Jósʼin bena je Jeobá
1. Jósʼin mangóson Biblia jngo cho̱tsín.
1 Jókjitse chotsenyañá cho̱tsín. Mejin to nyaon nyaon kʼoanʼia, nga̱ kui bakóná jotisoyoaa kʼoa jñani machjén nga si̱sinlee yaoná. Je Biblia yaa mangóson jngo cho̱tsín. Kʼianga bʼexkiaa je Biblia basenkaoná nga ʼyaa jotjín ni̱ma̱ná, nga̱ kui ni̱ma̱ná xi kotsenle Jeobá (1 Sam. 16:7; Sant. 1:22-24). Je Énle Niná male “básjaiya kjoafaʼaitsjen, kʼoa josʼin mele síxá ni̱ma̱ná” (Heb. 4:12). Kʼianga nyaon nyaon kʼoéxkiaa Biblia kʼoa si̱kjaʼaitsjenjiaan jotso, koasenkaoná nga ngisasa nda koa̱nná kʼuínyasoán. Ánni kʼoabixónsíñá (Sal. 1:1-3).
2. Jósʼin basenkaoná je Biblia nga ʼyaa jokjoaan.
2 Kʼoasʼin si̱chjén je Biblia joni tsa jngo cho̱tsín. Jmeni xi bʼéyanajmí je Biblia tʼatsʼe choʼndale Niná xi kixi kitʼale kui bakóyaná josʼin mele Niná nga katamakjoan je choʼndale. Tobʼelañá, je rey David nʼio kisitoánntjai je jaʼaínle Niná (1 Sam. 17:45, 46). Kʼoa je profeta Isaías kao kjoanʼiojin kʼoakitso nga je koaikájinkon je chjota, ninga xíjin je chjota nga kʼia (Is. 6:8, 9). Je Jesús nʼio tsjoake koan je Nʼaile kʼoa kui xokisikao nga ñaki tsjoa kisʼenile nga kitsoyason, kʼoakitso nga kui xi kitsjoanganʼiole, alikui ai koanle nga kʼoakisʼin (Juan 4:34). Je chjota tje̱nngile Jesús xi títjon tsakatio ñaki nʼio kitsoyason je Énle Niná. Jé Jeobá kisinʼiotʼa kʼoa nitséjinla kisikinroajen kon (Hech. 5:41, 42; 2 Cor. 4:1; 2 Tim. 4:17). Kʼianga nikjaʼaitsjenjiaan je choa̱le choʼndale Niná, basenkaoná nga ʼyaa jokjoaan kʼoa jósʼin nga ngisa nda ni̱xálee Niná.
3. Ánni nga nʼio maxátíyasínile nga ni̱kʼantjaiyaa yaoná jñani chaná.
3 Si̱ndayaa yaoná jñani chaná. Ninga chótsenyá cho̱tsín, toxitsjoajinni tsa tsín ni̱sinlee yaoná jñani tsín nda tisoyoaa. Koaan je Jeobá si̱jélee nga katabasenkaoná nga kataʼyaa jñani nga machjénná nga ni̱kʼantjaiyaa yaoná (Sal. 139:23, 24; Luc. 11:13). Mani nga likui titse nichxin tíjnani kʼoa nga xkón tjío kjoabijnachonle chjota, nʼio maxátíyale nga ni̱kʼantjaiyaa yaoná jñani chaná (1 Cor. 7:29; 1 Tim. 4:16).
4. Jóma je chjota xi ñaki nda kotʼaya kʼoa síkjaʼaitsjenjin je Énle Niná kʼoa síndaya yaole jñani machjénle.
4 Je Jeobá kui kotsenle jotjín ni̱ma̱ná, kʼoa kui xi ngisa nʼio chjíle tikʼoajinni jotisoyoaa xi tosonngʼa (1 Ped. 3:3, 4). Jóma je chjota xi ñaki nda kotʼaya kʼoa síkjaʼaitsjenjin je Énle Niná kʼoa síndaya yaole jñani machjénle. Likui “tsa tonrʼoé” kʼoa síchajin, “kʼoasʼín jo tso” je Énle Niná kʼoa nʼio tsjoa sʼele nga kʼoasʼín (Sant. 1:25). Tsa kʼoasʼiaan, kʼoasʼin koa̱nngósoán joni tsa cho̱tsín xi matsenya “je kjoajeyale Nainá”, ngisa tsjoa sʼe̱ tokoán kʼoa ngisasa nda ni̱xálee Niná (2 Cor. 3:18).