Kʼiáni koatexoma i̱ Sonʼnde je Chjotaxále Niná

JMÉNI XI KITSO JE JESÚS NGA KOA̱N

I kitso: “Kuisótjenne naxinandá kontrale xi kjaʼaí naxinandá, kʼoa kjoatéxoma kontrale kjoatéxoma. Kʼoa kjoaʼa cháonxkón, kʼoa kjaí nkjín ʼnde koa̱n kjinrá chʼinʼbi” (Lucas 21:10, 11). Kʼianga kʼoakoa̱n ngayeje jebi kui koako nga jeme koatexoma je Chjotaxále Niná i̱ Sonʼnde. A jekʼoachon ndʼaibi. A jekʼoakjima jngo tjíjtsa Sonʼnde. A jetíbitjoson jmeni xi kitso je Jesús.

1. KJOAJCHÁN

Kʼianga kisʼejna je Kjoajchántse xi títjon nga nó 1914 nʼio nkjín chjota jeson. Je chjota xi kotʼayason tʼatsʼe jebi kʼoatso nga tsín ʼya xi chajinle jmeni xi koan nga̱ tsʼakaotʼale ngatsʼi chjota je kjoajchán xi kisʼejna. Kʼianga kisʼejna kjoajchán jebi nʼio nkjín ki̱cha̱ xi síkʼienná kisichjén chjota nga kiskan, jolani je carro xi bomba basén, je avión xi bomba bʼétsao, je gas xi síkʼienná, kʼoa xi kjaʼaísanile. Kʼoa kʼianga kisʼejna je Kjoajchántse xi majaoni, kui koanchjén je bomba xi ngisa nkjín chjota síkʼien. Saʼnda tjen nó 1914, ngaʼi̱ ngaján tísʼe kjoajchán kʼoa millón chjota tífeson.

2. CHÁONXKÓN

Je enciclopedia Britannica Academic, kʼoatso nga jngo sientola cháon faʼa nga xki̱ nó, jñani nkjín niʼya bixojen kʼoa nkjín chjota feson. Xi ijngosani, je chjota xi ya Estados Unidos tsʼe xi kotʼayason ánni nga cháon faʼaini kʼoatso nga tjen nó 1900 saʼnda ndʼaibi, nga xjaʼaonjngola cháon faʼa nga xki̱ nó. Nga tjín ki̱cha̱ xi bakó ndʼaibi nga cháon faʼa, tsakui nichxin kuinga kʼoabixónñá nga ngisa nkjín cháon faʼa. Ninga kʼoalani, kjesa kʼoasikji chjota feson joni ndʼaibi kʼoa kjesa kʼoasikji kjoañʼai sʼe xi totʼatsʼe cháon.

3. KJINRÁ

Nga kjoajchán tjín, nga kjoachʼanacha tjín, nga ma̱ tinijchá yaoná kʼoa nga tsín timani tsojmintje yaa tínroani nga kjinrá tjín. Kʼianga nó 2018, je xi Programa Mundial de Alimento ʼmi, i kitso: “Jngo tjíjtsa Sonʼnde, 821 millón mani chjota xi kjinrá tjíofaʼá, kʼoa xi tijeni chjota jebi, 124 millón mani xi jenʼio táo” (2018 Year in Review). Nga xki̱ nó 3,1 millón xtiʼndí mʼe xi totʼatsʼe nga tsín sokóle tsojmi xi kjine. Kʼianga nó 2011, jotjín xtiʼndí kʼien jngo tjíjtsa Sonʼnde, me basen xi kjinrá kisikʼien.

4. CHʼIN KAO CHʼINʼBI

Je Organización Mundial de la Salud itso: “Nga siglo 21 ngisaa nʼio nkjín chʼinʼbi tíbʼatsen. Tíbʼatsen ijngokʼa je chʼin xi koan ngasʼa, jolani chʼinfaʼa, chʼinʼbi, kʼoa kao chʼinndʼai xi nʼio táo, kʼoa tíbʼatsen xi kjaʼaísa chʼin, jolani nga tsín tima kjenjtani je chjota, chʼinjtsé xi nʼio táo, chʼin xi ya Oriente Medio tsʼatsen, chʼin xi ébola ʼmi kʼoa kao xi zika ʼmi”. Kʼoati tsʼatsen chʼin COVID-19. Ningalani jengisa nda tjíokotʼayason xi tʼatsʼe chʼin je chjota científico kao chjinexki, alikui to ngayeje chʼin nga tjín xkile.

5. TÍʼMIYASON ÉNLE NINÁ JNGO TJÍJTSA SONʼNDE

Je Jesús ijngosa choa̱ kinchja̱ni kʼianga kitso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mateo 24:14). Ningalani nʼio tse kjoa tjín jngo tjíjtsa Sonʼnde, tsʼato jin millón mani chjota xi tjíobakóyason je énnda xi tʼatsʼe Chjotaxále Niná, xi 240 naxinandá tjínni kʼoa tsʼato 1,000 én xi kjaʼaí kjaʼaínile tíʼmiyason. Kjesa kʼoasikji ʼmiyasonjin je Énle Niná jokjima ndʼaibi.

JMÉ XI TSOYANILE CHOA̱ JEBI

Nichxin xi tiyoaa ndʼaibi, tíbitjoson ngayeje jmeni xi kitso je Jesús. Nʼio tjínle kjoandosin jmeni xi kjima ndʼaibi, nga̱ je Jesús i kitso: “Kʼia nga jchao nga kʼoakjima je kjoabi, kataʼyao nga tíjnachrian kjoatéxomale Niná” (Lucas 21:31).

Jmeni xi kitso je Jesús nga koa̱n kao jmesani xi tso je Biblia, kui bakó nga nó 1914a tsakatéxoma je Chjotaxále Niná ya ngʼajmi. Nga kui nó, je Niná kʼiaa kitsjoale xá je Jesús nga Rey koan (Salmo 2:2, 4, 6-9). Tojeme koatexoma i̱ Sonʼnde je Chjotaxále Niná, kʼoa sikjeson ngatsʼi je chjotaxá sonʼnde kʼoa ʼndenaxó sikao je Sonʼnde kʼoa koaan kuiyoaa ngantsjai nichxin.

Jeme kuitjoson jmeni xi tso je padrenuestro, nga i̱ kitso je Jesús: “Katanroa Chjotaxáli. Kʼoakatama josʼin meli i̱ tʼanangi jokjima ya ngʼajmi” (Mateo 6:10, TNM). Tonga jméni xi tísʼín je Chjotaxále Niná ya ngʼajmi saʼnda tjen nó 1914. Kʼoa jméni xi sʼin kʼianga jekoatexoma i̱ Sonʼnde.