Jósʼiain tsa tsín tso tokuin nga bʼailai estudio chjota
1. Ánni nga tsín tso kʼasíni kon xíngiaa nga kʼoatsole chjota tsa mele skótʼaya Biblia.
1 A kʼoasʼin nikjaʼaitsjain nga tsín koa̱nli kʼuínyalai Biblia je chjota, kʼoa a kui nga tsín kʼoaʼmisínilai tsa mele skótʼaya. Nichxin kjoatse, kʼoati tsakatio kʼa choʼndale Niná xi kʼoakoanle, jolani tsa Moisés kʼoa kao Jeremías. Chjota jebi kʼoasʼin kisikjaʼaitsjen nga tsín kuitjosonle je xá xi tsakʼaile (Éx. 3:10, 11; 4:10; Jer. 1:4-6). Jebi kui xi bakóná nga toxá kʼoama sakʼoaniná. Tonga jmé xi sʼiaan nga kʼoamaná.
2. Ánni nga tsín tokʼoéjngosíñá tokoán tsa jeʼmiyasoán kʼoa nga tsín kʼoasʼin si̱kjaʼaitsjensíñá nga toje xi ngikʼa xi katasʼele estudio.
2 Si̱kjaʼaitsjeen nga je Jeobá nikʼiajinla kui síjéná jmeni xi tsín kuitjosonná (Sal. 103:14). Je xá xi kitsʼainá nga chjotale Cristo si̱koaa chjota kʼoa nga kʼuínyalee koaan kuitjosonná (Mat. 28:19, 20). Kjoanda jebi ali tsa tojejin títsjoále Jeobá je xíngiaa xi jengisa kjoatsele nga tsoya kʼoa tsa jeje̱ xi ngisa nda tsoya (1 Cor. 1:26, 27). Kuinga tsín tokʼoéjngosíñá tokoán tsa jeʼmiyasoán. Likui kʼoasʼin si̱kjaʼaitsjeen nga toje xi ngikʼa xi katasʼele estudio.
3. Jósʼin síchjinená Jeobá nga koa̱nná josʼin kʼoailee estudio chjota.
3 Jé Jeobá síchjinená. Jé Jeobá bakóyaná nga koa̱n kuinyakoaa chjota nga chjotale Cristo katama (2 Cor. 3:5). Jé naxinandále tísíchjén nga títsoyaná jokjoantjínni xi tʼatsʼe Biblia, kʼoa je chjotasonʼnde alikui be xi tʼatsʼe jebi ninga nʼiolani chjine (1 Cor. 2:7, 8). Kʼoati tsakʼétʼa ya Biblia josʼin kitsoya je Jesús ánni nga koa̱n chjénngisínilee kʼoa ntsjaintsjai síchjinená ya kjoajtín xi satíoná. Xi ijngosani, je Jeobá títsjoáná jmeni xi machjénná kʼianga koa̱n kʼuínyalee Biblia je chjota. Nkjín koya xo̱n títsjoáná xi nʼio choa ñʼai sʼin bakóya jokjoantjínni énle Niná, jolani tsa je libro Jmé kjoanni xi bakóya je Biblia. Alijoni toñʼai tíjna nga bʼailee estudio chjota.
4. Ánni nga tjíojngosíni tokoán nga je Jeobá koasenkaoná nga kʼoailee estudio chjota.
4 Je Moisés kao Jeremías kitjosonle xá xi tsakʼaile nga̱ jé Jeobá kitsjoanganʼiole (Éx. 4:11, 12; Jer. 1:7, 8). Kʼoati koa̱n si̱jélee nga katabasenkaoná tsanda ñá nga kʼoailee estudio chjota. Kʼoa koasenkaoná nga̱ je kui xi mele nga kʼuínyalee chjota jotjínni xi tʼatsʼe (1 Juan 3:22). A koaan tsa kʼoasʼin kʼoéndajin nga kjoásjai chjota xi koa̱n kʼoailai estudio. Tsa kʼoasʼiain tsjoa sʼe̱ tokuin kʼoa tse kjoanichikontʼain sʼe̱li.