Kʼoailee estudio je chjota xi mangínkaontsjailee je rebista

1. Ánni nga kʼoatsosíniná je naxinandále Jeobá nga kjoásjee je chjota xi koanngínkaontsjailee rebista.

¹ Je naxinandále Jeobá, jenkjín nó nga kʼoatítsoná nga ntsjaintsjai kjuinkaolee rebista je chjota xi mandosinle nga bʼéxkia, ningalani kaile nga estudio kʼoailee. Ánni. Kuinga sa nda sa nda mandosinle chjota xi tʼatsʼe Énle Niná kʼianga kjitʼa bʼéxkia je rebista (1 Ped. 2:2). Tjínkʼa chjota xi chan kotʼaya je Biblia kʼianga kui bʼéxkia jmeni xi bichókajin ni̱ma̱le.

2. Jósʼiaan nga katamandosinsale Énle Niná je chjota xi mangínkaontsjailee rebista.

² Kuisenkoaa je chjota nga katamantjejinsa Énle Niná ya jinni̱ma̱le. ʼNdele nga tokoanngián nga jekafayolee rebista je chjota koaan kuinókjoakoaa ánni nga chan ngisa nda cho̱banajmíñá kao je. Tsa kʼoasʼiaan, kʼoasʼin jchañá josʼin tjíoni, jmeni xi mandosinle, jmeni xi makjainle kʼoa jchañá jméni xi kʼuínyalee kʼoa josʼin chja̱koaa (Prov. 16:23). Tonga machjénní nga nda kuiyondaa kʼianga ñandia ñandia kjuinchónlee je chjota. Kjoásje jngoaa kjoafaʼaitsjen xi faʼaitʼa ya rebista kʼoa kao jngo testo xi kui tínchja̱ni jmeni xi koakolee je chjota. Tsa kʼoasʼiaan sa nda sa nda koa̱nntjejin ni̱ma̱le je xi ñaki kixi tjín (1 Cor. 3:6). Kʼianga ñandia ñandia kjuinchónlee je chjota kʼoétʼaxoaan je nichxin, jmeni xo̱n xi kafayolee, jme xi kachobayañá kʼoa kao testo xi kachotʼayajiaan.

3. Jókjitse kjuinchónnilee je chjota xi mangínkaontsjailee je rebista.

³ Jókjitse kjuinchónnilee. Je chjota xi mangínkaontsjailee je rebista xki̱ sá mangínchonlee. Tonga tsa mandosinsale kʼoa tsa kʼoakoa̱nná koaan ngisa kjitʼa kjuinchónlee. Tsa jngo kʼoa tsa jao xomana kafaʼato nga kafayolee je rebista koaan kjuinchón ijngokʼalee kʼoa i̱ kʼuínlee: “Totjín xi mena koakole xi faʼaitʼa je rebista xi kisikáyonále”. Tsakui nichxin koa̱nndosinnile jme xi tínchja̱ni je rebista. Kʼoa tsa jngo chjota xi kʼoakuitsoná nga jetsakʼéxkia koaan chjónangilee josʼin síkjaʼaitsjen tʼatsʼe jme xi jetsakʼéxkia kʼoa kui cho̱banajmíñá. Tonga je chjota xi tsjoake nga bʼéxkia je xo̱n xi kjioná koaan si̱káyolee tsa tratado tsa foyeto kʼoa tsa libro xi kjimaxákao nga kui sá.

4. Jósʼin kjoásjailee nga kʼoailee estudio je chjota xi mangínkaontsjailee je rebista.

⁴ Kjoásjailee josʼin kʼoétsʼiakoaa nga kʼoailee estudio je chjota xi mangínkaontsjailee je rebista, alikui kʼia saʼnda nga je xi kʼoakuitsoná nga mele skótʼaya. Ningalani jesa kʼoakitsoná nga kaile skótʼaya, koaan sakʼoa kui kʼuínyalee je xi faʼaitʼa je Xo̱n xi Bájinkonná, ya jñani i̱ tso: “Jmeni xi chjonangiaa xi tʼatsʼe Biblia”. Tsakuini nichxin kʼoasʼin koa̱n kʼoailee estudio ninga toya jchxo xo̱ntjoale chjota. Kʼoa ninga ngindia kʼoakuitsoná nga kaile skótʼaya, koaan tosi tonda kjuinkaolee je rebista kʼoa tosi tonda kuisenkoaa nga katamandosinsale je Énle Niná.