JÓSʼIAAN NGA TSÍN XÍNGIAA KOA̱NJTICHAA

3 | Chja̱ʼaxinlai yaoli je kjoajticha

Je Biblia itso:

“Katabʼantjaiyao yaono nga koa̱nchjotseyanda ngijngokʼani kjoafaʼaitsjenno, jméni nga jchasínio jmeni xi Niná mele, jñale xi nda, xi sasénle, xi ñaki tjíjngo” (ROMANOS 12:2).

Xi tsoyanile:

Je Niná mandosinle jmeni xi nikjaʼaitsjeen (Jeremías 17:10). Ali tsa tokuijin xi machjén nga nda chósonnilee jmeni xi bixoán kao jmeni xi nʼia. Tsa jekui tísʼejnajin xi chʼaotjín ya kjoafaʼaitsjenná kao ni̱ma̱ná, machjén nga chja̱ʼaxinlee yaoná, nga̱ yaa nroani nga majtichaa xíngiaa. Tsa kʼoasʼiaan, ndasʼin kjuinkoaa xíngiaa kʼoa kʼoasʼin koakoñá nga jetinikʼantjaiyaa yaoná.

Kʼoatʼiain jebi:

Kuenta tʼiain josʼin nikjaʼaitsjain tʼatsʼe xi ngikʼa, ngisaa je xi xin kitjenni kʼoa xi xin naxinandále. Tikjaʼaitsjenjin jebi: “Jósʼin sikjaʼaitsjen xi tʼatsʼe. A tokui fiña josʼin síkjaʼaitsjen xi ngikʼa axo bʼenele yaona nga ngisa nda skoexkoan chjota xi kjaʼaí”. Alikuijin nʼio nichjain redes sociales, alikuijin chotsenlai película kʼoa alikuijin bʼetsaojinkoai je xi kui kaníbason kjoatsʼen kao kjoajticha.

Je Énle Niná basenkaoná nga chjaʼaxinlee yaoná je kjoajticha

Alikui choa ñʼai maná nga ʼyaa yaoná josʼin nikjaʼaitsjeen kʼoa josatío tokoán. Tonga je Énle Niná basenkaoná nga̱ male “básjaiya kjoafaʼaitsjen, kʼoa josʼin mele síxá ni̱ma̱ná” (Hebreos 4:12). Kataʼyai jmeni xi tso Biblia kʼoa tingósonkoai kao jmeni xi nikjaʼaitsjain. Tʼenelai yaoli nga kʼoatisʼin si̱kjaʼaitsjain jotso Biblia. Je Énle Niná koaanle “nga sikixoya tojmeni xi nʼio tjío” ya jinkjoafaʼaitsjenná kao jinni̱ma̱ná, jolani je kjoajticha (2 Corintios 10:4, 5).

Jotso kʼa chjota (STEPHEN)

Kisikʼantjaiyaa josʼin síkjaʼaitsjen tsakai

Je chjota xi chikon kjoan totaon tsabe je Stephen kao familiale. Kuinga ya tsakʼejnajinnile jngo jtínle chjota político xi sítoánntjai chjota. Tsee kjoa tsakajngi nga jtike koan chjota. Itso: “Je miyona kao an kui película tsangínchotsenlaijin ya cine xi kui nchja̱ni nga totaon ʼya ya Estados Unidos je chjota xi África tsʼe. Nga tsín kixi tjín jmeni xi kjimatʼain chjota xi jma sʼin tsen yaole, tsakʼelaijin chjota xi chikon kjoan xi kʼoati ya cine kicho, kʼoa tsangínkjasjesaijin jñani tjío chjota xi chikon kjoan nga tsakʼelaijin”.

Kʼiaa kisikʼantjaiya yaole je Stephen kʼianga kiskotʼaya Biblia kao je testigole Jeobá. Itso: “Ningalani chjota tsakʼasjengia, tokʼoakoanna nga tsaʼbe josʼín je testigole Jeobá. Tobʼelañá, ñandia nga jngo testigole Jeobá xi chikon kji xi xin naxinandá ki choatse, jé kisikatíokao xtiʼndíle jngo familia xi jma sʼin tsen yaole. Xi ijngosani, jngo familia xi chikon kjoan kiskoétjao jngo ti xi jma sʼin tsen yaole xi tsínle ndʼia”. Je Stephen tsabe nga je testigole Jeobá ñaki tsjoakengañá xínkjín tojo kitso je Jesús nga sʼin je xi ñaki chjotatjenngile ma (Juan 13:35).

Jméni xi kisʼin Stephen nga tsakjaʼáxinle yaole kjoatsʼen kao kjoajticha. Kui tsakasenkao jmeni xi tso Romanos 12:2. Jñani tso: “Koanjinna nga tjínnele sikʼantjaiya yaona. Tsakʼenele yaona nga nda kisʼian kʼoa nga nda chjota koan”. Je Stephen jeñachan nó tjínle nga tsín tichjota jtikeni.