Jméni xi sʼiaan kʼianga totaon ʼyaná kʼoa nga totaon ʼya xi kjaʼaí

1, 2. Jméni xi sʼín kʼa je chjota nga tse kjoa tjín, kʼoa jméni xi nikjaʼaitsjen sakʼoa.

NICHXIN xi tiyoaa ndʼaibi me tongatsʼi chjota nga totaon ʼya. Tsakui kʼianga choa tao̱n tjínle, tsa xin ʼndele, kʼoa tsakui josʼin tsen yaole. Nkjínsa koya anni nga kʼoamatʼainni, tongóson matʼain ni xi xʼin ni xi yánchjín. Tjínkʼa chjotaxá kao chjotanyiná xi tsín kosonnile jmeni xi sʼín kʼoa alikui fini ninga tímiʼaon sonʼnde kao chjota. Nga kʼoatjíosʼín chjota jebi bʼakaotʼaná ngatsʼiaa.

² Kui xi mená ngatsʼiaa nga nda kuiyoaa kʼoa nga tsínkui xi chʼaotjín kʼoakoa̱ntʼeen. Kuinga tjínkʼani chjota xi síjtile yaole kʼianga tse kjoa tjín. Tjínkʼa xi ya bájta je chjota xi sítoánntjai naxinandále, tjín xi ya tsjoánganʼiole je chjota xi marcha batío kʼoa kao chjota político xi kʼoatso nga kʼoendajin kjoa xi tjín. Tonga ñá xi chjotale Cristo maa, alikui ya nojiaan yaoná jmeni xi chon sonʼnde, nga̱ ʼyañá nga toje Chjotaxále Niná xi koa̱nle kʼoendajin kjoa xi tjín (Juan 17:16). Ninga kʼoalani, sakʼoa likui nda satío tokoán kʼoa sakʼoa majtiná nga totaon ʼya chjota. Tsakui nichxin sakʼoa i̱ bixoán: “Jméni xi tjínnele sʼian kʼoa jósʼin koasenkoa je chjota nga nda koatio”. Kui jchaa i̱ kjoaʼmiya jebi. Tonga kuila títjon kataʼyaa jósʼe kon Jeobá kao Jesús nga tse kjoa tjín.

JE JEOBÁ KAO JESÚS ALIKUI ʼYA XI TOTAON BE

3. Ánni nga tsín nda satíoni tokoán kʼianga totaon ʼya xi kjaʼaí (Isaías 5:7).

³ Ya Biblia kʼoatso nga toxá tsín nda satíoni tokoán kʼianga totaon ʼya xi kjaʼaí, nga̱ je Jeobá kʼoasʼin kisindaná jokjoan je. Xi ijngosani, “kui tsjoake xi kixi tíjna” (Sal. 33:5; Gén. 1:26). Je Jeobá alikui ʼya xi totaon be kʼoa kʼoati tsín mele nga totaon jchaa xi kjaʼaí (Deut. 32:​3, 4; Miq. 6:8; Zac. 7:9). Tobʼelañá, kʼianga nichxinle Isaías, je Jeobá kinrʼoé kʼianga tsakatéjé chjota israelita xi totaon tsaʼya (tʼexkiai Isaías 5:7).a Je Jeobá kjoañʼai kitsjoale je chjota israelita xi jaʼatone kjoatéxoma kʼoa xi totaon tsabe xi kjaʼaí (Is. 5:​5, 13).

4. Jméni xi bakóyaná jokisʼin je Jesús kʼianga tsabe je chjota xi kixitʼa ntsja (kʼoati chótsenlai sén xi faʼaitʼa).

⁴ Tojo sʼín je Jeobá, je Jesús ñaki kixi jmeni xi sʼín kʼoa alikui ʼya xi totaon be. Tobʼelañá, kʼianga jaʼai i̱ sonʼnde, ñandia nga jngo chjota tsabe xi kixitʼa jngo ntsja, koanmake kʼoa kisindayaa. Tonga koanjtile je xi nyatítjonle religión, nga̱ tokui ngisa koanndosinle nga xkón kataʼya nga xoto kʼoa alikui koanjinle jokji kjoañʼai tífaʼá je chjota xi kixitʼa ntsja. Kʼianga tsabe Jesús nga koanjtile je chjota xi nyatítjonle religión, “aon koanle nga̱ xíjin ni̱ma̱le” (Mar. 3:​1-6).

5. Jmé xi kuenta sʼiaan tsa majtiná nga totaon ʼya chjota.

⁵ ʼYañá nga jti male je Jeobá kao Jesús kʼianga ʼya xi totaon ʼya, kʼoa alikui chʼaotjín tsa sakʼoa kʼoati satío tokoán tsanda ñá (Efes. 4:26 kao nota de estudio jñani “Cuando se enojen” tso). Tonga kuenta sʼiaan nga tsín tjóxin je kjoa xi tjín ninga nʼio si̱jtilee yaoná, kʼoa tsa to kʼoasʼe̱ntsjai tokoán alikuijin tinda kuiyoñá kʼoa saʼnda tjóchʼinjinná (Sal. 37:​1, 8; Sant. 1:20). Jméni xi sʼiaan kʼianga ʼya xi totaon ʼya. Kataʼyala jme xi kisʼin Jesús.

JÓKISʼIN JESÚS KʼIANGA TOTAON TSAʼYA CHJOTA

6. Jmé kjoa xi tsabe je Jesús kʼianga tsakʼejna i̱ sonʼnde (kʼoati chótsenlai sén xi faʼaitʼa).

⁶ Kʼianga tsakʼejna Jesús i̱ sonʼnde tsabe nga tse kjoañʼai faʼá je chjota. Tobʼelañá, je xi nyatítjonle religión totaon tsabe je chjota kʼoa nkjín kjoatéxoma tsakʼasje nga kʼoakitso nga tjínnele kuitjoson (Mat. 23:​2-4). Kʼoati tsabe nga je chjotaxá xi Roma tsʼe totaon tsabe naxinandá. Nga tsín kisasen kʼale chjota judío jmeni xi koantʼain, tjínkʼa xi kisitoánntjai yaole nga tsín je chjota xi Roma tsʼe katabánentsja. Jolani je chjota xi zelote tsakʼin, kjoasi tsakʼétsʼiakao nga kisitoánntjai yaole. Tonga je Jesús niʼyajinla xi tsakasentítjonle xi kjoasi tsjoake kʼoa nijngojinla xi kitsjoanganʼiole. Kʼianga kisʼejinle nga rey sikao je chjota tosaa toki (Juan 6:15).

7, 8. Ánni nga tsín tsakjaʼáxinni Jesús je kjoa xi kisʼe kʼianga jaʼai i̱ sonʼnde (Juan 18:36).

⁷ Kʼianga tsakʼejna Jesús i̱ sonʼnde tsabe nga nʼio tse kjoa tjín, tonga alikui kjoa política tsakjajin nga̱ be nga tsín koa̱nle je chjota nga tije koatexomanile xínkjín (Sal. 146:3; Jer. 10:23). Kʼoati tsín koa̱nle kjoaʼaxin je kjoa xi tjín. Kʼoa nga je Na̱i kjinentsja sonʼnde, jé xotísʼín nga sa tsʼen sa tsʼen kjima je chjota (Juan 8:44; Efes. 2:2). Ningalani tjín je chjota xi kʼoatjío kon nga mele kʼoendajin kjoa xi tjín, alikui je kʼoakoa̱nle nga̱ chjotajée maa ngatsʼiaa kʼoa sakʼoa tsín kixi tíjna jmeni xi nʼia (Ecl. 7:20).

⁸ Je Jesús koanjinle nga toje Chjotaxále Niná xi koa̱nle kjoaʼaxin je kjoa xi tjín, kuinga kui ngisa kitsjoanile kjoandosin nga kitsoya je énnda xi tʼatsʼe kjoatéxomale Niná (Luc. 8:1). Kʼoa je chjota xi kjoakixi básjai, kʼoakitsole nga kuicho nichxin nga tjóxin je kjoa xi tjín kao jmeni xi tsín kixi tíjna (Mat. 5:6 kao nota de estudio; Luc. 18:​7, 8). Ali tsa jejin xosʼin je chjotaxá xi tjíobatéxoma sonʼnde, tojé Chjotaxále Niná xi koa̱nle kʼoasʼin (tʼexkiai Juan 18:36).b

CHJÉNNGILEE JOKISʼIN JESÚS KʼIANGA KUI KʼOAMATʼEEN XI TSÍN KIXI TÍJNA

9. Ánni tjínjngoni tokuin nga toje Chjotaxále Niná xi koa̱nle kjoaʼaxin je kjoa xi tjín.

⁹ Nga to jetífikjetʼa jmeni xi chon sonʼnde ngisaa tse kjoa tjín tikʼoajinni nga tsakʼejna Jesús. Kui kʼoakjimachonni nga je Na̱i tíbatéxoma sonʼnde kʼoa nʼio nkjín chjota xi kui kʼoasʼín josʼin mele (2 Tim. 3:​1-5, 13; Apoc. 12:12). Tonga ñá, kʼoati nʼia jokisʼin je Jesús. ʼYañá nga toje Chjotaxále Niná xi koa̱nle kʼoendajin kjoa xi tjín, kuinga toje bʼainganʼionilee. Alikui marcha mangían kʼoa alikui ya nojiaan yaoná jmeni xi sʼín je chjota político xi mele nga sindachon sonʼnde. Kʼoakoan jngo tichjaa xi Stacy ʼmi.c Kʼianga kjesa kotʼayajin Énle Niná yaa tsakʼejnajinle chjota xi marcha batío, tonga nga jeki nichxin kui kisikjaʼaitsjenjin tsa ndatjín jmeni xi tísʼín. Itso: “Kʼianga ya tsakatejnajinle chjota xi marcha batío, kʼoasʼin kisikjaʼaitsjen tsakui kʼoatisʼian xi ndatjín. Tonga ndʼaibi, nga je Chjotaxále Niná titsjoanganʼiole majinna nga kui xi kixi tjín kʼoatisʼian. Kʼoati ʼbe nga tsín koa̱nna kjoaʼaxian je kjoa xi tjín, nga̱ tojé Jeobá xi koa̱nle kʼoasʼin” (Sal. 72:​1, 4).

10. Tojo tso ya Mateo 5:​43-48, ánni nga tsín ya bʼainganʼionilee je chjota xi mele kʼoendajin kjoa xi tjín (kʼoati chótsenlai sén xi faʼaitʼa).

¹⁰ Nkjín chjota xi marcha batío xi kjoasi tsjoake. Alikui kʼoasʼín jmeni xi kisʼin kʼoa jmeni xi kitso je Jesús (Efes. 4:31). Jngo ndsʼee xi Jeffrey ʼmi, itso: “Ningalani nda bʼéndajin josʼín je chjota xi marcha batío, nga tsín nda bichómani jmeni xi sʼín jeto kjoasi bʼétsʼia”. Je Jesús kʼoakitso nga tsjoacha katamaa je chjota ninga je xi jtikená kʼoa xi fitjenngikená (tʼexkiai Mateo 5:​43-48).d Xi chjotale Cristo maa, kui kʼoanʼia jmeni xi kisʼin je Jesús kʼoa nitjosonñá jmeni xi kitsoya.

11. Ánni nga sakʼoa ñʼai maniná nga kʼoanʼia jokisʼin je Jesús.

¹¹ Ningalani ʼyaa nga toje Chjotaxále Niná xi koa̱nle kʼoendajin je kjoa xi tjín, sakʼoajin ñʼai koa̱nná nga kʼoasʼiaan jokitso je Jesús kʼianga ʼya xi totaon bená. Kʼoakoan je tichjaa xi Janiya ʼmi. Kichʼasjengi nga kjaʼaísʼin tsen yaole. Itso: “Nʼio ba kisʼe tokoan kʼoa jti koanna, kui xi koanmena nga kjoañʼai katabʼaile je xi totaon tsabena, kuinga ya kitsjoanganʼionile je chjota xi sítoánntjai je xi kjaʼaísʼin tsen yaole kʼoa xi totaon ʼya. Kʼoasʼin kisikjaʼaitsjen nga tokʼoasʼin nga nda sʼe̱ tokoan”. Kʼianga jeki nichxin koanjinle nga tsín nda tísʼín. Itsosa: “Chaan kʼoasʼin kisikjaʼaitsjen josʼin síkjaʼaitsjen je chjota xi tsakajta kʼoa jé kisinʼiotʼa ʼndele nga je Jeobá sinʼiotʼa kʼoa tosaa tsín tije kisimiyoña”. Toxá jti maniná kʼianga ʼya xi totaon bená, tonga alikui koa̱n nga ya kʼoainganʼiolee je chjota político kao chjota xi kjoasi tsjoake (Juan 15:19).

12. Ánni ndatjínni nga chósonnilee jmeni xi chotsenlee, xi noʼyalee kʼoa jmeni xi bʼexkiaa.

¹² Jméni xi sʼiaan nga tsín yaoná si̱jtilee kʼiatsa ʼya xi totaon tíbená kʼoa tsa totaon tíʼya xi kjaʼaí. Jngo koya xi koa̱n sʼiaan kuinga nda chósonnilee jmeni xi bʼexkiaa, xi noʼyalee kʼoa xi chotsenlee. Ya redes sociales me tokui faʼaitʼa xi síkján je chjota kʼoa chʼaosʼin síkʼaxki̱ je chjotaxá. Kʼoa je chjota xi noticia tsjoá sakʼoa likuini kʼoatjín jmeni xi tso, nga̱ totsʼee kjoafaʼaitsjen síchjén. Ningalani kʼoatjín jmeni xi tso noticia, alijme xi koa̱n sʼiaan nga kʼoéndajiaan je kjoa xi tjín. Kʼiatsa tokui si̱kʼayalee nichxin jmeni xi bʼexkiaa, xi chotsenlee kʼoa xi noʼyalee, tosajin tosikinroajen tokoán kʼoa tokoa̱njtijinná (Prov. 24:10). Tochale tsínti kuenta sʼianñá nga toje Chjotaxále Niná xi koa̱nle kjoaʼaxin je kjoa xi tjín.

13. Jósʼin basenkaoná nga nyaon nyaon bʼexkiaa Biblia.

¹³ Ijngosa koya xi koa̱n sʼiaan nga tsín yaoná si̱jtilee kuinga nyaon nyaon kʼoéxkiaa je Biblia kʼoa si̱kjaʼaitsjejiaan jmeni xi tso. Jngo tichjaa xi Alia ʼmi, kisijtile yaole nga tsabe nga totaon tjíoʼya je chjota xi ya tsʼe ʼndele kʼoa nga tsín jme xi nikao je chjota xi chʼao sʼín. Itso: “Kui kisikjaʼaitsjen nga je Jeobá kʼoendajin je kjoa xi tjín. Kui tsakʼexkia Job 34:​22-29, jñani kʼoatso nga tsín ʼya xi koa̱n koatioʼma ngixko̱n Jeobá. Tojé Jeobá xi ñaki kixi jmeni xi sʼín kʼoa xi koa̱nle kʼoendajin je kjoa xi tjín”. Tonga jméni xi sʼiaan nga kjesa faʼáxinjin Chjotaxále Niná jme kjoa xi tjín.

JMÉNI XI SʼIAAN

14. Jméni xi koa̱n sʼiaan ndʼaibi (Colosenses 3:​10, 11).

¹⁴ Alikui joma nʼia kʼianga tsín kixi tíjna jmeni xi sʼín je chjota, tonga koaan nda si̱koaa xi kjaʼaí. Tojosʼin tiʼyaa, koaan chjénngilee jokisʼin je Jesús nga tsjoacha koaan je chjota. Kʼiatsa kʼoasʼiaan, koakolee kjoaxkóntokon toʼya chjotani ninga je xi chʼao sʼín (Mat. 7:12; Rom. 12:17). Je Jeobá tsjoa sʼe kon nga nda nikoaa je chjota kʼoa nga tsín totaon ʼyaa (tʼexkiai Colosenses 3:​10, 11).e

15. Jósʼin bichómani kʼianga kui Biblia ʼmiyalee je chjota.

¹⁵ Kʼiatsa mená nga tsín ʼya xi titotaon kataʼyani, xi koa̱n sʼiaan kuinga kʼuínyalee je chjota Énle Niná ánni nga skoe̱ni jotjínni xi tʼatsʼe Jeobá. Nga̱ je kjoankjíntokonle Jeobá binyakao chjota nga síndaya yaole, nda chjota ma kʼoa alikuiti kjoasi tsjonjinni yaole (Is. 11:​6, 7, 9). Kʼianga kjesa bejin xi tʼatsʼe Niná je xi Jemal ʼmi, yaa tsakʼejnajinle chjota xi kisitoánntjai yaole nga chʼao kisʼin je chjotaxá. Itso: “Alikui bʼantjaiya je chjota nga totsaan nganʼio nichjén, tonga síndaya yaole kʼianga kotʼaya Biblia. Kʼoakoan xi an”. Nga kiskotʼaya Énle Niná Jemal, tsín tiya kitsjoanganʼionile je chjota xi kjoasi bʼétsʼia. Tojosʼin tiʼyaa, kʼianga ʼmiyalee chjota jmeni xi tso Biblia síndaya yaole kʼoa alikuiti totaon beni xi kjaʼaí.

16. Ánni nga menili kʼuínyalai chjota je Énle Niná.

¹⁶ Tojo kisʼin Jesús, mená kʼuínyalee je chjota nga toje Chjotaxále Niná xi koa̱nle kjoaʼaxin je kjoa xi tjín sonʼnde. Kʼiatsa kʼoasʼiaan, kʼoasʼin kuinyakaoñá je chjota xi totaon tjíoʼya nga skoe̱ jmeni xi sʼin Jeobá nichxin xi sʼa nroa (Jer. 29:11). Je tichjaa Stacy, xi sa jekanikʼaxkiaa ya párrafo 9, itso: “Nga tiʼbe jokjoantjínni xi tʼatsʼe Niná, tíkana je kjoa xi tifaʼatojian kao jmeni xi kjimatʼain xi kjaʼaí. Kui Biblia síchjén Jeobá nga nda satío tokoán”. Kʼiatsa mená kuinyakoaa je chjota nga nda katasatío kon, tjínnele nda kuiyondaa ánni nga jchañá josʼin kʼuínyalee jmeni xi sʼin Jeobá nichxin xi sʼa nroa. Kʼiatsa ñaki tjínjngo tokoán nga toje Chjotaxále Niná xi koa̱nle kjoaʼaxin je kjoa xi tjín, ngisaa choa ñʼai koa̱nná nga kui chja̱kaoñá je chjota ya tʼaxáná kʼoa tsa ya ndʼiaskuela.f

17. Jósʼin sínʼio tokoán je Jeobá nga tse kjoañʼai tjín.

¹⁷ Nga je Na̱i tíbatéxoma sonʼnde tosi tonda sʼe̱ kjoañʼai. Tonga jé Jeobá koasenkaoná kʼoa kʼoatsoná nga jeme tjóxin je Na̱i (Juan 12:31). Ya Biblia kʼoatsoná ánni nga tse kjoañʼai tjínni, kʼoa je Jeobá aon male kʼianga kjoañʼai chjaʼá (Sal. 34:​17-19). Kuinga kui choa̱le Jesús síchjénni nga tsoyaná jósʼiaan kʼiatsa totaon tíʼyaná kʼoa tsa kʼiaje̱ nga totaon ʼya xi kjaʼaí. Kʼoati tsoná nga je Chjotaxále jeme kjoaʼaxin ngayeje kjoa xi tjín (2 Ped. 3:13). Kuinga machjénni nga tosi tonda kʼuínyasoán je Énle Niná saʼnda nga kjoaʼaí nichxin nga ndasʼin kuiyoaa (Is. 9:7).