Kʼianga toje Niná tsakatéxoma, ndasʼin tsakatio ngatsʼi kʼoa jtín sʼin tsakatio

Ánni machjénniná je Chjotaxále Niná

Kʼianga tsakatio je Adán kao Eva, tojé Jeobá, Niná xi kisindaná, tsakatéxoma kʼoa kao kjoatsjoacha tsakatéxomani. Jngoo ʼnde jña naskáchon kisikatío je chjota, ya jñani ʼndenaxóle Edén tsakʼin, ya ʼnde jebi nʼio nkjín tsojmi xi ma chine kisʼe. Xi ijngosani, kui xá kitsjoale xi tsjoa tsakáya kon (Génesis 1:28, 29; 2:8, 15). Kʼiatsa tojo jelani Niná tíbatéxomaná, ndajin sʼin tiyoaa.

Je Adán tíkjoé je to xi Eva títsjoále xi tsín tjínnele ski̱ne tsakai. — Je Adán kao Eva alikui koanmele nga je Niná tsakatéxomale

Je Biblia kʼoatso nga jngo ánkje xi yátsʼi̱n tsakasénle Niná, je xi Na̱i tsakʼin nga jekoanni. Je ánkje jebi kʼoakitso nga tsín bakinle nga je Niná koatexoma. Kʼoakitso nga ngisa nda koatio je chjota kʼiatsa tsín je Niná koandiaale kʼoa tsa tsín je koatexomale. Kʼoa je Adán kao Eva, xijcháná xi títjon tsakatio, koankjainle je énndiso xi kitso je Na̱i kʼoa yátsʼin tsakinyále Niná (Génesis 3:1-6; Apocalipsis 12:9).

Je Adán kao Eva tsakʼasjengi je Niná, kʼoa tsín koanmele nga je tsakatéxomale. Nga kʼoakisʼin, alikui tiya tsakationi ya ʼnde jñani naskánachon kitsjoale Niná kʼoa kisichaa je kjoanda xi kisʼele nga koa̱n koatio tsakai ngantsjai nichxin (Génesis 3:17-19). Jmeni xi kisʼin kʼoati tsʼakaotʼale je xti xi kisʼele nga jeki nichxin. Je Biblia itso: “Kui je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe” (Romanos 5:12). Nga jée tjín tsee kjoa tíbichómani. Je Biblia itso: “Je chjota tjíobatéxomale xínkjín nga tjíosíkiʼaon” (Eclesiastés 8:9). Kjoa bichómani kʼianga tije batéxomanile xínkjín je chjota.

JE KJOATÉXOMALE CHJOTASONʼNDE

Je Nemrod ngʼakon koan. Ya jto̱n yátsʼi̱n tjío chjota xi jngo ndʼia xi nʼioje kji tjíobʼénda. — Je Nemrod tsakʼejnachjoale je Jeobá

Jé Nemrod chjota xi títjon tsakatéxoma, kʼoa tsakʼejnachjoale josʼin batéxoma je Niná. Saʼnda nga kʼia, je chjotaxá xi tjíobatéxoma totaon tjíobe je chjota. Jela 3,000 nó tjínle nga i̱ kitso je rey Salomón: “Tsaʼbeña nga tjíokjiʼndá je xi totaon tjíoʼya, kʼoa tsín ʼya xi kitsjoanganʼiole. Jé batéxoma chjota xi totaon tjíobe” (Eclesiastés 4:1).

Tojo kʼoachon saʼnda nichxin xi tiyoaa ndʼaibi. Kʼianga nó 2009, je Naciones Unidas kʼoakitso nga “ya nroani ngayeje xi chʼaotjín” nga tsín ndasʼin batéxoma je chjota.

JEKICHO CHOA̱LE

Jngoo chjotaxá xi ndasʼin batéxoma machjénná. Kʼoa kui xi tso je Niná nga sʼin.

Sén xi faʼaitʼa kui bakó josʼin bichómani nga toje batéxomale xínkjín je chjota: 1. Jngo chjoón xi Asia tsʼe xi tikjiʼnda nga yʼangʼa ʼndíle nga tíjna ʼnyo calle. 2. Jngo chjotajchínga xi ya hospital tíkijna. 3. Sondado xi ya tjío jña tísʼejna kjoajchán. 4. Jngojtín chjota xi marcha tjíoma kʼoa xi letrero yʼa. 5. Nga bichó ndʼiale jngo chjoón kao tsotiʼndíle be nga tjín xi tsakakján je cho̱tsín xi kjijchxo ventanale. Jngo ʼnde jñani nʼio niʼndi̱le fábrica tjín kʼoa nkjín nʼóki̱cha̱ kitje̱n. — Nijngojinla chjotaxá xi kjimale tíbʼéndajin je kjoa xi tjín

Je Niná tsakasénnda jngo Chjotaxá xi koatexomangajaole je chjotaxá sonʼnde kʼoa “tojé kʼoéjna ngantsjai nichxin” (Daniel 2:44). Kui Chjotaxá jebi xi síjé chjota xi millón mani kʼianga bʼéxkia je padrenuestro (Mateo 6:9, 10). Tonga alikui tsa je Niná xi Rey sʼin kʼoéjna, jé tsakasénnda nga koatexoma je xi jo chjota sʼin jaʼai i̱ Sonʼnde. ʼYáni.