Kjoaʼmiya 6
¡Je ʼNde naxó je chrian tíjna!
Je kjoa xi chʼao kjima kui xi bakó nga je chrian tíjna ʼNde naxó. Je kjoatse kʼoa kitsó je Biblia kʼianga je tíjna chrian ʼNde naxó nʼió tse kjoa xi sʼe, kʼoa je kʼoa kjima. Kui kʼa kjoa jebi xi tongini kinchja je Biblia:
Kjoajchán tse. “Kuisotjenne naxinandá kontran le xi kjaʼai naxinandá, kʼoa kjoatéxoma kuisotjenne xi kjaʼai kjoatéxoma.” (Mateo 24:7.) Je én jebi xi tongini kinokjoa je kitjoson. Saʼnda nó 1914 ʼnda ndʼai, kjoan jao kjoajchán tse je kisʼe, xín sa le xi kjaʼai, ngayeje nkjín miyón chjota tjiómʼejin.
Xi tikui ni chʼin nʼió tibʼatjibison nga kjijndá. “Kʼoa kjai nkjín ʼnde koan [...] chʼinʼbi.” (Lucas 21:11.) ¿A kʼoa chon nichxin jebi? Jaon, je kánser, chʼin xi tsoa le nima ná, chʼin tisi, chʼin nangisjeya, sida kʼoa chʼin xi kjaʼai sa le xi kʼoasʼin miyón chjota tjiósikʼien.
Choa tsojmi tjín xi ma chiné. Nga kjijndá Soʼnde tjín chjota xi choa tsojmi tjiósoko le xi tjiókjine. Nga xkinó miyón chjota mʼe xi tʼatsʼe kjinrá. Kui jebi xi ijngo sa choa nga je chrian tíjna ʼNde naxó, nga je Biblia kʼoatso: “Kjinrá koan” (Marcos 13:8).
Sʼe cháon nʼió. “Kʼoa cháon kjoaʼa nkjín ʼnde.” (Mateo 24:7.) Kʼoati kjima nichxin xi tiyoa ndʼaibi. Saʼnda nó 1914 ʼnda ndʼai, tsʼato jngo miyón chjota kʼienjin cháon nʼió.
Chjota tsʼen. Je Biblia kʼoatso: Jé chjota koantsjoakie taon, kao yao le kʼoa kao kjoaskaya ʼnde le nga Niná koantsjoakie. Je xti “xi tsantjaikjoake xijchá le” (2 Timoteo 3:1-5). ¿A tsín kʼoati tiʼyai ndʼai nga nkjín chjota xi kʼoa kjoan? Likui xkón be Niná kʼoa xi me le koan le xi tʼatsʼe kjoa nroakao ne.
Tjió bʼatone kjoatéxoma. Kʼoati sʼe “kʼianga koan nkjín ya kjoatsʼen” (Mateo 24:12). ¿A je tiʼyai nga kui nó jebi nga nʼió kjima nkjín chjota xi tjió bʼatone kjoatéxoma? Ngakjinda nʼió xkón kjimachon nga tisʼe kjoaché, kjoachʼanacha kʼoa tsa xi sikiʼaon xínkjín.
Ngayeje jebi to choa nga chrian je tíjna Reino le Niná. Je Biblia kʼoatso: “Kʼianga jchao nga kʼoa kjima je kjoa bi, kataʼyao nga tíjna chrian [reino, NM] le Niná” (Lucas 21:31). ¿Jméni xi Reino le Niná ʼmi? Je chjotaxá le Niná xi ya tíjna ngʼajmi; kʼoasʼin nga ʼnde naxó sikao i Soʼnde. Je kʼoejna ngajao le chjotaxá soʼnde (Daniel 2:44).