Én xi sʼejintokoán tʼatsʼe je kjoajtíntse xi jan nichxin sʼe̱jna
Ora nga koaitsʼia kʼoa nga kjoetʼa. Las 8:00 tjóxʼá je xo̱ntjoa. Las 9:20 kjoane je músika xi koaitsʼiani kjoajtíntsená nga jan nichxin. Koanngínkiyoaa ʼndená nga kjoane músika ánni nga jeya tiyosíñá nga koaitsʼia. Nga bixine kao nga xoto las 5:00 kjoetʼa je kjoajtíntse, kʼoa nga taingo las 4:00 kjoetʼa.
Kao músika chʼa̱sjengʼaa je Jeobá. Nichxin kjoatse, je naxinandále Niná kao músika tsakʼasjengʼani Jeobá. Kʼoa nichxin xi tiyoaa ndʼaibi tojo nʼio machjén je músika nga ʼyaxkoán je Jeobá (Sal. 28:7). Nga tanjio kao nga nyisen nga fitsʼia je kjoajtíntsená, títjon músika fane. Músika jebi ali tsa tokjoatjaojin fane, kui xá satíondani nga je Jeobá chʼa̱sjengʼaa kʼoa nga jchasaa xi tʼatsʼe. Kuinga machjénsíni nga jetiyoaa ya ʼndená kʼianga je ndsʼee xi tíbándiaa kjoajtíntse kʼoakuitso nga kjoane músika jebi, kʼoa nda kuinóʼyalee, ʼndele nga tocho̱banajmíla. Tsa kʼoasʼiaan, koakoñá nga ʼyachjiá jokji kjoama̱ bʼéngi je ndsʼee xi ya tjíojin ya orquesta xi tsʼe Watchtower. Jao kʼa bichó nga xki̱ nó ya Patterson (Nueva York) nga sʼín grabar je músika xi noʼyalee ya kjoajtíntsená, kʼoa tijé beni gastole. Nga jekuinóʼyalee je músika xi kjoane títjon, kʼiaa chʼa̱sjengʼaa je Jeobá nga kuijndálee.
Jña sʼeyo karro. Ya jñani tiñá si̱kuindañá je karro alikui kʼoéchjiá, kʼoa kʼoasʼin sʼe̱yo chʼin chʼin josʼin kuicho. Mani nga totjíchoa̱ karro jchóya, kʼoaʼmilee xíngiaa nga nkjín chjota katabatioya nga tojngo karro. Kʼoa ya jñani sʼe̱yo karrole xíngiaa xi tsín ma fi, tojekjoán xi kʼoaiʼndele xi kjitʼale je letrero.
Yáxile. Kʼianga tjóxʼá xo̱ntjoa alikui koa̱n nga xitso xiská kjoásjee je ʼnde jñani kuiyoaa, nga̱ tsín tsa tibijnyisjena̱cha̱jián jñani kuiyoaa. Koaan tʼaxin kuiyoaa ninga tsín ya jñani ngisa tsjoachaa. Kʼianga tsín to yaoná koanngínñá kʼoasʼin koakoñá nga ñaki chjotale Cristo maa kʼoa yaa kjuinroani nga kʼoasjengʼa Niná je chjota xi skoe̱ná (Juan 13:34, 35; 1 Cor. 13:5; 1 Ped. 2:12). Tojékjoán xi koa̱n koatiolee yáxile je xi tojngo niʼya maa, kao je xi ñatjen kitjeen ya karro kʼoa kao je xi tiʼmiyalee Biblia. Alikui koa̱n nga jme xi si̱katíosoán je yáxile kʼiatsa tsínni si̱chjén ánsíni nga ngotjo koa̱nsjainile xi ngikʼa jñani koatio. Tsen sa̱tío yáxile jña koa̱n koatio je xi jenʼio koanjchínga kʼoa kao xi chʼin tjínle. Alikui koa̱n nga ya koatiokao ngatsʼi xínkjín nga totjíchoaa yáxile xi kʼoasʼin sa̱tío. Alikui koa̱n nga ya kuiyosoán yáxile jebi, ánni nga je katabatiosíni xi jenʼio koanjchínga kʼoa kao xi chʼin tjínle kʼoa kao xi sikuinda.
Je najño xi ndasʼin matsen chʼa̱kjá. Je najño xi ndasʼin matsen chʼa̱kjá nga koanngián je kjoajtíntse, kʼoa likui tokjaʼaíngá sóyoaa jofayo je chjota xi tsín kotʼaya Énle Niná (1 Tim. 2:9). Kʼoati likui tosóyo tomañá ninga kʼianga sʼa kuichoaa kʼoa tsa kʼianga jekuitjoñá ya hotel kʼoa tsa kʼiaje̱ nga tsín ya tiyoaa jñakjoanni tísʼejna je kjoajtíntse. Tsa si̱tjosoán jebi ñaki tsjoajin tjío tokoán nga kjoátʼaa je xo̱n xi fatʼaa nga mangián kjoajtíntse kʼoa likuijin koa̱nsoaná kʼianga chja̱kaonajmíñá je chjota tʼatsʼe Énle Niná. Tsa ndasʼin koanngínkoaa yaoná kʼoa tsa nda sóyoaa nga sʼe̱jnaná je kjoajtíntse xi jan nichxin, yaa kjuinroani nga koa̱nmele skótʼaya je Énle Niná je chjota xi ndʼé tjío ni̱ma̱le kʼoa kʼoati kjoáyatsjoaa je ni̱ma̱le Jeobá (Sof. 3:17).
Celular kao tableta. Tsa jngo celular kʼoa tsa jngo tableta chʼaa nga koanngián kjoajtíntse, kʼoasʼin si̱kʼéjnalee nga tsín tsa katafane. Tsa foto chʼa̱sjee, tsa sʼiaan grabar, tsa tableta si̱chjén kʼoa tsa jmesani, si̱kuindaa josʼin si̱chjén ánni nga tsín ʼya xi sijtisínile kʼoa nga tsín ya kuinyachjoalee je xíngiaa nga tjíokotsen ya plataforma. Alikui koa̱n tsa mensaje kʼoa tsa correo si̱kasén tsa tsín nʼio machjén.
Tsojmi xi chinee. Ngisa nda nga chʼaa tsojmi xi chi̱nee tikʼoajinni nga kʼia koanngínkindá nga nyisen. Koaan jngo xjoa̱ chʼaa xi koa̱n ya si̱kʼéjnangiaa yáxile. Ya jñani satío kjoajtíntse alikui tjoʼnde nga kui xjoa̱ xi nʼio yʼai kjoan chʼá kʼoa kao tsojmi xi cho̱tsín.
Tao̱n. Koaan kʼoainganʼioá je xá xi kjima jngo tjíjtsa Sonʼnde nga koatioyá kaxa̱ jotjín nroajin ni̱ma̱ná. Kʼiatsa kʼoasʼiaan kʼoasʼin koakoñá nga nʼio ʼyachjiá je kjoajtíntsená. Tsa ʼyani xi mele nga cheque sikatíoya kaxa̱, kui kʼoetʼa je jaʼaín xi yʼa je testigole Jeobá ngixko̱n kjoatéxoma i̱ México: La Torre del Vigía, A.R. Kʼoati sa̱tío kʼa kjoajtíntse jñani koa̱n si̱chjén tarjeta de crédito kʼoa tsa tarjeta de débito nga kʼoee jotjín kjuinroajin ni̱ma̱ná.
Xki. Kʼiatsa tinixkio koaan chʼa̱o xkino, nga̱ tsín ya kʼoainá xki ya jña sʼe̱jna kjoajtíntsená. Tsa ʼyani xi chʼinxi tjínle kʼoa tsa jeringa kʼoa nindo síchjén alikui koa̱n nga tojña sikʼatsao, kʼoa ni koa̱njin nga ya sikʼatsaoya je xjoa̱tjé xi satío ya jña sʼejna kjoajtíntse kao xi tjío ya hotel nga̱ xkónní.
Si̱kuindaa yaoná. Alikui mená nga ya tótsakján kʼoa nga ya katabʼatjeen ánni nga tsín ʼya xi skuiʼaonsíni. Nga xki̱ nó nkjín mani xi miʼaon xi totʼatsʼe jtéle. Ngisa nda nga kui kjoáyaa jté xi nda sʼeyaná xi tsín ngʼangi kjoan tacónle ánni nga tsín jme xi koa̱nsíniná ya jña mijon chon, jña eskalón tjín kʼoa tsa ya jñani ki̱cha̱ kjiojchxo.
Xíngiaa xi tsín nda nrʼoé. Tjínkʼa kjoajtíntse jñani kʼoati ma noʼyalee kao radio (FM) jmeni xi faʼa, tonga toyaní jinkjoajtíntse. Nga koa̱n kuinóʼyalao machjén nga jngo radio chʼa̱o xi pila tjínle kʼoa kao audífono.
Carriola kao yáxile xi sʼekjaoya. Alikui koa̱n nga carriola kʼoa tsa yáxile xi sʼekjaoya kʼoa̱ je xi xijchá ma. Je xi koa̱n kʼoa̱ tokui yáxile xi tsʼe xtiʼndí xi tochoa̱ ma jchóson jñani biyoaa.
Perfume. Tjín ʼnde jñani satío kjoajtíntsená nga aire acondicionado machjén nga̱ yaniʼyaní. Mani nga tsjoachaa xíngiaa alikui koa̱n nga toxkia tse perfume si̱chjén xi nʼio nje̱, nga̱ tjín xíngiaa xi chʼao síkao xi tsín nanda ma kjenjta kʼoa tjínje̱ xíngiaa xi kjaʼaísa chʼin tjínle (1 Cor. 10:24).
Jña kjen chjota. Kʼiatsa nda sʼiaan nga tiyoaa ya jña kjen chjota jé Jeobá kuitjongʼa. Kʼoa tsa kʼoasʼin beni ya jñani kuichaa nga sʼejna jotjínle tsʼe ndáxile koaan kʼoéjnaa.
Hotel
Ali nkjínjin kuarto nijáo tsa tsínni koa̱nchjénno ngayeje, kʼoa tokʼoakjoantjín tiyoʼyao je kuarto jotjín tsjoáʼnde je hotel.
Kʼiatsa ñaki tsínni kʼoakoa̱nno nga ya kuiyo, ndi̱to̱n tinókjoao ya hotel ánni nga koa̱n kjaʼaí xi sijésíni (Mat. 5:37). Tʼetʼao je número xi kʼoaino nga tsínni ya kuiyo. Kʼiatsa tongi jaosa nichxin cha nga kuinókjoao ya hotel, likui tikʼoainino tao̱n xi tsakʼejnangio.
Tʼiaon kuenta jebi: Kʼiatsa tarjeta de crédito kʼoa tsa tarjeta de débito kʼoéchjíño hotel, sʼe̱jnanʼio choa je tao̱nno. Je tao̱n jebi kui koa̱nchjíntjaini tsa totsejinni tjín xi si̱kitsón jotjín nichxin nga ya kuiyo. Kʼiaa jekoa̱n si̱chjénño tao̱n jebi nga jekjoaʼato jngo jao nichxin nga jekabʼechjío.
Kʼiatsa kui si̱chjaon je ki̱cha̱ xi ma nokjónya chʼá, tiʼa tangínnikʼéjnaño nga jekoa̱nchjénno ánni nga koa̱n sichjénsíni xi kjaʼaí chjota.
Kʼiatsa kʼoasʼin beni, tʼailao tsʼe ndáxile je chjota xi síxá ya hotel xi tsókjón tsojmino. Kʼoa tikʼéjnalao tsʼe ndáxile je xi sitsje kuarto jña kuiyo.
Kʼiatsa tsín tjoʼnde nga kui sʼenda tsojmi xi ma chine ya kuarto jña kuiyo, alikuijin bʼendao.
Alikuijin chʼao nga koanngíon ya kjoajtíntse je kafe kʼoa kao tsojmi xi kʼoaino jotjín nichxin nga ya kuiyo.
Katamatsen nga Énle Niná tichotʼayao kʼianga chja̱kao je xi síxá ya hotel. Tikjaʼaitsjaon nga nkjín chjota sísinle kʼoa nga tsjoa sʼele nga tondʼé nʼia kʼoa nga tsejta maa.
Je xi xijchá ma tjínnele nga sikuinda je ʼndíxtile tojñani nga tjío ya hotel, a yaa elevador, a yaa ya piscina, a yaa jña bitjasʼenñá hotel axo yaa ya gimnasio.
Jotjín síkʼéchjí nga jngo nitje̱n ya hotel yaa tjítʼa je xo̱n xi Lista de hoteles recomendados ʼmi xi nikasénle jtín, tonga kjaʼaínile jotjín síkʼéchjísonsa. Kʼiatsa tsʼato kʼoatjín sikʼéchjíno, kjitʼanangi tikasénʼénlao je ndsʼee xi kjinele Departamento de Alojamiento.
Tsa jme kjoa sʼe̱ ya kuarto jña kuiyo jotjín nichxin sʼe̱jna kjoajtíntse, kjoan tikasénʼénlao je ndsʼee xi kjinele Departamento de Alojamiento.
Je xi mele tsjoánganʼio jme xá xi sʼe. Toʼyani xi mele tsjoánganʼio xá xi sʼe̱ ya kjoajtíntse, ya katafi jñani tíjna Departamento de Servicio Voluntario. Je xti xi kje xjaʼaonjngojin nóle koaan tsjoánganʼio jme xá xi sʼe̱ tsa tjenkao jngo xijchále. Kʼoati koa̱n sixá tsa tjenkao jngo xi jejchínga tsa katsjoáʼnde xijchále.