Jé Jeobá tsakasenkaonajin nga koannganajin jñani kinikasénnajin

Je Mats kao Ann-Catrin kʼiaa nga nó 1979 ki Skuela xi tsʼe Galaad. Je ndsʼee Jack Redford xi kitsoyale kʼoakitsole nga katafi tojñani nga ni̱kasén kʼoa nga tsjoa katasatío kon. Nga koanskanni nʼio nkjín ʼnde kinikasén nga kitsjoánganʼio. Jolani Irán, Zaire, Tanzania, Mauricio kao Myanmar. Je kjoafaʼaitsjen xi tsakʼaile nʼio nda tsakinyakao nga koanngale jñani kinikasén. Katabʼéyanajmílaná jmeni xi kisʼin.

A koaan kʼoéyanajmínáijin jósʼin tsaʼyaño je Énle Niná.

Mats: Je xijchána yaa tsakatio ya Polonia kʼianga kisʼejna Kjoajchántse xi majaoni. Tsabe nga je chjota católico likuini sítjoson jmeni xi ʼmiyale. Ninga kʼoalani, kʼoasʼin kisikjaʼaitsjen nga tíjna jngo religión xi tsoya xi kixi tjín kʼoa xi sítjoson jmeni xi ʼmiyale. Nʼio nkjín libro jchá batse. Ñandia nga jngo libro xi azul kji tsakatse xi ʼmi La verdad que lleva a vida eterna. Koanndosinna jmeni xi tso libro jebi kʼoa tojngo nitjeen tsakʼexkiaña ngayeje. Kʼianga jekisʼesén ñaki kisʼejngo tokoan nga tíjna jngo religión xi sítjoson jmeni xi tsoya.

Tjen sá abril nga nó 1972 nʼio nkjín xo̱n tsakʼexkia xi bʼasje je testigole Jeobá. Kʼoa koanjinna nga ya Biblia faʼaitʼa jmeni xi tsín ʼbe. Kʼianga tsaʼbe jmeni xi bakóya je Biblia kʼoakisʼe tokoan jokisʼe kon je chjota xi tsojmi tsakaténa xi kisikʼaxki̱ Jesús. Kʼianga jekisokole je tofangi xi nʼio chjíle tsakaténa ngayeje jmeni xi tjínle. Jmeni xi kisʼian an kʼianga kiskotʼaya je Énle Niná kuinga tsínti kiña universidad nga̱ tʼatsʼe chjinexki skotʼaya tsakai (Mat. 13:​45, 46). Kʼiaa kisʼe̱nngindá nga 10 sá diciembre nó 1972.

Tojngo nó jaʼato kʼoa je xijchána kao ndsʼe xi maʼndí kʼoati kiskotʼaya je Énle Niná kʼoa kisʼenngindá. Kʼoa kʼianga sá julio nga nó 1973 precursor sʼin kisixá. Ya jtín jñani tijna jngo tichjaa tíjna xi kʼoati precursora sʼin tísíxále Niná, koantsjoake̱ña kʼoa kʼiaa chixainjin nga nó 1975. Nga koanskanni ño nó kitsʼainganʼiuijin ya Strömsund. ʼNde jebi yaa tíjna ya naxinandá Suecia kʼoa nkjín chjota xi kiskotʼaya Énle Niná.

Ann-Catrin: Kʼianga tíkotʼaya je pana ya universidad kʼoati kʼia kiskotʼaya Biblia ya naxinandá Estocolmo. Ningalani tokʼia janna sá kikaona kjoajtín xi satío kʼoa kʼoati kikaona nga kitsoyason. Nga kʼoakisʼin je pana, alikui kisasenle je mana. Kʼoakitso nga tsín kʼoatjín jme xi tsoya je testigole Jeobá. Tonga nga jeki nichxin kʼoati kisʼenngindá. Kʼiaa kisʼe̱nngindá nga 13 nóna kʼoa kʼianga 16 nóna precursora sʼin kisixá. Nga kitsjoanganʼioa ya ʼnde jña Umeå ʼmi jñani ngisa machjén xi tsoyason, kʼoatsakʼinna nga precursora especial sʼin sixá.

Kʼianga jechixainjin nkjín chjota tsakʼinyalaijin Biblia. Kʼoati tsakʼinyalaijin je Maivor, jngo tsoti xi nʼio tsjoake koan nga kisiská kʼoa kui xi koanmele nga nʼio tse tao̱n kuinje̱le kʼoa nga nda kʼoaxki̱. Ninga kʼoalani, likui tikʼoakisʼinni, tosaa precursora regular sʼin kisixá kʼoa ñatjen kitsoyason kao tsoti tichja xi maʼndí. Nga jao kʼiaa ki Skuela xi tsʼe Galaad nga nó 1984 kʼoa ndʼai misionera sʼin tjíosíxá ya Ecuador.

Nga misionero sʼin tinixáo, jmé xi basenkaono nga mangano jñani nikasénno.

Mats: Nga xinxin ʼnde kinikasénnajin kui xi tsakasenkaonajin nga tsangíntjenngijin je choa̱le Jesús nga nangitokon koan (Col. 2:​6, 7). Tobʼelañá, ʼndele nga kʼoasikaonajin ndsʼee josʼin nganajin tosaa kʼoasʼin kiningalaijin yaonajin josʼin ngale. Kinijinlaijin yaonajin josʼin tjíosíjchá yaole kʼoa josʼin síkjaʼaitsjen. Nga kʼoasʼin tsangíntjenngijin choa̱le Jesús tsjoa kisʼe tokuinjin. Kʼoakoainjin tojo ma jngo yá xi ya sénndai xo̱ngá, kʼoa tosi tonda koannganajin jñani kinikasénnajin (Sal. 1:​2, 3).

Ann-Catrin: Kʼianga xinxin ʼnde nikasénná yaa mangósoán joma jngo yá nga xin sʼentje ijngokʼa. Je Jeobá k’oas’in tsakasenkaonajin josʼin basenkao tsʼuí je tsojmintje (Sal. 84:11). Nga tsakasenkaonajin ndsʼee kʼoa nga tsakakónajin kjoatsjoacha jéni Jeobá xi kʼoasʼin kisichikontʼainnajin. Ningalani tochoa koainjin ya jtín jñani tsakʼainganʼiuijin ya Teherán, xi ya nchja̱ni naxinandá Irán, nʼio nda chjota je ndsʼee, kʼoasʼín jokisʼin je choʼndale Niná xi tsakatio nichxin kjoatse. Koanmenajin nga toya ndiaa kuiyuijin ya Irán tonga kʼianga sá julio nga nó 1980, je chjotaxá xi ya tsʼe tsakʼéchjoale xále Niná. Kʼoa to 48 hora kitjoʼndenajin nga kitjuijin naxinandá jebi. Yaa kinikasénnajin ya África jñani Zaire ʼmi tsakai, kʼoa ndʼai República Democrática del Congo ʼmi.

Kʼianga kisʼejinna nga ya África ni̱kasénnajin, ñaki kiskiʼndáña. Kitsokjonña nga̱ kʼoasʼin ʼyale ʼnde jebi nga ye̱ tjín kʼoa nga chʼin tjín. Jao miyonajin xi nkjín nó kitsjoanganʼio ya África, i kitsonajin: “Likʼoajinla bixón, tangíon kʼoa koa̱nngano”. Kʼoatjín jokitsonajin. Je ndsʼee xi Zaire tsʼe nʼio nda chjota. Kʼianga jejaon nó jaʼato kisʼechjoale xále Niná. Tiʼan tokʼoakoannina nga kʼoakixinle Jeobá nga katatsjoáʼndenajin nga tosi tonda ya kʼoainganʼiuijin África.

A koaan kʼoéyanajmínáijin jméni xi ngisa tsjoa tsakáya tokon nga jenkjín nó kʼoasʼin tinixáo.

Mats: Xi ngisa tsjoa tjíobʼé tokuinjin kuiní nga nʼio nkjín miyo tjínnajin xi misionero sʼin tjíosíxá nga xinxin ʼnde. Kʼoati nkjín chjota tiʼmiyalaijin Biblia. Sakʼoala 20 ʼmiyalaijin nga jngó jnguíjin. Kʼoati tsjoa tjín tokoan josʼin tsabekonnajin je ndsʼee xi África tsʼe. Kʼianga ya tiyuijin jñani Tanzania ʼmi yaa tsakajnaijin carronajin ya ndʼiale ndsʼee kʼoa kui kisoyoyaijin. Ninga tsín jme xi tjínle ndsʼee nʼio nda chjota kʼoa kitsjoanajin jme xi koanchjénnajin (2 Cor. 8:3). Xi kʼoati nʼio tsjoa tsakʼé tokuinjin kʼiaa nga kui chobayanijin josʼin kanixálaijin Jeobá nga kui nichxin kʼianga tojeme sóyuijin. Nyaon nyaon kʼoakinʼiaijin kʼoa tsakʼailaijin kjoanda Jeobá nga tíbasenkaonajin.

Ann-Catrin: Tsjoa tjín tokoan nga tiʼbexkoan je ndsʼee xi xinxin naxinandále. Kjimanajin je én francés, luganda, persa kao suajili. Kʼoati tiʼyaijin josʼin síjchá yaole chjota nga xinxin naxinandá. Tiʼmiyalaijin xi kjaʼaí ndsʼee, tjínnajin miyo kʼoa tsjoa tjín tokuinjin nga ñatjen tinixálaijin Jeobá (Sof. 3:9).

Nga kʼoasʼin xinxin ʼnde tinixálaijin Jeobá, nkjín koya jmeni xi kisinda tiʼyaijin. Kʼianga xinxin ʼnde nikasénnajin nʼio tsjoa satío tokuinjin nga̱ ʼyaníjin nga je Jeobá bándiaanajin. Nga je Jeobá tinixálaijin nʼio tse jme xi tiʼyaijin. Alikuijin kʼoasikji ʼnde jchaijin tsa tojinjin.

Jmé kjoa xi tibitjatojion kʼoa jméni xi tinʼiao nga tíchókjoajinno.

Mats: Jokji tse nga ya tinixálaijin Jeobá ya África nkjín koya chʼin tsakʼetʼanajin, kʼoati koannajin chʼin xi malaria ʼmi. Kʼoa je Ann-Catrin jenkjín kʼa kitiya. Xi kʼoati nʼio koankjáojinnajin kʼiaa nga jekoanjchínga xijchánajin. Bʼailaijin kjoanda xtindsʼaijin nga je kisikuinda (1 Tim. 5:4). Nga tsín kʼoakoannajin nga kinikuindaijin xijchánajin nga kjin tiyuijin, sakʼoa tsín nda kisatio tokuinjin.

Ann-Catrin: Kʼianga nó 1983 nga tiyuijin ya Zaire, chʼin cólera koanna. Je chjinexki i kitsole Mats: “Kjitʼanangi xin ʼnde tangínkao”. Nga koannyaonni kʼiaa tsangínjin ya Suecia kʼoa tokuisa avión xi chʼá bʼa tsangínkoaijin.

Mats: Koanndayani Ann-Catrin ningalani kʼoakitsonajin chjinexki nga tsín tikoa̱nndayani. Kichjiʼndáníjin nga̱ kʼoasʼin kinikjaʼaitsjainjin nga tsínti koa̱n misionero sʼin si̱xánijin. Tonga jngo nó koanskanni yaa Zaire tsangín ijngokʼaijin. Yaa kinikasénnajin jña tíjna jngo jtín jñani én suajili nokjoa ya Lubumbashi.

Ann-Catrin: Kʼianga tiyuijin ya Lubumbashi, kisʼena ʼndí tsakai tonga tokiskajenchjiʼndé. Ninga tsínlani kui kinikjaʼaitsjainjin nga xti sʼe̱najin tsakai tonga nga kʼoakoan nʼio ba kisʼe tokoan. Ninga ba kisatio tokuinjin jé Jeobá tsakasenkaonajin. Nga kʼia, nʼio nkjín koanni chjota xi tsakʼinyalaijin Biblia. To 35 mani tsakai publicador kʼoa tsín jngó nó jaʼato nga 70 koanni. Kʼoa xi bichó kjoajtín to 40 mani tsakai, tonga nga jekoanni 220 koanni xi kicho. Jé Jeobá kitsjoanganʼionajin kʼoa ñaki tokui xá kinʼiaijin nga tsakʼinyasuinjin. Tojo faʼaitsjennajin ʼndíleenajin kʼoa kui chobayanijin kʼoa kui nikjaʼaitsjainjin jme xi sʼin Jeobá nga nda sa̱tío ijngokʼa tokuinjin.

Mats: Xijekoanni, je chjoónna toʼindasa kisʼe kon kʼoa alikui tikisʼenile nganʼio. Nga tikuini nichxin kʼoatsakʼinna nga cáncer tjínna kʼoa kitiyaña. Ndʼaibi nda tijna kʼoa je chjoónna tojo kʼoasʼin tísíxále Jeobá jokji tjen kʼoamale.

Majinnajin nga tsín tsa tojinjin xi kjoa tibitjatojinjin. Kʼoati tse kjoa kisʼe ya Ruanda nga nó 1994. Kʼianga koanskanni tsangínnixatʼaníjin je ndsʼee xi ya tjío jñani nikatío chjota xi xin ʼnde faʼaini. Nga tsaʼyaijin nga nʼio tjío kjoamakjainle, nga tjíokale kʼoa nga tjotʼa jmeni xi tjínle koanjinnajin nga nʼio nda síkuinda Jeobá je choʼndale tojme kjoa xi faʼatojin (Sal. 55:22).

Ann-Catrin: Kʼoati tse kjoa kitjatojinjin kʼianga nó 2007 nga tsangínjin nga kitjoʼai sucursal xi tíjna ya Uganda. Kʼianga jetimangínnijin ya Nairobi (Kenia) 25 mani ndsʼee xi ñatjen kitjainjin xi misionero sʼin tjíosíxá kao xi ya Betel tjío. Kʼianga tojeme bichuijin ya Kenia, jngo carro kisatekjaoʼa je carro xi tiyoyaijin. Kʼien xi tísíxákao carro kʼoa aon ndsʼee kʼien nga kʼia, kʼoa jngo tichjaa xi ya hospital kʼien. Kui xi menajin nga jcha ijngokʼanijin je miyonajin xi ya kʼien (Job 14:​13-15).

Nga jekoanni koanndayaña jñani kitsiʼoan, tonga alikui kichajinnajin jmeni xi koan, kui kisʼeya ʼndeʼnde jkuijin. Je Mats kao an toxijña faʼáskánajin nga njio kʼoa tsokjonña, joxi toxijña sʼe̱jnajyo ni̱ma̱na mana. Xi tsakasenkaona kuinga ntsjaintsjai tsakʼetsʼoale Jeobá. Tsakʼexkiaña Biblia kʼoa kisikjaʼaitsjenjinña jmeni xi tsakʼexkia. Kʼoati tsangínjin tsʼe chjinexki. Tíchókjoanajin nga kui kjoa tibitjatojinjin. Kʼoa kʼianga bʼetsʼoalaijin Jeobá kʼoaʼmilaijin nga katabasenkao xi kʼoati kui kjoa tjíofaʼatojin.

Nga kui tichobayañá jme kjoa xi kitjatojion, kʼoanátibixón nga kʼoasʼin kisikuindano Jeobá josʼin nikuinda je chjao. A koaan kʼoéyanajmínáijin jósʼin tsoyanile nga jo chjao sʼin kisikuindano Jeobá.

Mats: Kʼianga én suajili jngo én tíjna xi i̱ tso: Tumebebwa kama mayai mabichi xi tsonile “kʼoasʼin kisikuindanajin josʼin nikuinda chjao”. Nʼio nda tísíkuindanajin Jeobá tojñani timangínjin nga je tinixálaijin. Kʼoasʼin tísíkuindanajin josʼin síkuinda chjao chjota nga tsín katabakjan. Jokji tse nga ñaki toje Jeobá tinixálaijin tsín jme xi tíchanajin. Kʼoasʼin tiʼyanijin nga tsjoakenajin Jeobá nga kjimandosinle Cuerpo Gobernante josʼin tinixáijin.

Ann-Catrin: ʼYaníjin josʼin tísíkuindanajin Jeobá. Ñandia kinokjoanajin nga kʼoatsakʼinna nga hospital kijna je pana nga nʼio táo. Nga kui nichxin je Mats tokʼiaa kjimaxa̱nnile je chʼin xi malaria ʼmi kʼoa tsínnajin tao̱n kʼianga koanngínjin ya Suecia. Kʼoatsakixuínjin nga koatenaijin carronajin. Tonga nga kʼia jao kʼa kinokjoana teléfono. Xi títjon kinchja̱najin jngo ndsʼee kao chjoónle xi kisʼejinle jme kjoa xi tibitjatojinjin. Kʼoakitsonajin nga je kʼoechjí jngo boletole avión. Je xi ijngo xi kinchja̱najin jngoo tichjaa xi jekoanjchínga xi tao̱n tsakʼéjnatjao. Ya kaxa̱ xi tsakʼéjnaya tao̱n itso xi tsakʼétʼa: “Tsa totseni ʼya xi koa̱nchjénle”. Tokjoan tsakasenkaonajin Jeobá kʼianga kui kjoa kitjatojinjin (Heb. 13:6).

Jméni xi kjimajinno xi jeñachante nó nga ñaki to xále Niná tinʼiao.

Ann-Catrin: Tojo tso Isaías 30:15 je xi basenkaona kuinga tsín nʼio sikjáojian kʼoa nga je Jeobá sinʼiotʼa. Kʼianga je Jeobá ninʼiotʼaa jé basenkaoná (2 Crón. 20:​15, 17). Nga kʼoakji tinixálaijin Jeobá jokji tjen kʼoakjimanajin tísíchikontʼainnajin kʼoa ngisaa tse kjoanda tísokónajin nga ñaki toje tinixálaijin. Alikuijin kʼoakji kjoanda so̱konajin tsa tokjaʼaí xá tinʼiaijin.

Mats: Je xi ngisa chjíle xi kjimajinna kuinga je Jeobá sinʼiotʼa tojme kjoa xi kjoaʼatojian kʼoa jé koasenkaona (Sal. 37:5). Je Jeobá kʼoatso nga ntsjaintsjai sikuindaná kʼoa tiʼyaníjin nga je tísíkuindanajin nga i̱ tiyuijin Betel xi tíjna Myanmar.

Kʼoatisʼin sichikontʼain Jeobá je xti xi mele nga ñaki to xále Niná sʼin. Kʼoati nʼio tse kjoanda so̱kole tsa tsjoáʼnde nga je Jeobá kuinyakao nga tsjoa sa̱tío kon tojñani sixále.