14:23-25).
7 Kʼoatʼinlai nga katafi kjoajtín. Kʼianga nichxinle Pablo, je chjota xi ki kjoajtín xi satío koanjinle nga ñaki Énle Niná xi tsakʼinyale (tʼexkiai 1 Corintios 14:23-25).c Kʼoati ma ndʼai, je chjota ngisaa ngotjo majinnile jotjínni xi tʼatsʼe Niná kʼianga fi kjoajtín. Kʼiáni nga koa̱n kʼoakʼuínlee nga katafi kjoajtín. Ya kjoaʼmiya 10 xi tsʼe libro Koaan nda kuiyoaa ngantsjai nichxin kui nchja̱ni nga katafi je chjota je kjoajtín xi satíoná. Koaan kʼia kʼoakʼuínlee ninga tosʼa chja̱kaonajmí títjoán. Koaan kʼoakʼuínlee joʼmi kjoanokjoaya xi kjoaʼa kʼoa jme xi tínchja̱ni je Xo̱n xi Bájinkonná xi chótʼaya nga kui xomana.
8. Jméni xi koa̱n kʼuínyalee je chjota kʼiatsa kʼoakaʼmilee nga katafi je kjoajtín (Isaías 54:13).
8 Kʼianga kʼoakʼuínlee je chjota nga katafi kjoajtín, kʼoakʼuínlee nga tsín mangóson jonʼia kao josʼín je chjota xi kjaʼaí religión. Jngo chjoón xi ki kjoajtín i kitsole je xi tsoyale Biblia kʼianga tíchotʼaya je Xon xi Bájinkonná: “Je xi tíbakóya, a be joʼmi ngatsʼi”. Je tichjaa kʼoakitsole nga joxi xíngiaa mani ngatsʼi xi bichó kjoajtín kʼoa nga ʼyaa joʼmi. Je chjoón kʼoakitso nga tsín be joʼmi je chjota xi bichó ya yo̱ngo̱ jñani fi. Nʼio nkjín chjota xi tsín be jmé xá biyojtínñá, kuinga machjénni nga kʼuínyalee (tʼexkiai Isaías 54:13).d Kui xá biyojtínñá nga majinsaná xi tʼatsʼe Niná, nga je ʼyaxkoán kʼoa nga ninʼiojiaan je xíngiaa (Heb. 2:12; 10:24, 25). Kʼoa tsínkjoan jngo kjoatéxoma mangíntjenngiaa jonʼia kʼianga bichoaa kjoajtín (1 Cor. 14:40). Isen chon ya Ndʼia jña chotʼayá kʼoa alikui kui chobayañá tʼatsʼe kjoa política kʼoa nijngojin partido xi bʼainganʼiolee. Alijme xi ya chobatiyañá. Nga ngisa nda skoe̱ je chjota jonʼia kʼianga biyojtián koaan koakolee je video Jméni xi ma kʼianga biyojtínjin.
9, 10. Jósʼin kuisenkoaa je chjota kʼiatsa tsín tso kon nga fi kjoajtín (kʼoati chótsenlai sén xi faʼaitʼa).
9 Tjínkʼa chjota xi tsín fi je kjoajtín xi satíoná nga̱ kʼoasʼin síkjaʼaitsjen nga jetestigole Jeobá koa̱n tsa ya koai. Koaan kʼoakʼuínlee nga ma bichó toʼyani ninga tsín testigole Jeobá ma. Koaan kuichonrʼoé kʼoa aliʼya xi kjoanʼio kʼoakuitsole nga comentario katatsjoá kʼiatsa tsín mele. Kʼoati tsín ʼya xi kjoanʼio kʼoakuitsole nga katasíkʼantjaiya je religiónle. Koaan kʼoakʼuínlee nga tsín tʼaxin sakóyale je xtiʼndí, nga ñatjen biyoaa ngatsʼiaa (Deut. 31:12). Alikui tao̱n sʼeña kʼoa aliʼya xi tao̱n nijéle. Kʼoanʼia jokitso je Jesús, nga i̱ kitso: “Tokjoatjao kitsʼaino, tokjoatjao tʼainio” (Mat. 10:8). Kʼoakʼuínlee nga tsín machjén nga síxkón kjoáyo, nga̱ je Niná kui kuenta sʼín jokjoaan kʼoa jotjío ni̱ma̱ná (1 Sam. 16:7).
10 Tsa koai kjoajtín je chjota, nda si̱koaa kʼoa kʼoakʼuínlee je xi chjotajchínga sʼin tjío kao je ndsʼee nga tosʼa kabichótítjon kjoajtín je chjota jebi. Tsa nda si̱koaa, ndajin sʼe̱ kon kʼoa koaijin ngindia je kjoajtín kʼianga kʼoakʼuínlee. Koaan ñatjen kuiyoaa ánni nga koakonilee je textole Biblia xi kjimaxkia.
Kʼiatsa tokjoan kʼoakʼuínlee je chjota nga katafi kjoajtín ngisajin ngotjo sikʼantjaiyani yaole (Chótsenlai párrafo 9, 10)
JÓSʼIAAN KʼIATSA TOSʼA KʼUÍNYALEE JE CHJOTA
11. Jméni xi kuenta sʼiaan kʼiatsa tosʼa skótʼaya títjon jngo chjota.
11 Jméni xi tjínnele kuenta sʼiaan kʼiatsa tosʼa skótʼaya títjon je chjota. Machjén nga tochoatse chja̱kaonajmiá je chjota kʼoa nga kʼoakjoánchon kuichoaa jochon kaʼmilee. Xi ijngosani, koaan tochoatse kʼuínyalee. Je ndsʼee xi kichjonangile kʼoakitso nga tongisa nda nga tochoatse kʼuínyalee je chjota ninga mesale skótʼaya. Kʼianga tiʼmiyalee alikui koa̱n nga toñá kuinókjoaa, kʼoaiʼndelee nga kʼoati katanchja̱ (Prov. 10:19).
12. Jméni xi mená nga katabe je chjota kʼianga tosʼa kʼoétsʼiakao títjoán nga kʼuínyalee.
12 Kʼianga tosʼa kʼoétsʼiakao títjoán nga kʼuínyalee je chjota kui xi mená nga katabe je Jeobá kao Jesús kʼoa nga tsjoake katama. Kuinga ya Biblia chʼangiñá jmeni xi ʼmiyalee kʼoa tsín totsaan kjoafaʼaitsjen nichjén (Hech. 10:25, 26). Je Pablo tʼatsʼe Jesús kinchja̱ni kʼianga tsakakóya, nga̱ je Jesús kui xá jaʼaini i̱ sonʼnde nga jchaxkoaan je Jeobá kʼoa nga tsjoacha koaan (1 Cor. 2:1, 2). Je Pablo kʼoati kitso nga nʼio chjíle nga sa̱kóyale je xi tosʼa tjíokotʼaya Énle Niná nga chjine katama, nga nʼio katasatío kjoamakjainle, nga katasínkjínle kon jmeni xi sʼin kʼoa nga katatsokjónke Jeobá (Sal. 19:9, 10; Prov. 3:13-15; 1 Ped. 1:7). Jebi yaa mangóson tao̱nsine, tao̱nchxoa kʼoa kao la̱jao̱chjí (1 Cor. 3:11-15). Chjénngiaa choa̱le Pablo kʼoa kuinyakoaa je xi tiʼmiyalee Biblia nga katamakjainle xi tʼatsʼe Jeobá kʼoa nga miyole katama (2 Cor. 1:24).
13. Jósʼin koakoá nga tsejtaa kʼoa nga nijinlee yaoná jotjío kon je xi ʼmiyalee Biblia (2 Corintios 10:4, 5; kʼoati chótsenlai sén xi faʼaitʼa).
13 Chjénngiaa choa̱le Jesús nga tsejta koan kʼoa nga kisijinle yaole jokisatio kon je chjota. Alikui koa̱n kui chjónangilee je xi tiʼmiyalee Biblia jmeni xi chʼao kʼoe kon. Kʼiatsa tsín ndi̱to̱n majinle jmeni xi tichotʼayá, tosala tochótʼayasaa kʼoa skan kʼuínyandalee. Kʼiatsa ñʼai male síkatío jmeni xi sʼín, alikui koa̱n kjoanʼio kʼoénelee nga̱ tobijbini sikʼantjaiya yaole nga koai nichxin (Juan 16:12; Col. 2:6, 7). Ya Biblia kui síngósonkao jmeni xi makjainle chjota kao jngo xjáo xi nʼio sénjna, kuinga tsín ndi̱to̱n tjoxinnile jmeni xi sʼín (tʼexkiai 2 Corintios 10:4, 5;e chótʼai nota de estudio jñani “derrumbar cosas fuertemente atrincheradas” tso). Kuinga tjínnenile kuinyakoaa je xi tiʼmiyalee Biblia nga je Jeobá katasínʼiotʼa ánni nga sikatíoni jmeni xi jenʼio koanngakaole (Sal. 91:9).
Nichxin machjénle je chjota nga síkʼantjaiya yaole (Chótsenlai párrafo 13)
JÓSʼIAAN TSA KOAI KJOAJTÍN JE CHJOTA XI TIʼMIYALEE
14. Jótjínnele si̱koaa je xi faʼai kjoajtínná.
14 Je Jeobá kui xi mele nga tsín chjota chʼa̱sjengiaa, nga tongóson si̱koaa je xi faʼai kjoajtínná, nga tsínkui kjuinñá jñani tsʼe, tsa tjínle tao̱n kʼoa tsa mai (Sant. 2:1-4, 9). Kataʼyala jokoa̱n sʼiaan.
15, 16. Jméni xi koa̱n sʼiaan nga nda katasatío kon je xi tosʼa faʼai títjon kjoajtínná.
15 Tjínkʼa chjota xi to faʼai kʼianga satíoná kjoajtín, kʼoa tsakui kjoaʼaínije̱ nga tjín xokitsole. Chja̱kaonajmiá kʼiatsa ʼya xi kjoaʼaí, tonga kʼoati tsín si̱kʼatoné choa̱le jokʼuínlee ánni nga tsín chʼao sʼe̱ni kon. Kʼoakʼuínlee nga ya katabʼejnatʼaná, kʼoai jngolee Biblia kʼoa kʼoailee xo̱n xi chotʼayá. Kʼoati koa̱n kjoásjaisalee josʼin kuisenkoaa. Tobʼelañá, ñandia nga jngo chjota kicho ya Ndʼia jña chotʼayá, koansoale nga tsín ndakjoan najño yʼakjá. Je ndsʼee xi kisitiʼnda kʼoakitsole nga tsín jme xi koa̱nle. Chjota jebi kisʼenngindá kʼoa tsín kichajinle jmeni xi kitsole je ndsʼee. Ninga nda chja̱kaonajmiá je chjota xi bichó kjoajtín, alikui koa̱n nga kui chjónangilee jmeni xi tsín ñá tjínnele sʼe̱jinná (1 Ped. 4:15).
16 Jmésa xi koa̱n sʼiaan nga nda katasatío kon je chjota xi faʼai kjoajtín. Kʼianga cho̱banajmiá chósonnilee josʼin si̱kʼaxkiaa je chjota xi tsín testigole Jeobá ma kao josʼin makjainle. Chósonnilee jokuixoán tsa tinokjoayaa kʼoa tsa comentario tibʼé, alikui koa̱n nga kui kʼoakuixoán je xi chʼao kʼoe kon. Tsa kʼoasʼiaan, tsakui nichxin tsínti kjoaʼaíni (Tito 2:8; 3:2). Alikui ndatjín tsa chʼa̱sjengiaa josʼin makjainle je chjota (2 Cor. 6:3). Je ndsʼee xi tsjoá kjoanokjoaya kʼoati tjínnele nda skósonnile jmeni xi kuitso kʼianga kuinchja̱yajin. Tobʼelañá, tsakui sikʼaxki̱ je én xi toñá ʼyaa xi testigole Jeobá maa, koaan kuitsoyanda ánni nga koa̱njinnile je xi tosʼa faʼai títjon kjoajtín.
17. Jméni xi kʼuínlee je chjota xi mele skoe̱ xi tʼatsʼe Niná.
17 Kʼianga ʼmiyasoán tsaojinñá je chjota xi mele skoe̱ xi tʼatsʼe Niná kʼoa ngisaa timachjénngáni ndʼai nga kʼuínyasoán (Hech. 13:48). Tsa ska̱jiaan je chjota xi nda kjuinrʼoéná nga tiʼmiyasoán, kʼoakʼuínlee tsa mele skótʼaya kʼoa kʼoakʼuínlee nga katafi je kjoajtín xi satíoná. Tsa kʼoasʼiaan, kuisenkaoñá nga kui kjoanda sʼe̱le nga koa̱n kʼoéjna ngantsjai nichxin (Mat. 7:14).
KJOAJNDA 64 Kao kjoatsjoa kʼoéxkoá chjota
[Nota]
a Hebreos 11:6: “Tsa tsín makjainná, likui nda sʼekon Niná xi tʼatsaan. Je xi faʼaikonle Niná, machjén nga koa̱nkjainle nga tíjna Niná, kʼoa nga Niná tsjoá chjíle je chjota xi nʼio básjai nga je”.
b 1 Corintios 9:26: “Kʼoasʼin an toka, likui joni tsa je xi tsí be kixi. Kʼoasʼin kjankoa, likui joni jngo xi tobʼé jinsén”.
c 1 Corintios 14:23-25: “Tsa kʼoalanisʼin tsa ngatsʼi naxinandále Cristo tojngo koa̱nña, kʼoa tsa énkjaʼaí nchja̱ ngatsʼi, kʼoa tsa faʼasʼen je xi tsínle je kjoatjaobi axo xi tsín makjainle, a tsí kuitso nga kʼoasʼin ská kjimano. 24 Tonga tsa ngatsʼi nchjaya, kʼoa faʼasʼen jngo xi tsín makjainle axo xi tsínle je kjoatjaobi, kʼoasʼin aon manile jéele xi totʼatsʼe ngatsʼi xi nchjaya, kʼoa kotʼani yaole ni̱ma̱le jo kjoan. 25 Je xi tíjnaʼma yajin ni̱ma̱le, kʼoasʼin ʼyasontsenle. Kʼoasʼin koájnatsakjanngi xko̱n, skoe̱xkón Niná, sikixiya nga ñaki kjoakixi Niná tíjnajinno”.
d Isaías 54:13: “Kʼoa ngatsʼi je xtili jé Jeobá kuitsoyale, kʼoa nʼio tse kjoanyʼán sʼe̱le je xtili”.
e 2 Corintios 10:4, 5: “Je ki̱cha̱ xi tsʼe kjoajchánnajin, ali tsʼejin yaonajin, tonga tjínle nganʼio xi totʼatsʼe Niná, nga sikixoya tojmeni xi nʼio tjío. 5 Nikixoyaijin kjoafaʼaitsjen xi ngʼa tjío kʼoa ngayije kjoa xi ngʼa tjín, xi bisótjen kontrale kjoachjinele Niná. Ndoanʼiuinjin ngayije kjoafaʼaitsjen, jméni nga sitjosonsínile Cristo”.
f XI TÍNCHJA̱NI SÉN XI FAʼAITʼA.: Jao ndsʼee fákaonajmíni Énle Niná jngo chjota xi sondado koan xi ya tíjnajchxo ya ndʼiale. Jao tichjaa xi Énle Niná tífákaoni jngo chjoón xi xtiʼndí tjínle.