Jmé xi koasenkaoná nga nda kuiyoaa nichxin xi nroa

Tojosʼin tiʼyaa, je chjota kui xi mele nga ndasʼin koatio nichxin xi sʼa nroa. Kuinga skuelangʼa kotʼayani, nga tao̱n básjaini, nga nda chjota ma kʼoa nga kʼoasʼin makjainle nga to jetjínndajin jme xi maná. Kʼianga kʼoasʼín chjota yaa mangóson joni tsa jngo mapa tjíokotʼa xi tsín nda tjínnda. Jmé xi koasenkaoná nga ndasʼin kuiyoaa nichxin xi sʼa nroa.

KJOAFAʼAITSJEN XI TSJOÁNÁ XI NʼIO CHJINE

Kʼianga jme xi nʼia me tongantsjai nga je chjonangilee xi ngisa be kʼoa tsa xi ngisa jchínga tikʼoani ñá. Tsa mená nga ndasʼin kuiyoaa nichxin xi sʼa nroa, jéjin chjónangilee xi ngisa be kʼoa xi ngisa tjínle kjoafaʼaitsjen tikʼoajinni ñá. Je xi nʼio nda koandiaaná kui je Énle Niná, xi jejan jmi basen nó tjínle nga kichji.

Ánni nga koa̱n koa̱nkjainniná jmeni xi tso je Biblia. Jé Niná xi ngisasa nʼio chjine, kʼoa kui kjoafaʼaitsjenle faʼaitʼa je Biblia. Jéní xi “Chjotajchínga xi jekjoatse tíjna” ʼmile, nga̱ tíjna ngantsjai nichxin (Daniel 7:9; Salmo 90:2). Jéní “xi kisinda ngʼajmi, je xi ñaki Niná, xi kisinda sonʼnde” (Isaías 45:18). Tijé Niná xotsoni nga Jeobá ʼmi jaʼaínle (Salmo 83:18).

Nga je Niná kisindaná kʼoa nga tsʼe kjoafaʼaitsjen faʼaitʼa Biblia, kʼoatso nga tongóson sʼin bekonná ngatsʼiaa tojñani tsaan kʼoa tojñani kitjenñá. Ndasʼin bichómani nga nitjosoán je kjoafaʼaitsjen xi tsjoá kʼoa binyakao ngatsʼi chjota. Kui Biblia xi ngisa nkjín én tífaʼatoya kʼoa xi ngisa nkjín tíbʼabíson jngo tjíjtsa Sonʼnde.a Choaa ñʼai tíjna nga koa̱njinle toʼya chjotani kʼoa nga sitjoson jme xi tso. Je Biblia itso:

“Niná tongóson fikao ngatsʼi. Tojñani sonʼnde, je xi tsokjónke Niná, xi sʼín xi kjoakixi, Niná tjaokení” (HECHOS 10:34, 35).

Nga tsjoake xtile jngo nʼai basenkao, kʼoati sʼín je Jeobá, nga tsjoakená basenkaoná nga tsjoáná kjoafaʼaitsjen xi faʼaitʼa Biblia (2 Timoteo 3:16). Koaan koa̱nkjainná jmeni xi tso je Énle Niná, nga̱ jé Niná kisindaná kʼoa ngisaa nda be jmeni xi koasenkaoná.

XI NʼIO NDA BÁNDIAANÁ

Koaan koa̱nkjainná jmeni xi tso je Biblia, nga̱ jela 2,000 nó tjínle nga kʼoakitso jmeni xi koa̱n nichxin xi tiyoaa ndʼaibi kʼoa jokoa̱nkjoan je chjota.

JMENI XI KOA̱N

“Kuisótjenne naxinandá kontrale xi kjaʼaí naxinandá, kʼoa kjoatéxoma kontrale kjoatéxoma. Kʼoa kjoaʼa cháonxkón, kʼoa kjaí nkjín ʼnde koa̱n kjinrá chʼinʼbi” (LUCAS 21:10, 11).

JOKOA̱NKJOAN CHJOTA

“Je nichxin xi kjoetʼa kjoaʼaíná kjoañʼai xi tse. Sʼe̱ chjota xi toyaole tsjoake koa̱n, xi chʼaondai, xi nchja̱tʼa yaole, xi ngʼakon, xi chʼao tsole xínkjín, xi tsʼantjaikjoake xijchále, xi niʼi̱tséjin tsjoá kjoanda, xi tsín tsje tjín, xi tsínle kjoatjaochajin, xi síkitsón énle, xi bángi kao kjoandiso, xi tokjaʼaíngá sʼín, xi toán, xi taon be xi nda, xi jao nkjaín, xi toxkia sʼín, xi tosíxkón male, xi ngisa matsjoake kjoaská kaoni tsa Niná” (2 TIMOTEO 3:1-4).

Jósʼin nikjaʼaitsjain nga tíbitjoson je én xi jenʼio kjoatse kichji. Kʼoajin tisʼin nikjaʼaitsjain jotso jngo chjota xi Hong Kong tsʼe, xi Leung ʼmi. Itso: “Nga kʼoasikji kjoatse kichji je én xi faʼaitʼa Biblia, alikuijin koa̱nle jngo chjota nga kʼoatso xi skí kʼoa nga kʼoakjoansʼin kuitjoson. Nʼiojin chjine je xi tsʼe én xi faʼaitʼa Biblia”.

Ya Biblia nʼio nkjín én faʼaitʼa xi tongini kinokjoa xi tíbitjoson.b Kui jebi xi bakóná nga Énle Niná je Biblia. Je Jeobá itso: “Anña Niná, kʼoa tsín ʼya xi tjín xi mangóson kao an. Anña xi kʼoaxian saʼnda nga fitsʼiani josʼin kuichotsjoá jmeni xi koa̱n” (Isaías 46:9, 10). Kuinga koa̱n koa̱nkjainniná jmeni xi tso je Biblia tʼatsʼe nichxin xi nroaján.

XI KOASENKAONÁ NDʼAIBI KʼOA TOKʼIA SAʼNDANI

Ndasʼin kuijnai tsa kʼuíntjenngi je kjoafaʼaitsjen xi tsjoá je Énle Niná. Tikjaʼaitsjenjinlai choa̱ jebi.

TAO̱N KAO XÁ

“Tongisaa nda nga nikjáya i̱natjián tikʼoajinni nga jaoya kʼoakji nixá kʼoa nga to ntjao̱ mangíntjenngiaa” (ECLESIASTÉS 4:6).

NGA TSJOA SA̱TÍO TOKOÁN YA YANIʼYA

“Jngójngó ngatsʼiobi ñaki kʼoasʼin tsjoacha katamao yánchjínno, josʼin tsjoachao yaono. Je xi chjoón xkón katabe xʼinle” (EFESIOS 5:33).

JOSʼIN MANGÍNKOAA XÍNGIAA

“Tikʼéjnai je kjoajti kʼoa titjoxinlai; ali nijtijinlai yaoli, ánni nga tsínkui xi chʼaotjín kʼoasʼianni” (SALMO 37:8).

Kʼianga kʼuíntjenngi je kjoafaʼaitsjen xi tsjoá je Biblia, ndasʼin kuijnai ndʼaibi kao nichxin xi nroaján. Je Biblia kʼoatso josichon Niná nichxin xi sʼa nroa.

SʼEE KJOANYʼÁN KʼOA NDA KUIYOAA

“Ñaki nyʼán sʼin koatio” (SALMO 37:11).

SʼEENÁ NDʼIA KAO TSOJMI XI CHINEE

“Kʼoenda niʼya kʼoa yaa koatioʼya; kʼoentje xka̱totsee kʼoa je ski̱ne tole” (ISAÍAS 65:21).

ALIʼYA XI CHʼIN SʼE̱LE KʼOA ALIʼYA XI KUIYÁ

“Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male” (APOCALIPSIS 21:4).

Yaa kjoaʼmiya xi ijngo jchaa jméni xi machjén nga sʼiain nga kʼoasʼin kuijnai.

a Yaa kjoaʼmiya 05 xi tsʼe libro Koaan nda kuiyoaa ngantsjai nichxin faʼaitʼa je xo̱n kao video xi tsoya josʼin tífaʼatoya kʼoa josʼin tíbʼabíson je Biblia. Tjasjai ya www.jw.org/mau jñani XO̱N KAO GRABACIÓN > LIBRO KAO FOYETO tso.

b Tsa mesali jchai xi tʼatsʼe jebi, chótʼai ya kjoaʼmiya 03 xi tsʼe libro Koaan nda kuiyoaa ngantsjai nichxin, xi faʼaitʼa Internet ya www.jw.org/mau. Tjasjai jñani XO̱N KAO GRABACIÓN > LIBRO KAO FOYETO tso.