Kʼianga tsín tikaniná kjoa xi bitjatojiaan

Tobʼelañá, je Sally,a xi Estados Unidos tsʼe, me kisicha ngayeje jmeni xi tjínle kʼianga jaʼa jngo huracán. Itso: “Kʼoasʼin kisikjaʼaitsjen nga tsín tiska̱nina jme kjoa xi jaʼatojian. Nkjín nichxin nga kisikʼajenle tokoan”.

Kʼoati nʼio aon satío tokoán kʼianga jngo xíngiaa biya. Je Janice, xi Australia tsʼe, itso: “Kʼianga kʼien nga jao ʼndíxtina, ñaki kisʼexkoaa yaona koanna, kʼoa likui tikʼia kʼoakisʼeni tokoan joni ngasʼa. I kixinle je Niná: Alikui tichókjoanina, tokui xi mena nga koajnafe kʼoa nga tsín tikjoaʼánina”.

Kʼoa je Daniel kʼoati nʼio ba kisʼe kon kʼianga tsakʼanachale je chjoónle. Itso: “Kʼianga kʼoakitsona je chjoónna nga tsakʼanachana, kʼoakoanna joni tsa jngo ki̱cha̱ kisʼenjin je ni̱ma̱na. Nkjín sá nga nʼio aon koanle ni̱ma̱na, joxi kjitʼa kjitʼaa kisʼenjin ki̱cha̱ koanna”.

Je revista jebi koasenkaoli nga nda sʼe̱ tokuin ningalani kjoa tibitjatojin xi totʼatsʼe

• Nga kjoaxkón faʼainená

• Nga xíngiaa biya

• Nga bʼanachale xínkjín xi jechixan

• Nga táo chʼin katʼaná

• Nga tsín nda sʼe tokoán

Xi títjon, kui jchaa jméni xi kuinyakao je xi kjoaxkón bichóne.