JÓSʼIAAN NGA TSÍN XÍNGIAA KOA̱NJTICHAA

2 | Ali Nijndangajaojinni

Je Biblia itso:

“Ali chʼaojin nikao je xi chʼao síkaono [...]. Tojo kji ngayije xi koa̱nno, kʼoatʼiaon jméni nga nyʼán kuiyosínio kao ngatsʼi chjota. Jon xi tsjoake̱no, ali nijndajinnio [...], nga kʼoasʼin tjítʼa: An xi sijndania, an kʼoechjínia, tso Nainá” (ROMANOS 12:17-19).

Xi tsoyanile:

Toxá majtininá tsa ʼyani xi josikaoná, tonga je Niná alikui mele nga si̱jndangajaoñá jmeni xi matʼeen. Tosaa kui xi mele nga je chóyalee nga kʼoendajin kjoa, nga̱ kʼoatso nga jeme kʼoendajin kjoa xi tsín kixi tíjna (Salmo 37:7, 10).

Kʼoatʼiain jebi:

Kʼianga nijndangajaoñá jmeni xi matʼeen, tongisa majtichaa xíngiaa. Tsa ʼyani xi jokitsoli kʼoa tsa totaon tsabeli, ali nijndangajaojinni. Ali yaolijin nijtilai kʼoa nda chósonnilai josʼiain, sakʼoa ngisa nda nga tonichajiaan tsa jmeni xi matʼeen (Proverbios 19:11). Tonga kʼoati sakʼoa ndatjín nga bʼendajiaan je kjoa xi kasokó. Tobʼelañá, kʼiatsa ʼya xi jokasíkaoli tsakui nichxin sójétʼain ngixko̱n chjotaxá.

Tiñá nikiʼaonñá yaoná nga nijndangajaoñá jmeni xi matʼeen

Kʼoa tsa tsín ngasin nganda sʼe̱ndajin je kjoa kʼoa tsa kʼoasʼin si̱kjaʼaitsjain nga jekʼoatinʼiai ngayeje jokji kʼoakjimali. Alikui koa̱n nga si̱jndangajaoni, tsa kʼoasʼiain chʼaosʼin kuichotsjoá. Ali nijndangajaojinni jmeni xi matʼain. Je Niná tinʼiotʼai kʼoa kʼoatʼai tokuin nga je skósonnile josʼin sʼe̱ndajin kjoa. Ya Salmo 37:3-5 itso: “Je tinʼiotʼai yaoli, kʼoa je koasenkaoli”.

Jotso kʼa chjota (ADRIÁN)

Alikui tikisijndani jmeni xi koantʼain

Kʼianga sʼa xti je Adrián, jé tsakájta chjota xi tsín nda sʼín, nʼio tsʼen koan kʼoa nʼio jtike koan chjota. Itso: “Me tokjitʼa nga kjoa kitsjonjian yaona kʼoa chʼinsá bʼelaijin xíngijin, kʼoa sakʼoa toya bajnatsʼotjen ya yandiaa, sakʼoa tomasʼe njín kʼoa kʼoasʼin síkjaʼaitsjen chjota nga jekijnakʼien”.

Kʼianga 16 nóle, je Adrián kʼiaa kiskotʼaya Biblia. Itso: “Kʼianga kiskotʼaya Biblia, koanjinna nga tjínnele sikʼantjaiya jokjoan”. Tjínnele nga tsín tijtike koa̱nni chjota kʼoa nga tsín tikjoatsʼen sʼinni. Je texto xi nʼio tsakasenkao kui jmeni xi tso Romanos 12:17-19, xi kui nchja̱ni nga tsín koa̱n si̱jndangajaoñá jmeni xi matʼeen. Itso: “Koanjinna nga je Jeobá xi kuitsoni kʼiani kʼoendajin je kjoa xi tsín kixi tjín kjima. Nga jeki nichxin alikui tikʼoakisʼinña jokisʼian ngasʼa”.

Ñandia nga je tsakʼetʼale je chjotakontrale chjota xi ya tsakájta ngasʼa. Kʼoa je xi séntítjonle chjota jebi i kitsole: “Titoánntjai yaoli”. Je Adrián, koanmele kisitoánntjai yaole. Tonga ʼndele nga kʼoakisʼin, tosaa je Jeobá tsakʼétsʼoale kʼoa kitjoʼale yaole.

Je Adrián itsosa: “Kʼianga jekoannyaonni, yaa kiskajian je xi ngʼajko̱le ma je xi tsakʼéna, tonga nga kʼia tojé tjen. Koanmena kisijndangajaoña jmeni xi kisikaona. Tonga ijngokʼa tsakʼetsʼoale je Jeobá kʼoa kʼoakixinle nga katabasenkaona nga tsín josikoa. Tokʼoakoanna nga i̱ kitsona: Tichatʼanái jmeni xi koan ngojña. Kui xi mena nga kʼoatisʼian jonʼiai. Mena skotʼaya Biblia. Jótonda nga tsín jokisikoa. Xijekoan, chaan kiskotʼaya Biblia tsanda je”.