Jósʼin kuinyakoaa ʼyani xi tsín nanda male xo̱n

1. Ánni nga ñʼai masíniná kʼianga ʼmiyalee je Énle Niná je chjota xi tsín nanda male xo̱n.

¹ Kʼianga ʼmiyasoán tsaojin kʼaa je chjota xi mandosinle jotjínni xi tʼatsʼe Niná, tonga nga tsín nanda male xo̱n, kaile nga bʼéxkia je Biblia kʼoa kao xo̱n xi kjioná. Tsakui nichxin likui skénndiaa nga kui títjon kʼoailee je libro Jmé kjoanni xi bakóya je Biblia. Jósʼin kuinyakoaa je chjota jebi nga kʼuínyalee je Énle Niná. Kʼianga kichjonangile jebi ndsʼee xi tsʼato kan naxinandá tjío, kui kjoafaʼaitsjen kitsjoa jotso je xi jchaa xi fisani.

2. Jñánile xo̱n xi koa̱n si̱chjén kʼianga kʼuínyalee je chjota xi tsín nanda male xo̱n.

² Kʼiatsa je tiʼmiyalee je chjota xi tsín male xo̱n kʼoa tsa xi tsín nanda male nga bʼéxkia koaan kui títjon si̱chjén je foyeto Tinóʼyalai je Niná kʼoa tsakuije̱ Tinóʼyalai je Niná kʼoa kuijnaní ngantsjai nichxin. Jngo precursor xi ya Estados Unidos tsʼe, bakóle nga jao foyeto jebi je chjota kʼoa kjonangile jñánile xi koa̱nmele. Je sucursal xi tíjna ya naxinandá Kenia kʼoatso nga je foyeto jebi nʼio nda tjíobinyakao je chjota xi tsín nanda male xo̱n. Nga̱ ya Africa ngisa nda majinle je chjota kʼianga sʼeyanajmíle jme xi tínchja̱ni Biblia tikʼoajinni tsa je chjónangile. Jngo chjota xi nda male xo̱n likuijin ñʼai koa̱nle nga kʼoexkia kʼoa tsa jme xi chjónangile. Tonga jngo xi tsín nanda male xo̱n ñʼai male. Nʼio nkjín publicador xi tosa kui síchjén xo̱n jebi nga tsoyale je chjota xi ma choale xo̱n: Énnda chjotse xi tʼatsʼe Niná tínroani, Koan miyo le Niná koain kʼoa tsakuije̱ Je xo̱nna xi bʼéyanajmí jotso Biblia.

3. Jméni xi kuenta sʼiaan kʼianga nda kʼuínyalee je chjota xi tsín male xo̱n.

³ Si̱nʼioá kon. Je xi tsín male xo̱n tsakui nichxin soa male kʼoa tochoa chjí bekon yaole. Xi títjon sʼiaan kuinga kuisenkoaa nga tsjoa katasatío kon nga tjíokotʼaya, ánni nga tosi tonda skótʼayasíni. Nʼio nkjín chjota xi tsín male xo̱n xi ngisa ngotjo majinnile jmeni xi sakóyale. Kuinga ndasíni nga kjuinchʼalee kjoaxkóntokon (1 Ped. 3:15). Kʼianga jchaa nga tjíobʼénele yaole kʼoa nga kjimale jmeni xi tibakoyalee koaan kʼoakʼuínlee nga jenda kjimale kʼoa kui xi koasenkao nga tosi tonda koa̱nmele skótʼaya.

4. Jósʼin kuinyakoaa je xi tsín nanda male xo̱n nga tongini katabationdakao jmeni xi skótʼaya.

⁴ Ningalani ñʼai male nga bʼéxkia je chjota xi tiʼmiyalee, koaan kʼoakʼuínlee nga tongini katabationdakao jmeni xi chótʼayá. Je publicador xi ya tsʼe Sudáfrica kʼoatsole je chjota xi bakóyale nga je kʼoakatatsole je xi xínkjín mani kʼoa tsa je xi miyole mani, xi nda male bʼéxkia nga je katabinyakao. Jngo publicador xi ya Gran Bretaña tsʼe kui jebi xi sʼín kʼianga basenkao je xi tsoyale nga tongini katabʼejnandakao jmeni xi kotʼaya. Tjíokʼa párrafo jñani bakóle je libro xi je síchjén ánni nga katabesíni nga ngisa ngotjo masjaininá jmeni xi kjonangi je párrafo kʼianga kjindiaangile. Jngo ndsʼee xi ya India tsʼe kʼoatsole je xi bakóyale nga tongini katakotsenle kʼoa nga tongini katasíkjaʼaitsjenjin je sén xi faʼaitʼa ya kjoaʼmiya xi skótʼaya je xomana xi fisani.

5. Jósʼiaan kʼianga tsejta katamaa nga kʼuínyalee je chjota xi tsín nanda male bʼéxkia.

⁵ Tsejta katamaa. Je xi kuenta sʼiaan kui jmeni xi ngisa tínchja̱ni je xo̱n xi tinichjén kʼoa kuisenkoaa je xi tiʼmiyalee nga nda katamajinle. Kʼianga tosʼa títjon kʼuínyalee je chjota tongisa nda nga to te kʼoa tsa to xjaʼaon minuto cho̱bakaonajmiá, likui koa̱n nga nʼio nkjín párrafo kʼuínyalee. Tsejta katamaa kʼiatsa ñʼai bʼéxkia je chjota xi tiʼmiyalee. Tsakui nichxin ngisasa nda koa̱nle kʼoexkia kʼianga jekoa̱nsale xi tʼatsʼe Jeobá. Ngisajin kʼoenele yaole nga ndasa kʼoexkia kʼianga sa nda sa nda koa̱ntsjoake je Jeobá. Kʼoa nga katamatsjoake je Jeobá koaan kʼoakuínlee saʼnda nga títjon nga katafi ya kjoajtín xi satíoná.

6. Jósʼin kʼuínyalee je chjota nga katamale nga katabʼéxkia.

⁶ Kʼiatsa koa̱nle nga nda kʼoexkia xo̱n je chjota xi tiʼmiyalee, ngisa kjoennʼiole nga kʼoasʼin jmeni xi síjé Niná (Sal. 1:1-3). Nkjín publicador xi kui síchjén je foyeto Katamali josʼin sʼexkia kʼoa josʼin chji nga bakóya ngotjole je chjota kʼianga jekama kakotʼaya. Kʼiatsa jetísíkinroajen kon je chjota koaan nga kui kʼoakʼuínlee jmeni xi jekjimale nga tíkotʼaya. Koaan kʼoakʼuínlee nga je Jeobá sichikontʼain nga kʼoasʼin tíbʼénele yaole kʼoa nga kʼoati katasíjéle nganʼio (Prov. 16:3; 1 Juan 5:14, 15). Tjíokʼa publicador xi ya Gran Bretaña tsʼe, xi kʼoatsole je chjota xi bakóyale nga katasíkjaʼaitsjenjin jmeni xi bele kon nga koa̱nle kʼoasʼin. Tobʼelañá, nga kui títjon katamale nga jngó jngó letra. Xijekoa̱n, nga katamale josʼin koasjai kʼoa kʼoexkia je testo xi tsʼe Biblia. Kʼoa xi fetʼani, nga chan koa̱nle kʼoexkia je xo̱n xi tochoa ñʼai tjío. Tonga ali tsa tokuijin xi machjén nga kʼuínyalee chjota josʼin kʼoexkia, kʼoati nʼio machjén nga kuinyakoaa nga katasímekon nga ngisasa nda kʼoexkia.

7. Ánni nga machjénsíni nga kʼuínyalee Énle Niná je chjota xi tsín nanda male xo̱n.

⁷ Je Jeobá alikui bʼasjengi je chjota xi choa xo̱n male (Job 34:19). Je Jeobá kui kotsenle jmeni xi tjín ya jinni̱ma̱le (1 Crón. 28:9). Kuinga machjénsíni nga kʼuínyalee Énle Niná je chjota xi tsín nanda male bʼéxkia. Nʼio nkjín xo̱n kjioná je xi koa̱n si̱chjén. Nga koa̱nskanni koaan kui kʼuínyalee je libro Jmé kjoanni xi bakóya je Biblia, ánni nga ngisa nda koa̱njinsínile jmeni xi bakóya Énle Niná.