Nda biyoaa nga nimiyoaa je ndsʼee

1, 2. Jméni xi ngisa kuenta sʼín je Jeobá kʼoa jméni xi mele nga sʼiaan.

JE Jeobá nʼio kuenta sʼín josʼin ʼyatokoán xíngiaa. Je Jesús kʼoakitso nga kʼoasʼin tsjoacha katamaa xíngiaa josʼin tsjoachaa yaoná (Mat. 22:​37-39). Kui xi tsonile nga nda si̱koaa toʼya chjotani, ninga je xi tsín bexkón Jeobá. Tsa kʼoasʼiaan, jé Jeobá tichjenngilee nga̱ je síʼisenle toʼya chjotani kʼianga bitjo tsʼuí kʼoa síkʼanele jtsí ngatsʼi chjota, ni je xi tsʼen kʼoa ni je xi nda chjota (Mat. 5:45).

² Ningalani tsjoake Jeobá ngatsʼi chjota, ngisaa tsjoake xi je síxále (Juan 14:21). Kʼoa kui xi mele nga kʼoati sʼiaan tsanda ñá nga tsjoacha katamaa je ndsʼee (1 Ped. 4:8; Rom. 12:10). Nga kʼoakji tsjoacha katamaa tojo nikoaa je xi xíngiaa mani kʼoa tsa je xi miyoná mani.

3. Jméni xi tjínnele sʼiaan nga tsjoacha koaan xíngiaa.

³ Tojo nikoaa jngo naxó nga kjitʼa basenndálee, kʼoati tjínnele si̱koaa je xíngiaa, machjén nga kjitʼa kjitʼa koakolee nga tsjoachaa. Je Pablo i kitsole je chjotale Cristo: “Katamatsjoachantsjao ndsʼao” (Heb. 13:1). Je Jeobá kui xi mele nga tsjoacha koaan je xíngiaa. Kʼoa i̱ kjoaʼmiya jebi kui chótʼayajiaan jósʼiaan nga si̱miyoaa je ndsʼee kʼoa ánni machjénni nga kʼoasʼiaan.

ÁNNI MACHJÉNNI NGA SI̱MIYOAA JE NDSʼEE

4. Jméni xi sʼiaan nga tosi tonda chjí jchatokoán nga ndasʼin tiyoaa kao je ndsʼee (Salmo 133:1; kʼoati chótsenlai sén xi faʼaitʼa).

⁴ (Tʼexkiai Salmo 133:1).a Kʼoati nda satío tokoán kʼianga ndasʼin tiyoaa kao je ndsʼee tojo kisʼe kon je xi kiski salmo. Tonga tsa tsínti kuenta sʼianñá josʼin tiyoaa kao ndsʼee ya jinjtín, kʼoajinkoaan tojo ma kʼianga tokʼia ʼya títjoán jngo yá nga nʼio naskánakji, tonga tsa ntsjaintsjai ya kuitjátʼalee chanjin tsínti kuenta sʼianñá jokji. Tikʼoasʼinni, ninga nkjín kʼa ʼyaa je ndsʼee nga jngo xomana, tosi tonda chjí jchatokoán tsa si̱kjaʼaitsjenjiaan nga nʼio ndasʼin tiyoaa.

5. Jósʼin binyakao je xi tokʼia bichótítjon kjoajtín nga tsjoachaa xíngiaa.

⁵ Nga be je chjota xi bichó kjoajtín nga tsjoachaa xíngiaa majinle nga ñaki Énle Niná xi chotʼayá. Je Jesús i kitso: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:35). Kataʼyala jokoan jngo tsoti xi universidad tíkotʼaya xi Chaithra ʼmi. Kʼianga kiskotʼaya Biblia kʼoatsakʼinle nga katafi je kjoajtíntse xi jan nichxin sʼejna. Kʼianga bixine koanxon i kitsole tichjaa xi títsoyale: “Je xijchána nikʼiajinla tsakakóna nga tsjoakena kʼoa tsín kitsoakjána, tonga ndʼaibi jenkjín mani xi katsoakjána. Kʼoasʼin kaʼbeña nga tsjoakena Jeobá kʼoa mena nga ya koatejnajian naxinandále”. Tosi tonda kiskotʼaya Biblia tsoti jebi kʼoa kʼiaa kisʼenngindá nga nó 2024. Nga be nga nda nʼia kʼoa nga nda mangínkoaa xíngiaa, je chjota xi tokʼia bichótítjon kjoajtín mamele kotʼaya Énle Niná (Mat. 5:16).

6. Jósʼin binyakaoná nga nimiyoaa je ndsʼee.

⁶ Binyakaoná kʼianga nimiyoaa je ndsʼee. Je Pablo i kitsole chjotale Cristo: “Tʼenelao xíngio nga nyaon nyaon, jméni nga nijngojin xi jon koa̱ntajajinkaosínio kjoachʼanachale jée” (Heb. 3:13). Kʼiatsa jetínroajen kjoamakjainná kʼoa tsa jekjaʼaí tinʼia, jé ndsʼee sichjén Jeobá nga koasenkaoná (Sal. 73:​2, 17, 23). Nʼio nda binyakaoná kʼianga nimiyoaa je ndsʼee.

7. Ánni nga nda biyoñá kao je ndsʼee kʼianga tsjoachaa xíngiaa (Colosenses 3:​13, 14).

⁷ Tsee kjoanda tjínná nga nda tiyoaa kao je ndsʼee (1 Juan 4:11). Nga tsjoachaa xíngiaa nichatʼalee kʼianga jotsoná kʼoa tsa josikaoná. Kʼianga kʼoanʼia nda biyokoaa xíngiaa (Efes. 4:​2-6; tʼexkiai Colosenses 3:​13, 14b). Kʼoa toʼi jinnaxinandále Jeobá jñani nda biyoaa.

JCHAXKOÁN XÍNGIAA

8. Jméni xi tísʼín Jeobá nga jtín sʼin tísíkatíoná.

⁸ Ningalani chjotajée maa jtín sʼin tiyoaa kʼoa tojé Jeobá xi kjimale nga kʼoasʼin tísíkatíoná (1 Cor. 12:25). Kui Biblia síchjén nga kʼoatsoná jméni xi sʼiaan nga tosi tonda si̱miyoaa je ndsʼee (1 Tes. 4:9). Kʼoasʼin noʼyañá jmeni xi tsoná je Jeobá kʼianga chotʼayajiaan je Biblia kʼoa nga nitjosoán jmeni xi tso (Heb. 4:12; Sant. 1:25). Kʼoa kʼoanʼia xi testigole Jeobá maa.

9. Jósʼiaan nga jchaxkoán xíngiaa tojo tso Romanos 12:​9-13.

⁹ Jósʼin basenkaoná je Énle Niná nga tosi tonda nimiyoaa je ndsʼee. Kataʼyala jmeni xi kitso je Pablo ya Romanos 12:​9-13c tʼexkiai. Kʼianga kʼoakitso nga jchaxkoán xíngiaa, kui kinchja̱ni nga si̱chatʼalee xíngiaa, nga nda chjota katamaa kʼoa nga kʼoailee jmeni xi tjínná (Efes. 4:32). Ninga tsín ʼya xi nganʼio tísíjéná koaan kuinyakoaa xíngiaa. Tojo kitso je Jesús ngisaa tsjoa sʼe̱ tokoán tsa kʼoasʼiaan (Hech. 20:35).

10. Jósʼin koakoá nga chjotanixá maa (kʼoati chótsenlai sén xi faʼaitʼa).

¹⁰ Kʼianga jekʼoakitso Pablo nga jchaxkoán xíngiaa, kʼoakitso nga si̱xá nga tsín chjotatsʼe katamaa. Kʼianga bʼaixále jngo chjota xi síxá, nda sítjoson je xá xi sʼenele. Proverbios 3:​27, 28 itso: “Tisenkoai je xi nganʼio machjénle tsa bichó nganʼioli nga kʼoasʼiain”. Kʼiatsa jchaa nga nganʼio machjénle xíngiaa tokjoan kuisenkoaa kʼoa tsín kʼoasʼín si̱kjaʼaitsjeen nga kjaʼaí xi tjínnele koasenkao (1 Juan 3:​17, 18).

11. Jméni xi sʼiaan nga tosi tonda si̱miyoaa je ndsʼee.

¹¹ Kʼoatisʼin ʼyaxkónñá xíngiaa kʼianga nichatʼalee tsa ʼya xi jotsoná kʼoa tsa josikaoná. Ya Efesios 4:26 itso: “Ali jtijin mano jo saʼnda nga kantjai tsʼuí”. Machjén nga tokjoan si̱chatʼalee xíngiaa ánni nga tsín ʼnde kʼoainilee je Na̱i tojo tso ya Efesios 4:27. Ya Biblia nkjín kʼa faʼaitʼa nga kʼoatsoná je Jeobá nga tjínnele si̱chatʼalee xíngiaa. Jolani ya Colosenses 3:13 itso: “Tichatʼa ngaʼi̱ngajánlao xíngio”. Ngisaa mamiyoaa je ndsʼee kʼianga nichatʼalee kʼoa nda mangínkoaa xíngiaa kʼianga kʼoanʼia (Efes. 4:3). Tsa tsín si̱chatʼalee xíngiaa alikui nda biyoaa.

12. Jmé xi koasenkaoná nga si̱chatʼalee xíngiaa.

¹² Kʼiatsa ñʼai maná nga nichatʼalee xíngiaa, jé nganʼiotsjele Niná koasenkaoná nga koa̱nná kʼoéndajiaan je kjoa xi sʼená. Kʼianga jekʼoakitso Pablo nga koakolee kjoatsjoacha xíngiaa kʼoa nga chjotanixá katamaa, i kitsosa: “Tsjoakjoa katamao kao Espíritu santo”. Nga kʼoakitso kui kinchja̱ni nga kui nganʼiotsjele Niná basenkaoná nga nichatʼalee xíngiaa kʼoa nga bakolee kjoatsjoacha (Rom. 12:11). Kʼoakʼuínlee je Jeobá nga tosi tonda katatsjoáná je nganʼiotsjele (Luc. 11:13).

ALIKUI XKOA̱YA KUIYOAA

13. Jméni xi xkoa̱ya sʼin sikatíoná.

¹³ Kjaʼaí kjaʼaí nʼia ngatsʼiaa xi tiyoaa ya jinjtín (1 Tim. 2:​3, 4). Nga kjaʼaí kjaʼaísʼin koanjchíngaa kʼoati kjaʼaí kjaʼaísʼin nikjaʼaitsjeen tʼatsʼe josʼin nixkiaa, josʼin bʼetsaojiaan kʼoa josoyoaa. Tonga tsa tokui kuenta sʼiaan josʼin nikjaʼaitsjeen alikuijin nda kuiyoaa ya jinjtín (Rom. 14:4; 1 Cor. 1:10). Je Niná kʼoatsoná nga tsjoacha koaan xíngiaa, kuinga tsín kʼoasʼin nikjaʼaitsjenñá nga ngisa nda nʼia tikʼoajinni josʼín xi ngikʼa (Filip. 2:3).

14. Jméni xi sʼiaan nga si̱nʼiojiaan xíngiaa, kʼoa ánni machjénni nga kʼoasʼiaan.

¹⁴ Kʼianga tsín xkoa̱ya kuiyoaa ya jinjtín koaan si̱nʼiojiaan xíngiaa kʼoa nda tso én chja̱koaa (1 Tes. 5:11). Tobʼelañá, nda chjoéyaa je chjota xi bichó ijngokʼani ya jinjtín, jolani xi jekjoatse kʼoa tsa chriansʼa kisikjinle Niná kʼoa tsa jeje̱ xi kichʼasjejin jinjtín (2 Cor. 2:8). Jngo tichjaa xi jete nó nga kisikjinle Niná kʼoatso jokisʼin je ndsʼee kʼianga kicho ya Ndʼia jña chotʼayá. Itso: “Nʼio tsjoa tjíole ngatsʼi kʼianga kiskoéyana” (Hech. 3:19). Jókisʼe kon tichjaa nga kʼoakoantʼain. Itsosa: “Jé Jeobá tsakasenkaona nga tsjoa kisʼe ijngokʼani tokoan”. Kʼiatsa kuinyakoaa xíngiaa, ñá sichjénná je Jesús nga si̱nʼiojiaan je xi nganʼio machjénle (Mat. 11:​28, 29).

15. Jmésani xi sʼiaan nga nda kuiyokoaa xíngiaa (kʼoati chótsenlai sén xi faʼaitʼa).

¹⁵ Kʼoati nda biyokoaa xíngiaa kʼianga chosonnilee jobixoán. Ya Job 12:11 itso: “Je xo̱ñoaa nrʼoé jmeni xi bixoán, tojoma je nijeen nga be jochine je tsojmi”. Tojo sʼín jngo chjota xi tsojmi bʼénda nga títjonkjoanla kotʼa jóchine xi tíbʼénda nga kjesa tsjoájinle xi kjaʼaí, kʼoati nʼia tsanda ñá, títjonkjoanla chosonnilee jmeni xi bixoán ánni nga kuinyakaoni xi kjaʼaí (Sal. 141:3; Efes. 4:29).

16. ʼYásani xi kʼoati tjínnele nda tso én kuinchja̱.

¹⁶ Je ndsʼee xi jechixan machjén nga nda tso én kjoakao je yánchjínle, kʼoa je xi xijchá ma kʼoati machjén nga nda tso én kjoakao je ʼndíxtile (Col. 3:​19, 21; Tito 2:4). Kʼoati binyakaoná ngatsʼiaa jmeni xi tso je xi chjotajchínga sʼin tjío (Is. 32:​1, 2; Gál. 6:1). Je Biblia itso: “Jngo én xi kʼiakjoan nokjoaa nga machjén kjaínga nda síkao je xi nrʼoé” (Prov. 15:23).

KOAKOÁ NGA TSJOACHAA JE XÍNGIAA

17. Jméni xi sʼiaan nga kʼoasʼin tsjoacha koaan xíngiaa jotso je Biblia.

¹⁷ Je Juan itso: “Tjaocha katamaa xíngiaa. Ali toʼén kuinókjoaa, tonga je kjoatjaocha xi kjoakixi xi sʼiaan” (1 Juan 3:18). Kʼianga si̱kʼayalee nichxin je ndsʼee ngisaa koa̱nmiyoaa kʼoa kʼoasʼin tsjoacha koaan xíngiaa tojo tso je Biblia. Koaan chja̱kaonajmiá xíngiaa kʼianga bichoaa kjoajtín kʼoa nga bitjokʼinyasoán. Kʼoati koa̱n koanngínni̱xatʼaa je ndsʼee ya niʼyale. Tsa kʼoasʼiaan, kʼoati i̱ kʼuínná: “Jekʼoasʼin kichotʼayao tsʼe Niná josʼin nga matsjoachao xíngio” (1 Tes. 4:9). Kʼoa ñaki jchañá nga kʼoatjín jotso je Biblia kʼianga i̱ tso: “Nʼio nda kʼoa nʼio matsjoaná nga jtín tjío je ndsʼee” (Sal. 133:1).