KJOAʼMIYA XI CHOTʼAYA 15
KJOAJNDA 30 Nʼaina, Ninána, miyona
Basenkaoná nga nichriantʼalee Niná
“Tonga xi an, kʼianga sichriantʼale je Niná nʼio nda basenkaona” (SAL. 73:28).
XI TÍNCHJA̱NI
Jméni xi sʼiaan nga si̱chriantʼalee Niná kʼoa jósʼin basenkaoná nga kʼoanʼia.
1, 2. 1) Jónʼia nga nimiyoaa tsa ʼyani. 2) Jmé xi chótʼayajiaan i̱ kjoaʼmiya jebi.
SI̱KJAʼAITSJENJINLA jókoanni nga miyo sʼin kichobá tsa ʼyani, yajin kinroani nga tsaʼyaa josʼin tísíjchá yaole, nga kitsoyaná jmeni xi sasénle kʼoa jmeni xi mai. Kʼoajinti kichjenngilee nga nda sʼín kʼoa sa koanmiyo sa koanmiyoñá.
2 Tsee nichxin tjenkao nga mamiyoaa tsa ʼyani kʼoa kʼoati maa xi kao Niná. I̱ kjoaʼmiya jebi kui chótʼayajiaan jméni xi sʼiaan nga tosi tonda si̱chriantʼalee Jeobá kʼoa jósʼin basenkaoná nga kʼoanʼia.
3. Ánni machjénni nga kui si̱kjaʼaitsjejiaan josʼin bichómani nga je Jeobá nichriantʼalee.
3 Tosi tonda koa̱nchriantʼalee je Jeobá tsakui si̱kjaʼaitsjenjiaan nga ndasʼin bichómani nga kʼoanʼia (Sal. 63:6-8). Si̱kjaʼaitsjenjinla choa̱ jebi: Ndasʼin biyoaa kʼianga kui chinee je tsojmi xi tsjoánganʼioná, nga ʼyoá nandá, nga ejercicio nʼia kʼoa nga nda soyofe. Ninga kʼoalani, nkjín chjota xi tsín kuenta sʼín jebi, tonga tokʼiaa nga kʼoasʼin si̱kuindaa yaoná tsa kjitʼa si̱kjaʼaitsjenjiaan nga ndasʼin bichómani nga kʼoanʼia. Tikʼoasʼinni, tosi tonda je Jeobá si̱chriantʼalee kʼiatsa kui si̱kjaʼaitsjenjiaan je kjoanda xi tjenkao nga kʼoanʼia (Sal. 119:27-30).
4. Jókitso je xi kiski Salmo 73:28.
4 (Tʼexkiai Salmo 73:28).a Je xi kiski Salmo 73 yaa kitjenni je Leví kʼoa yaa kisikjane ya yo̱ngo̱. Ningalani jenkjín nó tjínle nga je Jeobá tísíxále, koanjinle nga nʼio chjíle nga nichriantʼalee Jeobá, kʼoa kui xi koanmele nga kʼoati katasʼín xi kjaʼaí. Kuila kataʼyaa ndʼaibi ánni nga ndatjínni nga je Jeobá nichriantʼalee.
TSJOA SʼE TOKOÁN NGA JE NINÁ NICHRIANTʼALEE
5. 1) Ánni nga tsjoa sʼeni tokoán nga je Jeobá nichriantʼalee. 2) Jósʼin basenkaoná je kjoachjine xi tsjoáná Jeobá (Proverbios 2:6-16).
5 Kʼianga tosi tonda nichriantʼalee je Jeobá sa tsjoa sa tsjoa sʼe tokoán (Sal. 65:4). Tobʼelañá, nda biyoaa kʼianga nitjosoán je kjoafaʼaitsjen xi tsjoáná Énle Niná. Kʼoa je kjoachjine xi tsjoáná basenkaoná nga tsínkui xi chʼaotjín kʼoanʼia kʼoa nga tsín jée bijnyaa (tʼexkiai Proverbios 2:6-16).b Kuinga i̱ tsoni Biblia: “Tsjoa tjínle je chjota xi masjaile kjoachjine kʼoa je chjota xi sokóle kjoamajintokon” (Prov. 3:13).
6. Ánni nga tsínti tsjoa kisʼeni kon je xi kiski Salmo 73.
6 Alikui kui xi tsonile nga totsjoa sa̱tíoná ngantsjai kʼianga je Jeobá tinixálee. Je xi kiski Salmo 73 alikui titsjoa kisʼeni kon kʼianga kui kuenta kisʼin nga ndatjío je chjota xi tsín bexkón je Jeobá kʼoa xi tsín sítjoson kjoatéxomale. Koanxinkonke je chjotatsʼen kao chjota xi ngʼakon nga̱ kʼoasʼin kisikjaʼaitsjen nga tsín jme kjoañʼai faʼá, nga tosa ndatjío kʼoa nga tjínle tao̱n (Sal. 73:3-7, 12). Kisijtile yaole kʼoa kʼoakitso nga toxitsjoani nga je Jeobá tísíxále. Nga nʼio ba kisʼe kon i kitso: “Toxitsjoani nga nda tisʼian kʼoa nga tsje tifikoa yaona” (Sal. 73:13).
7. Jósʼiaan kʼianga nda sʼe̱ ijngokʼani tokoán kʼiatsa ba tjínná (kʼoati chótsenlai sén xi faʼaitʼa ya portada).
7 Kʼianga ba kisʼe kon je xi kiski Salmo 73 tsakásjai nganʼio, yaa ki ya yo̱ngo̱ kʼoa jé Jeobá tsakasenkao nga nda kisʼe ijngokʼani kon (Sal. 73:17-19). Nga miyoná mani je Jeobá be kʼiáni nga ba satío tokoán, kuinga koa̱n si̱jénilee nganʼio kʼianga kʼoétsʼoalee. Kui Biblia síchjén Jeobá nga tsjoáná kjoafaʼaitsjen, kʼoati je ndsʼee síchjén nga basenkaoná. Tsa si̱tjosoán jmeni xi tso Biblia kao jmeni xi kuitsoná je ndsʼee, nda sa̱tío tokoán nga tosi tonda je Jeobá si̱xálee. Ninga sakʼoa nʼio si̱kjáojiaan, jé Jeobá koasenkaoná nga nda sʼe̱ ijngokʼani tokoán (Sal. 94:19).c
Je xi kiski Salmo 73 yaa séjna ya nitsinle yo̱ngo̱ (chótsenlai párrafo 7)
TSJOA SʼE TOKOÁN NGA NICHRIANTʼALEE NINÁ KʼOA SʼEENÁ KJOACHOYA
8. Jósasʼin basenkaoná nga nichriantʼalee Niná.
8 Tsee kjoanda sokóná nga nichriantʼalee Niná. Jaola koya si̱kʼaxkiaa. Xi títjon, nda satío tokoán. Kʼoa xi majaoni, kui choyalee nga nda kuiyoaa nichxin xi sʼa nroa (Jer. 29:11). Chótʼayajinla nga jngó jngó koya jebi.
9. Ánni nga nda satíoni tokoán nga nichriantʼalee Niná.
9 Nkjín chjota xi tsín nda tjío kon nga̱ kʼoasʼin makjainle nga tsín Niná kʼoa kʼoatso nga kjoaʼaí jngo nichxin nga kjoesoán ngatsʼiaa. Tonga nga nichriantʼalee Jeobá nda satío tokoán nga̱ ʼyañá jotso je Biblia kʼoa kui xi bʼéjngo tokoán nga tíjna kjoaixi Niná kʼoa nga sichikontʼainná tsa tosi tonda si̱chriantʼalee (Heb. 11:6). Machjénná nga kʼoétsʼoalee je Niná nga̱ toxá kʼoasʼin kisindaniná, kuinga nda satíoni tokoán nga je nixálee (Deut. 10:12, 13).
10. Tojo tso Salmo 37:29, jmé kjoanda xi koyale xi je Jeobá sínʼiotʼa.
10 Nkjín chjota xi tsín jme kjoachoya tjínle nga̱ tsín kuenta sʼín je Niná. Tokui fini nga síxá, nga ʼndíxtile síjchá kʼoa nga batíotjao choa tao̱n xi sichjén kʼianga jekoa̱njchínga. Tonga ñá, kuenta nʼia Niná nga̱ tjínjngoo tokoán nga je sikuindaná kʼoa nga sitjoson ngayeje jmeni xi tso (Sal. 25:3-5; 1 Tim. 6:17). Tsee kjoanichikontʼain sʼe̱ná nichxin xi nroaján kʼoa jé Jeobá jchaxkoán ngantsjai nichxin (tʼexkiai Salmo 37:29).d
11. Jmé kjoanda xi sʼená nga nichriantʼalee Niná, kʼoa jósʼe kon nga kʼoanʼia.
11 Nkjín koya anni nga nda satíoni tokoán nga nichriantʼalee Niná. Tobʼelañá, je Jeobá síchatʼaná kʼianga kʼoamaniná je jéená (Is. 1:18). Kʼoa kʼianga jesíchatʼaná alikui koa̱n tojo kui si̱kjaʼaitsjenjiaan jñani chʼao kinʼia ngasʼa (Sal. 32:1-5). Tsjoa satío tokoán nga nichriantʼalee je Jeobá kʼoa je kʼoati nda sʼe kon (Prov. 23:15). Tsesa kjoanda tjínná nga miyole maa. Tonga jméni xi sʼiaan nga tosi tonda si̱chriantʼalee Niná.
JMÉNI XI SʼIAAN NGA TOSI TONDA SI̱CHRIANTʼALEE NINÁ
12. Jméni xi machjén nga kʼoasʼiaan ngantsjai.
12 Tsa jetsangínsʼenngindá jejin nkjín koya ʼyaa xi tʼatsʼe Jeobá kao xi tʼatsʼe Jesús. Jekʼoakoanniná je jéená, makjainná tʼatsʼe Niná kʼoa nitjosonñá kjoatéxomale. Nga kʼoanʼia, machriantʼalee je Jeobá. Tonga machjén nga kʼoasʼiaan ngantsjai ánni nga tosi tonda koa̱nchriantʼanilee (Col. 2:6).
13. Jñánile xi jan koya kʼoasʼiaan nga tosi tonda koa̱nchriantʼalee Niná.
13 Jméni xi sʼiaan nga tosi tonda koa̱nchriantʼalee je Jeobá. Xi títjon, machjén nga kʼoéxkiaa je Biblia kʼoa chótʼayajiaan, alikui koa̱n nga tokʼoéjngoaa tokoán jojekji ʼyaa tʼatsʼe Niná, machjén nga tosi tonda katamajinná jméni xi mele nga sʼiaan kʼoa kʼoasʼin kjuinkoaa yaoná jotso Biblia (Efes. 5:15-17). Xi majaoni, nga nʼio sʼe̱jna kjoamakjainná machjén nga si̱kjaʼaitsjejiaan jósʼin bakóná je Jeobá nga tsjoakená. Kʼoa xi majanni, tjínnele tosi tonda jticha koaan jmeni xi jtike Jeobá kʼoa tsín je kjoájtaa chjota xi tsín nda sʼín (Sal. 1:1; 101:3).
14. Jméni xi sʼiaan nga tsjoa katasʼe kon Jeobá (1 Corintios 10:31; kʼoati chótsenlai sén xi faʼaitʼa).
14 (Tʼexkiai 1 Corintios 10:31).e Nʼio chjíle nga kui kʼoasʼiaan jmeni xi tsjoa kʼoe kon je Jeobá. ʼMiyasonñá kʼoa mangínñá kjoajtín, tonga kʼoati machjén nga si̱kjaʼaitsjenjiaan nga nyaon nyaon jméni xi sʼiaan nga tsjoa kʼoé kon je Jeobá. ʼYañá nga kui xi mele nga tsín chʼa̱nachaa kʼoa nga kʼoailee xi kjaʼaí jmeni xi tjínná (2 Cor. 8:21; 9:7). Kʼoati kui xi mele nga chjí jchatokoán je kjoabijnachon xi títsjoáná, kuinga nikuindañá yaoná kʼoa chosonnilee jokji bichaa kʼoa jokji ʼyoá. Sa tsjoake sa tsjoake maná je Jeobá kʼianga bʼenelee yaoná nga kui kʼoanʼia jmeni xi sasénle (Luc. 16:10).
Tsjoa sʼe̱ kon Jeobá tsa nda chósonnilee josʼin si̱xákoaa carro, tsa si̱kuindaa yaoná, tsa sʼiaan ejercicio, tsakui chi̱nee xi tsjoánganʼioná kʼoa tsa nda chjota koaan (Chótsenlai párrafo 14)
15. Jósʼin jchatokoán xi kjaʼaí.
15 Je Jeobá bakóle kjoanda toʼya chjotani, ni je síxále kʼoa ni mai (Mat. 5:45). Kʼoa kui xi mele nga kʼoati sʼiaan tsanda ñá. Kui xi mele nga tsín chʼaosʼin si̱kʼaxkiaa xi kjaʼaí, nga tsín ʼya xi kʼoékjaoʼakoaa kʼoa nga nda si̱koaa toʼyani (Tito 3:2). Kuinga tsín chʼasjengiñá je xi tsín makjainle Énle Niná (2 Tim. 2:23-25). Kʼoa ngisaa machriantʼalee je Jeobá kʼianga nda nikoaa ngatsʼi chjota.
KOAAN SI̱CHRIANTʼALEE NINÁ NINGA SAKʼOA TSÍN NDA NʼIA
16. Jókisʼe kon je xi kiski Salmo 73.
16 Je xi kiski Salmo 73 kʼoasʼin kisikjaʼaitsjen nga jekjimakjinle Niná. Tsakui nichxin kʼoati satío sakʼoa tokoán tsanda ñá. Je xi kiski salmo jebi i kitso: “Je ndso̱koa tome xin ndiaa ki, je ndso̱koa tome kijbe” (Sal. 73:2). Kʼianga kisijtile yaole kʼoakitso nga to chjotachini koan kʼoa nga ya koanngóson joni jngo cho̱ nga tsín jme xi majinle (Sal. 73:21, 22). Tonga a kʼoasʼin kisikjaʼaitsjen nga tsínti tsjoakeni je Jeobá kʼianga tsín nda kisʼin.
17. 1) Jméni xi kisʼin je xi kiski Salmo 73 kʼianga nʼio ba kisʼe kon. 2) Jmé xi bakóyaná jokisʼin (kʼoati chótsenlai sén xi faʼaitʼa).
17 Tsa kʼoalani sʼin kisikjaʼaitsjen je xi kiski Salmo 73 nga tsín titsjoakeni je Jeobá tochoatsejin nga kʼoakisʼe kon, nga̱ koanjinle nga tjínnele sichriantʼa ijngokʼanile Niná. I kitso: “Ji tijnakaole ngantsjai; ji tindoai ndsa̱ ngakixi. Kao kjoafaʼaitsjenli fandiaaninái, kʼoa xijekoa̱n, chʼa̱sjengʼanái” (Sal. 73:23, 24). Koaan si̱jélee nganʼio je Jeobá kʼiatsa jetínroajen kjoamakjainná kʼoa tsa tsín ndatjín tokoán xi totʼatsʼe nga chʼao kinʼia (Sal. 73:26; 94:18). Kʼoa tsa kʼia nga jetsakijnyijée koaan si̱chriantʼa ijngokʼanilee Jeobá nga̱ tjínjngoo tokoán nga sichatʼaná (Sal. 86:5). Ngisaa timachjénngáni nga si̱chriantʼalee je Niná kʼianga tsín nda satío tokoán xi totʼatsʼe nga tsín nda nʼia (Sal. 103:13, 14).
Kʼiatsa jetínroajen kjoamakjainná koaan si̱chriantʼa ijngokʼanilee Jeobá (Chótsenlai párrafo 17)
SI̱CHRIANTʼALEE NINÁ NGANTSJAI
18. Ánni nga si̱chriantʼanilee je Jeobá ngantsjai nichxin.
18 Sa tse sa tsee jchaa tʼatsʼe Jeobá kʼianga si̱chriantʼalee kʼoa tosi tonda kʼoasʼiaan ngantsjai nichxin. Ya Biblia kʼoatso nga tsín fetʼa je kjoachjinele Niná kao kjoankjíntokonle kʼoa nʼio tochoa xi ʼyaa ndʼaibi xi tʼatsʼe (Rom. 11:33).
19. Ánni nga nda bʼéni tokoán jmeni xi tso Salmo 73.
19 Salmo 79:13 itso: “Jin xi naxinandáli maijin, xi barréli maijin, kʼoailaijin kjoanda ngantsjai kʼoa chʼa̱sjejeyalaijin ngantsjai”. Kʼiatsa tosi tonda si̱chriantʼalee je Jeobá tjínjngoo tokoán nga sichikontʼainná kʼoa kʼoakuixoán jokitso je xi kiski Salmo 73 nga i̱ kitso: “Ningalani tsínti chókjoanile je yaona kao ni̱ma̱na, tonga jé Niná xi na̱xi̱na ma kʼoa tsínsa ʼya xi tjínna xi kjaʼaí” (Sal. 73:26).
KJOAJNDA 32 Je Niná tʼainganʼiolai
a Salmo 73:28: “Tonga xi an, kʼianga sichriantʼale je Niná nʼio nda basenkaona. Jé Jeobá xi batéxomale ngayeje tisinʼiotʼa, kʼianga xínya ngayeje xáli”.
b Proverbios 2:6-16: “Nga̱ jé Jeobá xi male tsjoá kjoachjine; yaa tsʼoa bitjoni je kjoankjíntokon kao kjoamajintokon. 7 Tsjoále kjoachjine je chjota xi kixi, síkuindaa je chjota xi kixi tjíotsoma. 8 Síkuindaa je ndiaa xi kixi kʼoa síkuindaa chjota xi kixi. 9 Kʼoa koa̱njinli josʼin tíjna je xi kixi kao xi ndatjín. 10 Kʼianga kjoaʼasʼenjin ni̱ma̱li je kjoachjine kʼoa nga tsjoacha koai̱n je kjoankjíntokon, 11 koasenkaoli nga nda si̱kjaʼaitsjain kʼoa je kjoamajintokon sikuindali 12 nga tsínkui kʼoasʼiain josʼín je chjota xi tsín kixi tíjna jmeni xi tso, 13 xi síkatío ndiaa xi kixi nga ya fiya ndiaa xi njion chon, 14 xi tsjoake nga kui kʼoasʼín xi chʼaotjín kʼoa xi kjoatsʼen tsjoake, 15 xi tsín nda ndiaa tjíofiya kʼoa xi tsín tinda tjíofikaoni yaole. 16 Je kjoachjine koasenkaoli nga tsín ya sisinlai je chjoón xi tsín ndasʼin tífikao yaole kʼoa nga tsín ya kʼoanachali je chjoónchajngi”.
c Tsa tsín tjoxinná je kjoaba kʼoa tsa jetse nga nʼio tinikjáojiaan, koaan kjuinchónlee je chjinexki xi kui xá sʼín nga kuinyakaoná. Yaa tsoyasa xi tʼatsʼe jebi ya Xo̱n xi Bájinkonná número 1 nó 2023.
d Salmo 37:29: “Je xi kixi tsʼee koa̱n sonʼnde kʼoa i koatio ngantsjai nichxin”.
e 1 Corintios 10:31: “Tsa bicho, kʼoa tsa ʼyo, tsa tojmenibe xi nʼiao, kʼoatʼiaon ngayije xi tʼatsʼe kjoajeyale Niná”.