“Nda tangínkao yaono yajinle chjota”

1. Ánni nga nʼio chjínile nga ndasʼin koanngínkoaa yaoná kʼianga koanngián je kjoajtíntse.

¹ Je chjota bená kʼianga satíoná je kjoajtíntse xi jan nichxin nga xki̱ nó. Kuinga nʼio chjínile nga ndasʼin koanngínkoaa yaoná ánni nga koakosíñá nga choʼndale Niná maa (1 Ped. 1:15, 16). Jonʼia kʼoa josoyoaa kʼoasʼin bakoñá nga ñaki chjota tje̱nngile Cristo maa. Je Énle Niná itsoná: “Nda tangínkao yaono yajinle chjota”. Jósʼin si̱tjosoán én jebi kʼianga koanngián je kjoajtíntse xi jan nichxin kʼoa tsa yaje̱ kjoajtíntse jñani nkjín naxinandá kjoaʼaíni xi kuicho, nga̱ kʼoasʼin chʼa̱sjengʼañá je Nʼainá xi tíjna ngʼajmi (1 Ped. 2:12).

2. Kʼianga koanngián je kjoajtíntse, jñáni nga kʼoati tjínnele koakoá nga choʼndale Niná maa.

² Koakoá nga choʼndale Niná maa. Je kjoatjaocha xi bakolee xíngiaa kʼoa jonikoaa xi kjaʼaí chjota likui mangóson kao josʼín je xi tsín choʼndale Niná ma (Col. 3:10; 4:5; 2 Tim. 3:1-5). Nʼio chjíle nga koakoá kjoanda kʼoa nga tsejta koaan kao je xi ya síxá ya hotel kʼoa tsa ya jñani kuichaa, ninga jme kjoa xi sʼe̱. Kʼoati ndatjín nga kʼoailee xi tsʼe ndáxile je chjota xi ya síxá kʼiatsa kʼoasʼin beni.

3. Jméni xi tínikjaʼaitsjenjinle je xi xijchá ma, kʼoa ánni.

³ Je xi xijchá ma tjínnele nga sikuinda je ʼndíxtile ya ʼnde jñani sʼe̱jna je kjoajtíntse, ya jñani koakjenni kʼoa kao ya hotel jña koationi (Prov. 29:15). Je chjoón xi tíjnaʼnda jngo hotel i kitsole jngo ndsʼee kao chjoónle: “Nʼio sasénnajin jonʼiao xi testigo mao. Je xtino nʼio tjínle kjoaxkóntokon. Ngatsʼi xi síxá ibi nda nchja̱ni xi tʼatsaon, kʼoa menajin nga xki̱ jin nichxin kjoaʼao tsakai”.

4. Kʼianga jeya tiyoaa ya jñani sʼe̱jna je kjoajtíntse, jméni xi kuenta sʼiaan tʼatsʼe josóyoaa.

⁴ Je najño xi ndasʼin matsen chʼa̱kjá. Je najño xi ndasʼin matsen chʼa̱kjá nga koanngián je kjoajtíntse, kʼoa likui tokjaʼaíngá sóyoaa jofayo je chjota xi tsín kotʼaya Énle Niná (1 Tim. 2:9). Kʼoati likui tosóyo tomañá ninga kʼia nga sʼa kuichoaa kʼoa tsa kʼia nga jekuitjoñá ya hotel kʼoa tsa kʼiaje̱ nga tsín ya tiyoaa jñakjoanni tísʼejna je kjoajtíntse. Tsa si̱tjosoán jebi ñaki tsjoajin tjío tokoán nga kjoátʼaa je xo̱n xi fatʼaa nga mangián kjoajtíntse kʼoa likuijin koa̱nsoaná kʼianga chja̱kaonajmíñá je chjota tʼatsʼe Énle Niná. Tsa ndasʼin koanngínkoaa yaoná kʼoa tsa nda sóyoaa nga sʼe̱jnaná je kjoajtíntse xi jan nichxin kʼoa tsa yaje̱ kjoajtíntse jñani nkjín naxinandá kjoaʼaíni xi kuicho, yaa kjuinroani nga koa̱nmele skótʼaya je Énle Niná je chjota xi ndʼé tjío ni̱ma̱le kʼoa kʼoati kjoáyatsjoaa je ni̱ma̱le Jeobá (Sof. 3:17).

Én xi sʼejintokoán tʼatsʼe je kjoajtíntse xi jan nichxin sʼe̱jna nó 2014

◼ Ora nga koaitsʼia kʼoa nga kjoetʼa. Las 8:00 tjóxʼá je xo̱ntjoa. Las 9:20 kjoane je músika xi koaitsʼiani kjoajtíntsená nga jan nichxin. Koanngínkiyoaa ʼndená nga kjoane músika ánni nga jeya tiyosíñá nga koaitsʼia. Nga bixine kao nga xoto las 4:55 kuijndá je kjoajnda xi kjoetʼani kʼoa kʼiaa sʼe̱jna kjoabʼetsʼoa, kʼoa nga taingo las 3:50 kjoetʼa.

◼ Kjoajtíntse jñani nkjín naxinandá kjoaʼaíni xi kuicho. Tjínkʼa ʼnde jñani sa̱tío kjoajtíntse jebi. Je sucursal tongini kosonnile jotjín chjota jchóya jñani sa̱tío kjoajtíntse jebi, jotjín karro kjoaʼasʼen, jotjín chjota koa̱n koatio ya hotel xi tjío, kʼoa kui xi kuenta sʼín kʼianga sikasénʼénle ngatsʼi jtín xi koa̱n kuicho kʼoa kao ndsʼee xi tʼaxin naxinandá kjoaʼaíni. Kʼiatsa tjíokʼa ndsʼee kao tichjaa xi ya koai kjoajtíntse jebi xi tsín ya bʼakaole, kjoaʼatonejinle jotjín chjota jchóya ya ʼnde jñani sʼe̱jna. Kʼiatsa totsejinni tsín kʼoakoa̱nná nga ya koanngián ya kjoajtíntse xi bʼakaoná, koaan kjaʼaí kjoajtíntse koanngián xi tsín tsakui kjoajtíntse jebi.

◼ Jña sʼeyo karro. Ya jñani tiñá si̱kuindañá je karro alikui kʼoéchjiá, kʼoa kʼoasʼin sʼe̱yo chʼin chʼin josʼin kuicho. Mani nga totjíchoa̱ karro jchóya, kʼoaʼmilee xíngiaa nga nkjín chjota katabatioya nga tojngo karro. Kʼoa ya jñani sʼe̱yo karrole xíngiaa xi tsín ma fi, tojekjoán xi kʼoaiʼndele xi tjínle placa kʼoa kao xi tjínle letrero.

◼ Yáxile. Kʼianga tjóxʼá xo̱ntjoa alikui koa̱n nga xitso xiská kjoásjee je ʼnde jñani kuiyoaa, nga̱ tsín tsa tibijnyisjena̱cha̱jián jñani kuiyoaa. Je xi mená kuinga kuenta sʼiaan xi ngikʼa, alikui nga to yaoná koanngínñá. Kʼoasʼin bakoñá nga ñaki chjotale Cristo maa kʼoa yaa nroani nga bʼasjengʼa Niná je chjota xi bená (Juan 13:34, 35; 1 Cor. 13:4, 5; 1 Ped. 2:12). Tojékjoán xi koa̱n koatiolee yáxile je xi tojngo niʼya maa, kao je xi tikui karro koanngínkaoñá kʼoa kao je xi tiʼmiyalee Biblia. Totjíchoaa yáxile xi tsen sa̱tío jña koa̱n koatio je xíngiaa xi jenʼio koanjchínga kʼoa kao xi chʼin tjínle. Alikui koa̱n nga ya koatiokao ngatsʼi xínkjín. Alikuijin nichjaon yáxile jebi, ánni nga je katabatiosíni xi jenʼio koanjchínga kʼoa kao xi chʼin tjínle kʼoa kao xi sikuinda.

◼ Tsojmi xi chinee. Ngisa nda nga chʼaa tsojmi xi chi̱nee tikʼoajinni nga kʼia koanngínkindá nga nyisen. Koaan jngo xjoa̱ chʼaa xi koa̱n ya si̱kʼéjnangiaa yáxile. Ya jñani satío kjoajtíntse alikui tjoʼnde nga kui xjoa̱ xi nʼio yʼai kjoan chʼá kʼoa kao tsojmi xi cho̱tsín.

◼ Tao̱n. Koaan kʼoainganʼioá je xá xi kjima jngo tjíjtsa Sonʼnde nga koatioyá kaxa̱ jotjín nroajin ni̱ma̱ná. Kʼiatsa kʼoasʼiaan kʼoasʼin koakoñá nga nʼio ʼyachjiá je kjoajtíntsená. Tsa ʼyani xi mele nga cheque sikatíoya kaxa̱, kui kʼoetʼa je jaʼaín xi yʼa je testigole Jeobá ngixko̱n kjoatéxoma. Kʼoati sa̱tío kʼa kjoajtíntse jñani koa̱n si̱chjén tarjeta de crédito kʼoa tsa tarjeta de débito nga kʼoee jotjín kjuinroajin ni̱ma̱ná.

◼ Xki. Kʼiatsa tinixkio koaan chʼa̱o xkino, nga̱ tsín ya kʼoainá xki ya jña sʼe̱jna kjoajtíntsená. Tsa ʼyani xi chʼinxi tjínle kʼoa tsa jeringa kʼoa nindo síchjén alikui koa̱n nga tojña sikʼatsao, kʼoa ni koa̱njin nga ya sikʼatsaoya je xjoa̱tjé xi satío ya jña sʼejna kjoajtíntse kao xi tjío ya hotel.

◼ Si̱kuindaa yaoná. Alikui mená nga ya tótsakján kʼoa nga ya katabʼatjeen ánni nga tsín ʼya xi skuiʼaonsíni. Nga xki̱ nó nkjín mani xi miʼaon xi totʼatsʼe jtéle. Ngisa nda nga kui kjoáyaa jté xi nda sʼeyaná xi tsín ngʼangi kjoan tacónle ánni nga tsín jme xi koa̱nsíniná ya jña mijon chon, jña eskalón tjín kʼoa tsa ya jñani ki̱cha̱ kjiojchxo.

◼ Xíngiaa xi tsín nda nrʼoé. Tjínkʼa kjoajtíntse jñani kʼoati ma noʼyalee kao radio (FM) jmeni xi faʼa, tonga toyaní jinkjoajtíntse. Nga koa̱n kuinóʼyalao machjén nga jngo radio chʼa̱o xi pila tjínle kʼoa kao audífono.

◼ Carriola kao yáxile xi sʼekjaoya. Alikui koa̱n nga carriola kʼoa tsa yáxile xi sʼekjaoya kʼoa̱ je xi xijchá ma. Je xi koa̱n kʼoa̱ tokui yáxile xi tsʼe xtiʼndí xi tochoa̱ ma jchóson jñani biyoaa.

◼ Perfume. Tjín ʼnde jñani satío kjoajtíntsená nga aire acondicionado machjén nga̱ yaniʼyaní. Mani nga tsjoachaa xíngiaa alikui koa̱n nga toxkia tse perfume si̱chjén xi nʼio nje̱, nga̱ tjín xíngiaa xi chʼao síkao xi tsín nanda ma kjenjta kʼoa tjínje̱ xíngiaa xi kjaʼaísa chʼin tjínle (1 Cor. 10:24).

◼ Xo̱n xi Sírvase visitar (S-43-S) ʼmi. Tsa jngo kʼoa tsa jao xo̱n jebi chʼa̱o ánni nga koa̱n ya kʼoétʼaxo̱nsíño tsa jngo chjota xi koa̱nndosinle Énle Niná chja̱kaonajmío. Xijekoa̱n, je tʼailao je ndsʼee xi ya síxá ya Departamento de Publicaciones, kʼoa tsamaije̱ kʼia tʼailao je xi secretario sʼin tíjna ya jinjtín.

◼ Jña kjen chjota. Kʼiatsa nda sʼiaan nga tiyoaa ya jña kjen chjota jé Jeobá kuitjongʼa. Kʼoa tsa kʼoasʼin beni ya jñani kuichaa nga sʼejna jotjínle tsʼe ndáxile koaan kʼoéjnaa.

◼ Hotel

Ali nkjínjin kuarto nijáo tsa tsínni koa̱nchjénno ngayeje, kʼoa tokʼoakjoantjín tiyoʼyao je kuarto jotjín tsjoáʼnde je hotel.
Kʼiatsa ñaki tsínni kʼoakoa̱nno nga ya kuiyo, ndi̱to̱n tinókjoao ya hotel ánni nga koa̱n kjaʼaí xi sijésíni (Mat. 5:37). Tʼetʼao je número xi kʼoaino nga tsínni ya kuiyo. Kʼiatsa tongi jaosa nichxin cha nga kuinókjoao ya hotel, likui tikʼoainino tao̱n xi tsakʼejnangio.
Tʼiaon kuenta jebi: Kʼiatsa tarjeta de crédito kʼoa tsa tarjeta de débito kʼoéchjíño hotel, sʼe̱jnanʼio choa je tao̱nno. Je tao̱n jebi kui koa̱nchjíntjaini tsa totsejinni tjín xi si̱kitsón jotjín nichxin nga ya kuiyo. Kʼiaa jekoa̱n si̱chjénño tao̱n jebi nga jekjoaʼato jngo jao nichxin nga jekabʼechjío.
Kʼiatsa kui si̱chjaon je ki̱cha̱ xi ma nokjónya chʼá, tiʼa tangínnikʼéjnaño nga jekoa̱nchjénno ánni nga koa̱n sichjénsíni xi kjaʼaí chjota.
Kʼiatsa kʼoasʼin beni, tʼailao tsʼe ndáxile je chjota xi síxá ya hotel xi tsókjón tsojmino. Kʼoa tikʼéjnalao tsʼe ndáxile je xi sindachon kuarto jña kuiyo.
Kʼiatsa tsín tjoʼnde nga kui sʼenda tsojmi xi ma chine ya kuarto jña kuiyo, alikuijin bʼendao.
Alikuijin chʼao nga koanngíon ya kjoajtíntse je kafe kʼoa kao tsojmi xi kʼoaino jotjín nichxin nga ya kuiyo.
Katamatsen nga Énle Niná tichotʼayao kʼianga chja̱kao je xi síxá ya hotel. Tikjaʼaitsjaon nga nkjín chjota sísinle kʼoa nga tsjoa sʼele nga tondʼé nʼia kʼoa nga tsejta maa.
Je xi xijchá ma tjínnele nga sikuinda je ʼndíxtile tojñani nga tjío ya hotel, a yaa ya piscina, a yaa jña bitjasʼenñá hotel axo yaa ya gimnasio.
Jotjín síkʼéchjí nga jngo nitje̱n ya hotel yaa tjítʼa je xo̱n xi Lista de hoteles recomendados ʼmi xi nikasénle jtín, tonga kjaʼaínile jotjín síkʼéchjísonsa. Kʼiatsa tsʼato kʼoatjín sikʼéchjíno, kjitʼanangi tikjinrʼóao je ndsʼee xi kjinele Departamento de Alojamiento.
Tsa jme kjoa sʼe̱no ya kuarto jña kuiyo jotjín nichxin sʼe̱jna kjoajtíntse, kjoan tikjinrʼóao je ndsʼee xi kjinele Departamento de Alojamiento.

◼ Je xi mele tsjoánganʼio jme xá xi sʼe. Toʼyani xi mele tsjoánganʼio xá xi sʼe̱ ya kjoajtíntse, ya katafi jñani tíjna Departamento de Servicio Voluntario. Je xti xi kje xjaʼaonjngojin nóle koaan tsjoánganʼio jme xá xi sʼe̱ tsa tje̱nkao jngo xijchále. Kʼoati koa̱n sixá tsa tje̱nkao jngo xi jejchínga tsa katsjoáʼnde xijchále.