Jon xi sʼa xtio, a tibʼenelao yaono nga kʼoaino xá ya jinjtín
1. Kʼiáni jekoa̱n kʼoenele yaole jngo ndsʼee nga koaitjenngi jotso ya 1 Timoteo 3:1.
1 “Tsa jngo [ndsʼee] xi mele xá nga sikuinda naxinandále Cristo, kjaínga nda xá xi mele.” (1 Tim. 3:1.) Je én jebi nʼio tsjoánganʼiole je ndsʼee nga kʼoenele yaole nga katabʼaile xá ya jinjtín. Kʼiatsa sʼa xtio, a tjínnele kʼia saʼnda kʼoénelao yaono nga jekoa̱njchíngao. Mai. Tongisa nda nga tongini kʼoasʼiaon. Ndʼaibi jekoa̱n sa̱kóyano kʼoa jekoa̱n ni̱ngalao yaono nga kʼoasʼiaon jmeni xi machjén nga siervo ministerial koaon (1 Tim. 3:10). A jetsangínsʼenngindáo. Kʼiatsa jaon, kataʼyala jméni xi koa̱n sʼiaon nga kʼoaino xá ya jinjtín.
2. Jméni xi koasenkaono kʼianga kao kjoatsjoa kuinyakao xi ngikʼa, kʼoa jósʼin koa̱n kuinyakao xíngiaa.
2 Kao kjoatsjoa tinyakao je xi ngikʼa. Kʼianga jngo xá mená kuichotjenngiaa ya jinjtín, ali tsakuijin xi mená nga ngisa ngʼa kuiyolee xi ngikʼa, kuinga kuinyakoaa je xíngiaa, nga kʼoasʼiaan jngo xá xi “nda”. Kʼoa kuinga machjénsíni nga si̱ngalao yaono nga kao kjoatsjoa kuinyakao je ndsʼee kao tichjaa. Je xi nʼio koasenkaono kuinga si̱kjaʼaitsjenjion je choa̱ xi tsakʼéjna je Jesús (Mat. 20:28; Juan 4:6, 7; 13:4, 5). Kʼiatsa ñʼai mano nga nindosion tʼatsʼe xíngiaa, tʼetsʼoalao Jeobá nga katabasenkaono (1 Cor. 10:24). A koaan kuisenkao je ndsʼee xi chʼin tjínle kʼoa tsa xi jekoanjchínga. A koaan kʼoainganʼio kʼianga masinle je Ndʼia jña chotʼayá, jolani kʼianga satécha kʼoa nga matsje. A koaan tsa jon kuitjángajao kʼianga sakʼoa tsín bichó je xi bʼakaole faʼa ya Skuela xi síchjine choʼndale Niná. Kʼiatsa kʼoasʼiaon, nʼio tsjoa sʼe̱ tokon (Hech. 20:35).
3. Jméni xi ngisa chjíle tsa meno nga si̱xáo ya jinjtín, kʼoa jméni xi koasenkaono nga nda kuiyo ngixko̱n Niná.
3 Nda tiyo ngixko̱n Niná. Jngo ndsʼee xi mele sixá ya jinjtín, ngisa chjíle nga nda tíjna ngixko̱n Niná tikʼoajinni tsa nʼio male kʼoasʼín tojmeni xi sʼenele. Kʼoatisʼin síkjaʼaitsjen josʼin síkjaʼaitsjen Jeobá kao Jesús (1 Cor. 2:15, 16). Bakó nga tjínle “je kjoanda xi tsjoájin ni̱ma̱ná je Espíritu Santo” (Gál. 5:22, 23). Kui títjon síkʼéjna tʼatsʼe Chjotaxále Niná kʼoa nʼio bʼénele yaole nga tsoyason (Mat. 6:33). Kʼianga nda kuiyo ngixko̱n Niná, machjénní nga nyaon nyaon kʼoéxkiao Biblia, nga kʼoéxkiao je Xo̱n xi Bájinkonná kʼoa kao ¡Despertad! kʼoa nga kuiyondakao jme xi faʼa ya kjoajtínná, kʼoa nga tsín si̱chao (Sal. 1:1, 2; Heb. 10:24, 25). Kʼianga kitsjoanganʼiole Pablo je Timoteo nga ndasa katasíxále Niná kʼianga sʼa xti, i kitsole: “Tikuindai je xi tibakoyai” (1 Tim. 4:15, 16). Tiyondao nga mangínkʼinyason kʼoa nga bitjao ya Skuela xi síchjine choʼndale Niná. Ntsjaintsjai tangínkʼinyason. Tikjaʼaitsjaon tsa koa̱n precursor koaon, tsa Betel koanngínnixáo kʼoa tsa ya koanngíon je Skuela xi síchjine je ndsʼee xi sʼa tjíotoje, kʼoa tʼenelao yaono nga kuichotjenngio. Tsa tosi tonda nda kuiyo ngixko̱n Niná kui xi koasenkaono nga tsín ya jtsaojion je “kjoaskáyale xti” (2 Tim. 2:22).
4. Ánni nga nʼio chjísínile nga kixi maa kʼoa nga nitjosoán jme xi sʼenená.
4 Kixi katamao kʼoa titjoson jme xi sʼeneno. Nichxin kjoatse jngo kjinrá kisʼe xi tsʼakaotʼale je chjotale Cristo. Je pastro kiskoejin kʼa “chjotaxʼin xi ʼyale nga nda chjota”, xi kixi kʼoa xi nda kisitjoson, kʼoa jé tsakánele nga kisikʼabíle tsojmi xínkjín. Kʼoa je pastro koan kui kʼoakisʼin xále Niná (Hech. 6:1-4). Jméni xi bakóyano jebi jon xi sʼa xtio. Nga tjínneno nda si̱tjoson kʼianga jme xi sʼeneno. Koaan chjénngilao je Noé, nga ñaki kʼoakjoansʼin kisinda je arca josʼin kisʼenele (Gén. 6:22). Nga kixi maa nʼio chjíle ngixko̱n Niná kʼoa kʼoasʼin bakoñá nga jekjimataja kjoamakjainná (1 Cor. 4:2; tʼexkiai je rekuadro xi tso: “Kjoanda xi tje̱nkao nga binyakoaa xi sʼa xti”).
5. Ánni nga nʼio machjénsíni nga kʼoenele yaole je xtixʼin nga kʼoaile xá ya jinjtín.
5 Je Jeobá tongini kʼoakitso nga nʼio sixátíyale nga ngisa nkjín chjota katafaʼasʼenjin naxinandále (Is. 60:22). Kʼoa nga xki̱ nó, jao siento basenla jmi chjota fisʼenngindá. Nga kʼoasikji nkjín chjota tjíofaʼasʼenjin naxinandále Niná, nʼio machjén je ndsʼee xi nda tjío ngixko̱n Niná kʼoa xi koa̱n sʼe̱nele xá ya jinjtín. Ngisa tse xá tjín xi tsʼe Jeobá ndʼaibi (1 Cor. 15:58). Jon xi sʼa xtio, a tibʼenelao yaono nga kʼoaino xá ya jinjtín. Kʼiatsa jaon, “kjaínga nda xá xi me[no]”.
[Én xi tjítʼa ya pájina 2]
Nga kʼoasikji nkjín chjota tjíofaʼasʼenjin naxinandále Niná, nʼio machjén je ndsʼee xi nda tjío ngixko̱n Niná kʼoa xi koa̱n sʼe̱nele xá ya jinjtín
[Rekuadrole pájina 3]
Kjoanda xi tje̱nkao nga binyakoaa xi sʼa xti
Nʼio binyakao je xtixʼin kʼianga je xi chjotajchínga sʼin tjío tsjoáxále ya jinjtín kʼoa nga tsoyale jme xi tjínnele sʼin. Jngo superintendente xi tsʼe circuito kʼoatso nga ñandiaxó jngo ndsʼee tsakjákao nga jejetʼa kjoajtín nga kitsjoanganʼiole, kʼoa yaxó tsakatioson ya plataforma. Tonga jngoxó tiʼndí tsabe xi ya séjnachrian, kʼoa kiskonangixóle tsa je tíkoyale. Tiʼndí jebi kʼoaxókitso nga je bʼakaole sítsje ya son plataforma nga jefetʼa kjoajtín. Je xijchále jexó tjíofi tsakai, tonga tiʼndí jebi yaxó tíkoya saʼnda nga koa̱n sitsje. Kʼoa kʼiaxó xin kikʼejna ndsʼee jebi. Je ndsʼee jebi i kitso nga koanskanni: “Je xi chjotajchínga sʼin tjío ya jtín jebi tongini binyakao je xtixʼin kʼoa tsoyale jme xi koa̱n sʼin ya jinjtín. Kʼoa nga ñandia ñandia kisixatʼa jtín jebi, jetíjnanda jngole ti xi koa̱n nga siervo ministerial sʼin sixá”.