Jósʼiaan nga ndasa kʼuínyasoán: nga koa̱nndosinle Énle Niná je chjota xi fayolee rebista

Ánni nga nʼio chjísínile nga kʼoasʼiaan. Nkjín chjota xi bʼéxkia je rebista xi nikatíolee tonga xi tsín mele nga Biblia sa̱kóyale. Tsakui nichxin kuinga kʼoatso je chjota nga toje nda tjío ya relijión xi tjíojin kʼoa tsakuije̱ nga tsín maʼale. Ninga kʼoalani, nga kjitʼa bʼéxkia je rebista, chanjin koa̱nndosinle je Énle Niná (1 Ped. 2:2). Tsakui nichxin kuichokajin ni̱ma̱le jme xi kʼoexkia ya rebista, kʼoa tsakuije̱ nga kʼoantjaiya josʼin kʼoéjna. Kʼianga kjitʼa kjuinchónlee kʼoajinsʼin jchañá jmeni xi mandosinle kʼoa jme xi makjaojinle, kʼoa ngisajin sʼe̱le kjoanʼiotʼa xi kao ñá. Tsakui nichxin saʼnda estudio kʼoailee nga jekoa̱nni.

Jókoa̱n sʼiaan:

Kjuinkaolee je Xo̱n xi Bájinkonná xi sʼa bitjo chjotse. Koaan skan kjuinchón ijngokʼalee nga kʼuínya choalee jme xi faʼaitʼa je rebista ánni nga koa̱nmesínile kʼoexkia, kʼoa tsakui kjoáyoleeje̱ je xo̱n xi kjimaxákao nga kui sá. Ndakjoan kʼoétʼaxoaan xi tʼatsʼe chjota. (Chótʼai je xo̱n Xá xi nʼia tʼatsʼe Niná xi tsʼe sá enero nó 2014, pájina 3.)
Tongini kuiyondaa nga kjuinchón ijngokʼalee je chjota. ʼNdele nga tokjoáyolee je rebista, chja̱kaonajmiá kʼoa si̱miyoaa. Tsa kʼoasʼiaan ngisajin choa ñʼai koa̱nle nga koa̱nndosinle je Énle Niná.
Alikui si̱kʼatoaa tsa ʼyani xi koa̱n kʼoailee estudio. Tsa jngo chjota xi mangínkaolee rebista skónanginá jótso je Biblia xi tʼatsʼe jmeni xi mele skoe̱, kjuinkaolee jngo xo̱n xi nichjén nga bʼé estudio xi tsoya tʼatsʼe jmeni xi kakjonangi je chjota kʼoa ñatjen chótʼayajiaan kao je. Kʼoa nga kjesa nixatʼajián je chjota, jngo kjoachjonangi si̱kʼéjnalee xi tikui tínchja̱ni jmeni xi kachobayañá xi kʼia kʼuínyalee nga kʼuínchon ijngokʼalee. Tsa Énle Niná chja̱kaonajmíñá je chjota kʼoa tsa ñaki chʼin chʼin jetiʼmiyalee kʼoa kui Biblia nichjén kʼoa tsa kjaʼaísa xo̱n xi bʼaiñá estudio, jejin jngo estudio mani. A jetsakajnalee je foyeto Énnda chjotse kʼoa a jekʼoatsakʼinlee nga ma chotʼayá je Biblia ninga tongotjo. Ijngosa koya jmeni xi koa̱n sʼiaan, kuinga koakolee je video Ánni nga machjénsíni nga chótʼayai Biblia kʼoa kao Jósʼin ʼmiyalaijin Biblia je chjota. Tsandalani je chjota koankaile nga kiskotʼaya Biblia nga títjon, tonga ndʼai tochale koa̱nmele skótʼaya. Koa̱njin tokʼoala kʼuín ijngokʼalee.

I̱ tʼiain sá jebi:

Tʼetʼaxuin je chjota xi koa̱n nga xki̱ sá kʼuínkaolai je rebista. Tjayolai je rebista chjotse kʼoa kʼoatʼinlai nga skan kʼuínkaolai je xi sʼa kuitjosa.