Jósʼin tjóxin je kjoabiya

NGA tsín kisitjosonle Niná je Adán kao Eva, jée kao kjoabiya kitsaotʼale je ntje̱le. Ningalani kʼoakoan, je Niná alikui kisikʼantjaiya jmeni xi tjínndajinle xi kao chjotasonʼnde. Je Biblia kʼoatso nga tojo sitjoson je Niná jmeni xi tjínndajinle.

• “Je xi kixi tsʼee koa̱n sonʼnde, kʼoa i koatioson ngantsjai nichxin” (Salmo 37:29).

• “Ñaki tondiaa kjoaʼaxin je kjoabiya, kʼoa je Jeobá xi batéxomale ngayeje xi tjín kʼoejon ndáxko̱n ngatsʼi chjota” (Isaías 25:8).

• “Je kontrale xi fetʼani xi kuixo̱ya, kui kjoabiya” (1 Corintios 15:26).

• “Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male” (Apocalipsis [Revelación] 21:4).

Jméni xi sʼin je Niná nga tondiaa kjoaʼaxin je kjoabiya. Je Biblia kʼoatso nga “je xi kixi [...] i koatioson ngantsjai nichxin” i̱ Sonʼnde. Kʼoati tso nga “tsín jngo chjota xi kixi xi kui kʼoasʼínntsjai xi ndatjín xi tsínkʼia bajngijée” (Eclesiastés 7:20). Je Niná alikui kjoaʼatone je kjoatéxomale nga koa̱n kuiyoaa ngantsjai nichxin, nga̱ “tsín male bʼéndiso” (Tito 1:2). Jméni xi sʼin je Niná nga sitjoson jmeni xi tjínndajinle.

JE NINÁ KJOAʼAXIN JE KJOABIYA

Nga nʼio tsjoakená Niná tsakʼéchjíntjaininá nga ndái kuiyonilee je kjoabiya. Je Biblia kʼoatso nga je én xi kjoabʼechjíntjai tso kui tsoyanile jotjín machjíntjai tsa jmeni xi kasʼín jngo chjota kʼoa tsakuije̱ jmeni xi síjé je kjoatéxoma. Tjínnele ñaki kʼoakjoantjín koa̱nchjíntjai tsa jmeni xi kama. Makjoanni nga chjotajée maa ngatsʼiaa kʼoa nga mʼee, je Biblia kʼoatso nga “nijngojinla xi koa̱nle kʼoasjentjai jngo ndsʼe̱, kʼoa ni koa̱njinla jngo kjoabʼechjíntjai tsjoále Niná xi tʼatsʼe ndsʼe̱, (kʼoa jotjín tjínnele koa̱nchjíntjai je kjoabijnachonle, nʼio chjíle, kʼoa nikʼiajinla kuichole chjíle)” (Salmo 49:7, 8).

Kʼianga jngo chjota biya, tokui jée xi tsakajngi bʼéchjí. Alikui koa̱n kʼoasjentjai yaole kʼoa tsín koa̱n kʼoéchjí jéele xi kjaʼaí chjota (Romanos 6:7). Kuinga jngo chjota koanchjénni xi tsínle jée nga tsakʼéchjíntjainá (Hebreos 10:1-4).

Je Niná kisikasén je ʼNdíle i̱ Sonʼnde. Je Jesús alikui chjotajée koan (1 Pedro 2:22). Kʼoakitso nga kui xá jaʼaini nga tsjoá kjoabijnachonle nga “kʼoechjíntjai nkjín chjota” (Marcos 10:45). Kʼianga kʼien je Jesús kisikinjele je kjoabiya kʼoa kui kjoachoya kitsjoaná nga koa̱n kuiyoaa ngantsjai nichxin (Juan 3:16).

KʼIÁNI TJÓXIN JE KJOABIYA

Nichxin xi tiyoaa ndʼaibi tíbitjoson je én xi tongini kinokjoa xi ya Biblia faʼaitʼa. Nga sa ñʼai sa ñʼai kjimachon kui bakó nga jenichxin fetʼa tiyoaa (2 Timoteo 3:1). Kʼiaa tjóxin ngayeje “nichxin nga sʼe̱ndajinle kjoa, nga cha̱ chjota xi tsín bexkón Niná” (2 Pedro 3:3, 7). Tonga ʼyani xi tsjoake je Niná kuinje̱ngile yaole kʼoa sʼeele “kjoabijnachon ngantsjai” (Mateo 25:46).

Millón mani je chjota xi kjoaʼáyanile kʼoa koaan koatio ngantsjai nichxin. Je Jesús koaanle sikjaʼáyanile xi jekʼien. Tobʼelañá, kʼianga kicho ya naxinandá Naín kisikjaʼáyale je ʼndíle jngo ʼndíchjoónkʼan, nga̱ koa̱nmake chjoón jebi (Lucas 7:11-15). Je pastro Pablo i kitso: “Kʼoasʼin tikoyale xi tʼatsʼe Niná nga kjoaʼáyale xi kʼen, nda tsa kao chjota xi tjínle kjoakixi, kao chjotatsʼen”. Jebi kui bakóná jokji tsjoakená je Niná nga koa̱n kuiyoaa ngantsjai nichxin (Hechos 24:15).

Millón mani chjota xi koa̱n koatio ngantsjai nichxin. Je Biblia itso: “Je xi kixi tsʼee koa̱n sonʼnde, kʼoa i koatioson ngantsjai nichxin” (Salmo 37:29). Nga kʼia, kʼoakuitso ngatsʼi tojo kitso je pastro Pablo: “Ji kjoabiya, jñá tíjna naʼyátsʼinli. Kʼoa ji tsjó, jñá tíjna xi kinjeli” (1 Corintios 15:55). Ñaki tondiaa tjóxin je kjoabiya.