Xi sakʼoa chjonangiaa

◼ Jósʼin kuinyakoaa je xi kjoatse jekisikatío xále Niná nga koa̱n kuitsoyason ijngokʼani

Nʼio tsjoa maná nga mele kuitsoyason ijngokʼani je xi jekisikʼéjna xá jebi tsakai (Luc. 15:4-6). Tsakui nichxin chjota kitjenngike kʼoa tsamaije̱ kjoa jaʼatojin, kʼoa kui xokisikao nga tsín tikiskotʼayani je énle Niná, nga tsín tikini kjoajtín kʼoa nga tsín tikitsoyasonni. Jósʼin koa̱n kuinyakoaa xíngiaa jebi nga tsjoá ijngokʼa nda katasíxánile Niná.

Koakolee nga tojo tsjoachaa. Je xi chjotajchínga sʼin tjío kjitʼanangi koatiojtín nga kjaoyani jme xi machjénle nga nda kʼoéjna ijngokʼani ngixko̱n Niná (Sant. 5:14, 15). Kʼiatsa tosʼa choatsele nga tsín titsoyasonni, tochale koa̱n koasenkao jngo ndsʼee xi koa̱n tsjoánganʼiole nga katatsoyason ijngokʼani. Tonga tsa jenʼio kjoatsele nga kisikjinle je jtín, tochale tsesa nganʼio koa̱nchjénle. Tsakui nichxin saʼnda koa̱n kʼoaile estudio kʼoa kui kʼuínyale jngo xo̱n xi nʼio nda koasenkao, ánni nga koa̱ntajasíni kjoamakjainle kʼoa nga skoe̱chjísíni xi tʼatsʼe Niná. Kʼiatsa estudio kʼoaile, jé superintendente xi tsʼe servicio koasjai ʼyani xi koa̱n kuitsoyale (Heb. 5:12-14; chótʼajin Nuestro Ministerio del Reino xi tsʼe sá noviembre nó 1998 ya jñani “Sección de preguntas” tso). Kʼiatsa ʼyai ʼyani xi kui nganʼio machjénle, je kʼoatʼinlai je superintendente xi tsʼe servicio.

Kʼiatsa mená nga kuitsoyason ijngokʼa jngo ndsʼee xi jekjoatse kisikʼéjna xále Niná, tongisa nda nga jao kjoanla xi chjotajchínga sʼin tjío kjoakaonajmí ánni nga skoe̱síni tsa tsín jme xi batéchjoale nga koa̱n kuitsoyason. Kʼoasʼin ni̱kao jonikao jngo xíngiaa xi tosʼa tsoyason títjon (chótʼajin La Atalaya xi tsʼe 15 de noviembre de 1988, p. 17 kao Jmé kjoanni xi bakóya je Biblia, p. 177 párr. 9-11). Je ndsʼee jebi tjínnele koako nga mele kuitsoyason ngindia kʼoa nga jetísítjoson jmeni xi tso libro Organizados, pájina 79 saʼnda 81. Kʼoati tjínnele nga jefi ntsjaintsjai kjoajtín.

Je xi koasenkao nga sa nda sa nda kʼoéjna ngixko̱n Jeobá kʼoa nga tosi tonda ya kʼoámjeya je ndiaa xi kjoabijnachon ngantsjai kuichokaoná, kuinga nda kʼoendajin josʼin sitjoson xi tʼatsʼe Niná (Mat. 7:14; Heb. 10:23-25). Kʼiatsa nʼio kʼoenele yaole kʼoa sa tse sa tse kjoamakjain sʼe̱le kao kjoachjine, kjoaka kʼoa kao xi kjaʼaísanile, alikui titokʼoasʼin jyó kʼoéjnani “nga nijmejin xi [sʼin]” (2 Ped. 1:5-8).