Kʼianga kjoaxkón faʼainená

“Nga títjon alikui titsaʼyanijin jokinʼiaijin. Kinichaníjin ngayeje jmeni xi tjínnajin xi totʼatsʼe nga kitsendá kʼoa nga ndási kixinya” (Andrew, Sierra Leona).

“Kʼianga kicho ijngokʼaijin ya ndʼianajin nga toje jaʼa kjoaxkón, likui jme xi titjínni. Ñaki tokʼoakoannajin. Kʼoa je tsotiʼndínajin tsakasenxkónyʼin kʼoa kiskiʼndá” (David, islas Vírgenes).

A SAJE kui kjoa kitjatojin. Tsa jaon, majinjinli jomale je xi kui kjoa faʼatojin. Tobʼelañá, nga toxijña faʼaitsjenná jmeni xi koantʼeen, nga nikjáojiaan, nga tsín sʼejngo tokoán, sakʼoaa likui ʼyaa jmeni xi nʼia kʼoa sakʼoaa likui sʼefé. Nʼio nkjín je chjota xi síkʼajenle kon kʼoa xi tsín tichókjoajinnile je kjoa xi faʼatojin kʼoa kʼoasʼin síkjaʼaitsjen nga tsínkʼia titsjoa sa̱tíoni kon.

Tsa kinichai ngayeje jmeni xi tjínli nga kjoaxkón kichoneli, tsakui nichxin likui tinda sʼeni tokuin. Kʼoa tsa saʼnda kʼoasʼin nikjaʼaitsjain nga toxitsjoani nga tijnachuin. Tonga je Biblia kʼoatso nga koa̱n tsjoa sa̱tío tokoán kʼoa tsoyaná ánni nga kʼoéjngoñá tokoán nga nda kuiyoaa nichxin xi nroaján.

JMENI XI TSO JE BIBLIA TSJOÁNÁ KJOACHOYA

Ya Eclesiastés 7:8 itso: “Ngisaa nda nga fetʼa jngo kjoa tikʼoajinni nga sʼa fitsʼiani”. Tsa jngo kjoaxkón kichoneli, tsakui nichxin kʼoasʼin nikjaʼaitsjain nga nʼio ñʼai koa̱nli nga kʼoétsʼiakao ijngokʼai josʼin kuijnai. Tonga tsa kʼoénelai yaoli kʼoa tsa tsejta koai̱n, ndasʼin kuijna ijngokʼani.

Je Biblia kʼoatso nga kjoaʼaí je nichxin nga “likui tisʼe̱ni kjoaba, nijejin xi kjiʼndía, nijejin xi aon male” (Apocalipsis [Revelación] 12:4). Jebi kʼiaa kʼoakoa̱n kʼianga jeʼndenaxó sikao Sonʼnde je Chjotaxále Niná (Salmo 37:11, 29). Alikui tikʼia kjoaxkón kjoaʼaíneniná. Alikui tijme xi aon kʼoeni tokoán. Je Niná, xi nʼio tjínle nganʼio, itso: “Je kjoa xi jaʼato jetondiaa jchajin, alikui tikui kjoaʼaítsjennile ni̱ma̱ná” (Isaías 65:17).

Si̱kjaʼaitsjenla jebi: Je Niná tsjoáná “kjoachoya nichxin xi sʼa nroa”, kʼoa kui xi mele nga nyʼán sʼin kuiyoaa kʼianga jekoatexoma je Chjotaxále i̱ Sonʼnde (Jeremías 29:11). Jósʼin basenkaoná je kjoachoya xi tsjoáná je Niná. Je Sally, xi bʼaxki̱ ya kjoaʼmiya xi títjon, itso: “Nga nikjaʼaitsjenjiaan jokoa̱nchon nichxin xi nroaján kʼianga jekoatexoma je Chjotaxále Niná basenkaoná nga tsínkui nikjaʼaitsjeen je kjoa xi bitjatojiaan ndʼaibi”.

A meli jchasai jmésani xi jeme sʼin je Chjotaxále Niná. Koa̱njinli nga tsín toxitsjoani nga tiyochoán ningalani tse kjoa tibitjatojin kʼoa nga tojeme tsín tikjoaxkón sʼe̱ni. Je xi koasenkaoli nga chókjoajinli je kjoa xi tibitjatojin ndʼaibi, kui je kjoafaʼaitsjen xi tsjoá je Biblia.

Textole Biblia xi koasenkaoli

Nda sojnafai

“Tongisa nda nga nikjáya i̱natjián tikʼoajinni nga jaoya kʼoakji nixá kʼoa nga to ntjao̱ mangíntjenngiaa” (Eclesiastés 4:6).

Je chjotachjine kʼoatso nga jngo chjota xi kui kjoa xi ñʼai tjín faʼatojin “alikui nda sʼe kon kʼiatsa tsín koájnafe kʼoa tsa tsín nda sʼe̱fe”. Kuinga machjénsíni nga nda koájnafe.

Kʼoasi jotjín tokuin

“Jme xi nʼio síkjáojin ya jinni̱ma̱le jngo chjota kui xi kjoaba síkʼéjnajin, tonga je én xi nda tso kui xi tsjoa bʼé kon” (Proverbios 12:25).

Tʼeyanajmílai jotjín tokuin je xíngi kʼoa tsa je miyoli xi ninʼiotʼai. Kjuinrʼoéli jmeni xi kʼoéyanajmílai, kʼoati sinʼio tokuin kʼoa tsjoáli kjoafaʼaitsjen.a

Tikjaʼaitsjain nga tsín tijme kjoa sʼe̱ni nichxin xi nroaján

“Tichoyalee ngʼajmi chjotse kao sonʼnde chjotse, jña nga tíjnantsjai xi kjoakixi, josʼin nga kitsjoa tsʼoa Niná” (2 Pedro 3:13).

a Tsa jngo chjota xi tse estrés sʼe̱le kʼoa tsa nʼio sikjáojin, tsakui nichxin machjénle nga jngo chjinexki sisinle.