A ʼyaní

Ánni tsín kitsokjonni je Esteban nga ya séjna ngixko̱n chjotakontrale

JE Esteban yaa tíjnajinle je chjotatsʼen, je xi 71 mani je chjota xi tjíojinle je Sanedrín, je chjotaxá xi ngisa tse nganʼio kisʼele nga kui nichxin. Jé kisikatíoxkó je naʼmitítjon Caifás, je xi kʼoati tsakasentítjon nga kinikʼien je Jesús (Mat. 26:57, 59; Hech. 6:8-12). Nkjín koanni je testigo ndiso kicho. Kʼoa tokʼoakoanle chjota xi tjíojinle je Sanedrín nga jo nkjain ánkje kisʼe je nkjain Esteban (Hech. 6:13-15).

Ánni nga tsín kitsokjonni je Esteban nga kʼoakjimatʼain. Nga kjesa ya fikaojin chjota ngixko̱n Sanedrín, xále Niná tísʼín ya jinjtín kʼoa jé nganʼiotsjele Niná tsakasenkao (Hech. 6:3-7). Nga ya tíjna ngixko̱n chjotaxá, jé nganʼiotsjele Niná tsakasenkao kʼoa kisikjaʼaitsjenjinle (Juan 14:16). Jmeni xi kitso ngixko̱n chjotaxá, kui xi masjaitʼaná ya kapítulo 7 xi tsʼe Hechos, jé nganʼiotsjele Niná tsakasenkao nga 20 koya jmeni xi tso Escrituras Hebreas jaʼaitsjenle (Juan 14:26). Tonga ngisaa koantaja je kjoamakjainle Esteban kʼianga jngo sén kisakole jñani tsabe je Jesús nga ya séjna ngakixile Niná (Hech. 7:54-56, 59, 60).

Tsakui nichxin kʼoati kjoaʼaí nichxin nga chjota koaitjenngikená (Juan 15:20). Tsa kʼoasʼin nganá nga chotʼayá je Énle Niná kʼoa tsa nʼio bʼailee kjoandosin nga ʼmiyasoán, kʼoasʼin kʼoaiʼndee nga je nganʼiotsjele Jeobá koandiaaná. Kʼoati koasenkaoná nga chókjoajinná kʼianga chjota koaitjenngikená kʼoa nga nyʼán sʼe̱ tokoán (1 Ped. 4:12-14).