Nda si̱kuindaa yaoná kʼianga ʼmiyasoán
1. Ánni nga nda si̱kuindasíñá yaoná nga ʼmiyasoán.
1 Nichxin xi tiyoaa ndʼaibi, je choʼndale Niná yaa mangóson “joni tsa barré yajinle tseen” kʼianga tjíotsoya énle Niná yajinle “chjotasonʼnde xi tsʼen, xi chʼaotjío kon” (Mat. 10:16; Fili. 2:15). Chʼao kjimachon ngakjijnda, tjín ʼnde jñani kjoasi kjomitje̱n chjota, jña bichósítoán chjotankjín kʼoa jñani maché chjota kʼoa nikiʼaon. Kʼianga kʼoakjima kui xi bakó nga “tosi tonda ngisasa tsʼen” kjima je chjota (2 Tim. 3:13). Jmé testoni xi koasenkaoná kʼianga nda si̱kuindaa yaoná nga ʼmiyasoán (Mat. 10:16).
2. Kʼiatsa jñalani tiʼmiyasoán, kʼiáni nga tosa kjitʼanangi xin kjuinkʼinyasoán.
2 Chósonnilee jme xi sʼiaan. Ya Proverbios 22:3 kʼoatso nga nda nʼia nga bijnaʼmalee jmeni xi kjima. Kuinga tje̱nyatokon kuiyosíñá ngantsjai. Ninga tsín jme kjoa tjín ya ʼnde jña bʼakaoná nga ʼmiyasoán likui xi tsonile tsa tokʼoakoa̱nchonntsjai. Tsakui nichxin toʼi̱koa̱n nʼio nkjín polisía kuicho kʼoa tsamaije̱ toxijña koa̱nxkó chjota ya yandiaa. Kʼoa tsa jngoje̱ chjota xi kʼoakuitsoná nga tosa tokoanngián. Ngisajin nda nga kjitʼanangi koanngián kʼoa tosa xin kjuinkʼinyasoán ʼndele nga yala chótsen sinʼaa jmeni xi kjima (Pro. 17:14; Juan 8:59; 1 Tes. 4:11).
3. Jósʼin si̱chjén kjoafaʼaitsjen xi tsjoá ya Eclesiastés 4:9 kʼianga mangínkʼinyasoán.
3 Alikui koa̱n toñá kuitsomaa. Ya Eclesiastés 4:9 itso: “Tongisa nda nga jao mani chjota tikʼoajinni nga tojngo mani”. Tsakui nichxin kʼoabixoán nga tsín xkón chon ya jñani ʼmiyasoán kʼoa jenganá nga toñá mangián. Tonga a tojo kʼoachon ndʼaibi. Tjín ʼnde jñani tsín tikoa̱n tojé koaitsoyasonni jngo tichjaa kʼoa tsa jngo xi sʼa xti, ngisa tsa kʼianga jenjio. Tongisa nda nga tjín xi tje̱nkoaa, xi tje̱njintokon bʼamje (Ecl. 4:10, 12). Kʼianga mangínkʼinyasoán si̱kuindaa xíngiaa jotjín mañá xi kabitjoaa kʼoa si̱kʼéjnaʼén ngantsjai tsa jekoanngián.
4. Jméni xi sʼiaan nga si̱kuindangañá xíngiaa nga ʼmiyasoán.
4 Je xi kjinele nga tsjoáná kjoafaʼaitsjen jmeni xi sʼiaan ya jñani ʼmiyasoán jé xi chjotajchínga sʼin tjío, nga̱ jé tjíosíkuindaná (Heb. 13:17). Je Jeobá sichikontʼainná tsa nangitokon koaan kʼoa kʼoainganʼiolee je xi chjotajchínga sʼin tjío (Miq. 6:8; 1 Cor. 10:12). Tosi tonda kʼuínyasoán ya ʼnde jñani bʼakaoná tonga si̱kuindakaoñá yaoná nga tiʼmiyasoán.