Ñaki kʼoatjín jmeni xi tso je Biblia
Jokji jetífaʼato nó, ningalani kjaʼaí kjaʼaísʼin tjíosíjchá yaole chjota, tjíobe nga ñaki kʼoatjín jmeni xi tsoya je Biblia. Kʼoa nichxin xi tiyoaa ndʼaibi, millón mani chjota xi kui tjíofitjenngi je kjoafaʼaitsjen xi tsjoá. Tonga kʼoati tjín chjota xi kʼoasʼin síkjaʼaitsjen nga tsín timachjénni jmeni xi tso je Biblia kʼoa nga to én xi nya. Jósʼin nikjaʼaitsjenngái ji. A kʼoatjín jmeni xi tsoya je Biblia.
ÁNNI NGA KOA̱N KOA̱NKJAINNINÁ JMENI XI TSO JE BIBLIA
Jósʼin jchani tsa ñaki kʼoatjín jmeni xi tsoya je Biblia. Tikjaʼaitsjenlai jebi, tsa jngo miyo tíjnali xi ñaki énkixi fákaoli ngantsjai, makjainjinli jmeni xi tso je miyoli. Tikʼoasʼinni, je Biblia koaan koa̱nkjainná jmeni xi tso. Kataʼyala kʼaa choa̱ xi bakó nga ñaki kʼoatjín jmeni xi tso je Biblia.
Tsín jme xi tsakʼéʼma xi kiski je Biblia
Je chjota xi kiski Biblia chjotakixi koan kʼoa saʼnda tsakʼétʼaxoon jme jée xi kisokole kʼoa jñani tsín nda kisʼin. Tobʼelañá, kʼianga kiski Jonás je libro xi jaʼaínle yʼa kʼoakitso nga tsín kisitjoson (Jonás 1:1-3). Tsakʼetʼaxoon nga tsakatekjáyale Niná tonga tsín kʼoakitso tsa kisitjoson jme xi tsakʼinle (Jonás 4:1, 4, 10, 11). Nga ñaki kʼoatjín jme xi tsakʼétʼa je chjota xi kiski je Biblia kui tsakakó nga nʼio koanndosinle je xi kixi.
Nʼio machjén kjoafaʼaitsjen xi nya
A tojo machjénná ndʼaibi je kjoafaʼaitsjen xi faʼaitʼa je Biblia. Jaon. Tobʼelañá, je Biblia kʼoatso josʼin tjínnele kjuinkoaa xíngiaa. Itso: “Kʼoasʼin ngayije kjoa xi meno nga síkaono chjota, kʼoatisʼin tikaonio nga je” (Mateo 7:12). Kʼoa ya Proverbios 15:1, itso: “Kʼianga énndʼé nichjén nga ʼya xi jotsoná faʼáxin kjoajti”. Je kjoafaʼaitsjen xi tsjoá je Biblia tojo nʼio machjénná ndʼaibi.
Ñaki kʼoatjín jmeni xi tso
Jokji jetífaʼato nó, je chjota xi kui básjaiya jmeni xi koan ngasʼa, kjimasjaile je tsojmi jchá xi tíʼyanile nga tsakatio kjoaixi je chjota xi síkʼaxki̱ je Biblia. Jngola choa̱ kataʼyaa. Je Biblia kʼoatso nga nichxinle Nehemías, je chjota tirio (chjota fenicio xi ya naxinandá Tiro tsʼe) xi ya Jerusalén tsakatio jaʼaikao “jti̱ kʼoa tojme tsojmini” (Nehemías 13:16).
Tjín choa̱ xi bakó nga kʼoatjín jebi. Je chjota xi kui básjaiya kjimasjaile je tsojmijchá xi jaʼaikao je chjota fenicio ya naxinandá Israel xi bakó nga negosio kisʼin. Kʼoati kjimasjaile nindale jti̱ ya Jerusalén xi ya kichʼasjengindá ya ndáchikon xi Mediterráneo ʼmi, xi tsakui nichxin nʼio kjin jaʼaikaoni je chjota xi ya kichokaténa. Kʼianga jekiskotʼayason xi tʼatsʼe jebi, jngo chjotachjine xi i̱ kitso: “Kʼoajintjín jotso Nehemías 13:16, nga jti̱ tsakaténa je chjota tirio ya Jerusalén”.
Mangóson kao jmeni xi tso chjota científico
Je Biblia kui bʼéyanajmí jme xi koan ngasʼa kʼoa kui libro xi nʼio síchjén je religión, tonga ñaki kʼoatjín jme xi tso kʼianga tsʼe ciencia nchja̱ni. Kataʼyala.
Jela 3,500 nó tjínle, kʼianga kʼoakitso je Biblia nga totíjnajinsén je Sonʼnde (Job 26:7). Jebi alikui mangóson kao jmeni xi kitso je chjota nga nandá tíjnason je Sonʼnde kʼoa tsa jngo tortuga sénngi. Kʼoa 1,100 nó jejaʼato nga kichji je librole Job, je chjota tojo kʼoasʼin makjainle nga tjín xi sénngi je Sonʼnde. Nga nó 1687, tosʼala 300 nó tjínle kʼianga je Isaac Newton tsakakó nga kui xi gravedad ʼmi basenkao jmeni xi tjíojinsén. Kʼoa kʼoakitso nga kui nganʼio tísíxákao je Sonʼnde nga totíjnajinsén. Jmeni xi kitso chjota jebi kui tsakakó nga ñaki kʼoatjín jmeni xi kitso je Biblia xi jetsʼato 3,000 nó tjínle nga kichji.
Tongini kʼoatso jmeni xi koa̱n
Jmeni xi tongini kitso je Biblia bitjosonní. Kataʼyala jmeni xi tongini kitso je Isaías xi tʼatsʼe naxinandá Babilonia.
Én xi tongini kinokjoa. Kʼiala nga nó 732 tongini nga nó 1, je Isaías tongini kʼoakitso josʼin ni̱kjeson je naxinandá Babilonia ninga kjesa je batéxomajinle ngakjijnda naxinandá. Kʼoa kʼoati kitso ʼyani xi tjoéle Babilonia kʼoa nga tosʼe̱jnakjitia nga koa̱nskanni (Isaías 13:17-20). Je Isaías kʼoakitso nga Ciro kʼuín je rey xi tjoéle Babilonia. Kʼoati kitso nga chjota jebi xin koandiaale je xo̱ngá xi faʼajin ya Babilonia, kʼoa nga totixʼa je xo̱ntjoale naxinandá nga kuicho (Isaías 44:27-45:1).
Jósʼin kitjoson. Jaola siento nó nga koanskanni, nga to jekʼoakitso Isaías je én jebi, je rey xi Persia tsʼe kʼiaa kichokʼétʼale je naxinandá Babilonia. ʼYáni xi séntítjonle. Jé Ciro. Je naxinandá jebi nʼio nda tíchjoandai, kuinga je Ciro xin tsakándiaanile je xo̱ngá Éufrates, kʼoa je nandále xo̱ngá jaʼajen, kʼoa je chjotakjoajchánle Ciro koan jaʼatojinndá saʼnda nga kicho ya xo̱ntjoale naxinandá. Totixʼaa je xo̱ntjoa nga kicho kʼoa koan kitjoéle je naxinandá Babilonia.
Tonga tjínsa jmeni xi kje bitjosonjin nga kʼia. Nga tosʼe̱jnakjitia je naxinandá jebi. Nkjín siento nó nga chjota tsakatio, tonga ndʼaibi, to xkoa̱lesa naxinandá Babilonia tjío ya chrian jña Bagdad ʼmi, ya naxinandá Irak. Jebi kui xi bakó nga ñaki kitjoson kjoaixi je én xi tongini kinokjoa. Kʼianga kui nchja̱ni Biblia tʼatsʼe nichxin xi nroaján kʼoati kuitjoson.