Si̱kuindaa je kjoafaʼaitsjenná
1. Jókʼuín je kjoajtíntse xi jao nichxin sʼe̱jna nó 2013 kʼoa jmé xá kisationdani jmeni xi kjoaʼa.
1 Je Jesús kʼoasʼin kitsoyale chjotale nga tsjoake katama Jeobá kao ngayeje ni̱ma̱le, kao ngayeje yaole kʼoa kao ngayeje kjoafaʼaitsjenle (Mat. 22:37, 38, NM). Je kjoajtíntse xi sa̱tío nó jebi kui xá kisʼendani nga koasenkaoná kʼianga ngisa nda katasʼe kjoafaʼaitsjenná kʼoa kao ni̱ma̱ná. Kʼoajinti faʼaitsjenno nga je kjoajtíntse xi jan nichxin sʼe̱jnaná “Si̱kuindaa je ni̱ma̱ná” kʼuín. Kʼoa je xi tojngo nichxin sʼe̱jna, xi kʼiaa koaitsʼiani nga sa̱tío nga 1 sá septiembre, “Si̱kuindaa jotjío je tokoán” kʼuín. Kʼoa je kjoajtíntse xi jao nichxin sʼe̱jna xi kʼoati kui sá koaitsʼiani “Si̱kuindaa je kjoafaʼaitsjenná” kʼuín, kʼoa ya Mateo 22:37 yʼangini. Je kjoajtíntse xi jao nichxin sʼe̱jna kui koasenkaoná nga si̱kjaʼaitsjenjiaan jotjío kjoafaʼaitsjenná kʼoa josʼin si̱ndayaa ánni nga nda kuiyosíñá ngixko̱n Jeobá.
2. Jmé kjoachjonangi xi sa̱kóyaná kʼianga sʼe̱jna kjoajtíntse xi jao nichxin.
2 Jmé xi kʼuínyaná. Kʼianga jekjoetʼa kjoajtíntse xi jao nichxin sʼe̱jna, machjénní nga si̱kjaʼaitsjenjiaan jmeni xi nʼio chjíle xi kʼuínyaná. Kʼoa nga kjoaʼaítsjenná machjénní nga kʼoétʼaxoaan jme xi kʼuínyaná tʼatsʼe kjoachjonangi jebi:
• Jósʼin si̱kuindaa yaoná nga tsín kʼoatisʼin si̱kjaʼaitsjeen josʼin síkjaʼaitsjen je chjota.
• Jósʼin kuinyakoaa je chjota nga likui tinjio katasatíoni je kjoafaʼaitsjenle.
• Jótjínnele kʼoé je kjoafaʼaitsjenná.
• Jósʼin basenkaoná nga kui xi ndatjín nikjaʼaitsjenjiaan.
• Jmé xi sʼiaan nga kʼoaiʼndelee Jeobá nga je katasíndaya kjoafaʼaitsjenná.
• Jmé xi koa̱n sʼin je xi xʼin, je xi chjoón, je xi xijchá ma kʼoa kao je ʼndíxti nga nda koatio yaniʼyale.
• Jmé xi sʼiaan nga ñaki jetiyondaa kʼianga kjoaʼaí nichxinle Jeobá.
• Jósʼin tsoyanile nga nikatíondaa kjoafaʼaitsjenná.
• Jmé kjoanda xi sokóle je xi sítjoson jme xi ʼmiyale.
3. Ánni nga nʼio chjísínile nga koanngián nga jao nichxin kjoajtíntsená, nga nda kuinyañoaa kʼoa nga si̱tjosoán je kjoafaʼaitsjen xi kʼoainá.
3 Je Na̱i mele sikitsónjin kjoafaʼaitsjenná kʼoa ñaki nʼio tíbʼénele yaole nga kʼoakatamaa (2 Cor. 11:3). Kuinga machjénsíni nga si̱kuindaa kjoafaʼaitsjenná kʼoa kʼoénelee yaoná nga kui si̱kjaʼaitsjeen xi ndatjín. Kʼoasʼin si̱kjaʼaitsjeen josʼin kisikjaʼaitsjen Cristo kʼoa chʼa̱sjengiaa jmeni xi chʼaotjín kijnajtsa sonʼnde (1 Cor. 2:16). Kʼoénelee yaoná nga koanngián nga jao nichxin je kjoajtíntse xi sʼe̱jna kʼoa nda kuinóʼyá jmeni xi kjoaʼa. Tsa si̱tjosoán je kjoafaʼaitsjen xi kʼoainá tsjoánganʼioná nga kʼoakʼoé kjoafaʼaitsjenná nga ñaki nda si̱xálee je Niná (1 Ped. 1:13).